കോഴിക്കോട് ടൗൺ സ്റ്റേഷൻ ഗ്രേഡ് എസ്.ഐ. പി. ഷാഫിയെ പട്ടാപ്പകൽ കത്തികൊണ്ട് കുത്തി പരിക്കേൽപ്പിച്ച കേസിൽ അറസ്റ്റിലായ വി. പ്രമോദിനെ കോടതി രണ്ടാഴ്ചത്തേക്ക് റിമാൻഡ് ചെയ്തു. കൊലപാതകശ്രമത്തിന് കേസെടുത്ത പ്രതിയെ കോഴിക്കോട് ജില്ലാ ജയിലിലേക്കാണ് മാറ്റിയത്. ഹോട്ടൽ ജീവനക്കാരനുമായുള്ള തർക്കത്തിനിടെ ഇടപെട്ടതിനാണ് എസ്.ഐക്കെതിരെ അക്രമമുണ്ടായതെങ്കിലും, പോലീസിനോടുള്ള കടുത്ത വിരോധമാണ് കൃത്യത്തിന് പിന്നിലെന്ന് ചോദ്യംചെയ്യലിൽ വ്യക്തമായി.
മറ്റു നാല് പോലീസ് ഉദ്യോഗസ്ഥരെക്കൂടി വധിക്കാൻ തനിക്ക് പദ്ധതിയുണ്ടായിരുന്നതായി പ്രതി പോലീസിന് മൊഴി നൽകിയിട്ടുണ്ട്. മുൻപ് തന്നെ കസ്റ്റഡിയിലെടുത്ത് മർദിച്ചതിൽ പങ്കുണ്ടെന്ന് ആരോപിച്ച് ചില ഉദ്യോഗസ്ഥരുടെ പേരുകൾ ഇയാൾ എടുത്തുപറയുകയും ചെയ്തു. 2019-ൽ ഒരു സംഘടനയുടെ പോസ്റ്റർ ഒട്ടിക്കുന്നതിനിടെ തന്നെ കസ്റ്റഡിയിലെടുത്ത ഉദ്യോഗസ്ഥരോടാണ് പ്രതിക്ക് പകയുള്ളത്. ഇവർക്കെതിരെ നടപടി ആവശ്യപ്പെട്ട് മുൻപ് മുഖ്യമന്ത്രിക്ക് പരാതി നൽകിയിരുന്നതായും ഇയാൾ വെളിപ്പെടുത്തി.
Also Read: വിവാഹ സൽക്കാരത്തിന് ചാരായം വാറ്റി! കരുമാടിയിൽ റെയ്ഡ്, രണ്ടു ലിറ്റർ മദ്യവും വാറ്റുപകരണങ്ങളും പിടികൂടി
പ്രതിയായ പ്രമോദ് മുൻപും സമാനമായ നിരവധി അക്രമ സംഭവങ്ങളിൽ ഉൾപ്പെട്ടിട്ടുള്ള വ്യക്തിയാണ്. 2017 മുതൽ നഗരത്തിലെ വിവിധ സ്റ്റേഷനുകളിലായി എട്ടോളം കേസുകൾ ഇയാൾക്കെതിരെയുണ്ട്. കെ.എസ്.ആർ.ടി.സി കണ്ടക്ടറെ മർദിച്ചതും ബൈക്ക് യാത്രക്കാരനെ ആക്രമിച്ചതും ഇതിൽ ചിലതാണ്. സംഭവസ്ഥലത്ത് ഫോറൻസിക് വിദഗ്ധർ പരിശോധന പൂർത്തിയാക്കി. പോലീസിനെതിരെ ആസൂത്രിതമായ നീക്കങ്ങൾ നടന്നോ എന്ന കാര്യത്തിൽ കൂടുതൽ അന്വേഷണം നടന്നുവരികയാണ്.
The post കോഴിക്കോട് എസ്.ഐയെ കുത്തിയ കേസ്! പ്രതി ലക്ഷ്യമിട്ടത് കൂടുതൽ പോലീസുകാരെ; മൊഴി പുറത്ത് appeared first on Express Kerala.