ഇറ്റാനഗർ: അതിർത്തി വിഷയങ്ങളിൽ കോൺഗ്രസ് നേതാവ് രാഹുൽ ഗാന്ധിക്ക് അറിവില്ലെന്നും സംസാരിക്കുന്നതിന് മുമ്പ് കാര്യങ്ങൾ പഠിക്കാൻ തയ്യാറാകണമെന്നും കേന്ദ്രമന്ത്രി കിരൺ റിജിജു. അരുണാചൽ പ്രദേശിലെ ഇന്ത്യ-ചൈന അതിർത്തി മേഖലയായ ബുംലാ പാസ് സന്ദർശിക്കവെയാണ് രാഹുലിന്റെ ഗാൽവാൻ പരാമർശങ്ങൾക്കെതിരെ റിജിജു ആഞ്ഞടിച്ചത്. ദേശീയ സുരക്ഷയുമായി ബന്ധപ്പെട്ട വിഷയങ്ങളെ രാഹുൽ ഗാന്ധി രാഷ്ട്രീയവൽക്കരിക്കുകയാണെന്നും അദ്ദേഹം കുറ്റപ്പെടുത്തി.
മുൻ കരസേനാ മേധാവി എം.എം. നരവനെയുടെ ഇതുവരെ പ്രസിദ്ധീകരിക്കാത്ത ഓർമ്മക്കുറിപ്പുകൾ പാർലമെന്റിൽ ഉദ്ധരിച്ചുകൊണ്ട് സർക്കാർ നിലപാടുകളെ രാഹുൽ വിമർശിച്ചിരുന്നു. ഗാൽവാൻ വിഷയത്തിൽ രാഷ്ട്രീയ നേതൃത്വത്തിന് കൃത്യമായ നിലപാടില്ലായിരുന്നുവെന്ന രാഹുലിന്റെ ആരോപണത്തെ സർക്കാർ ശക്തമായി എതിർത്തു. പുറത്തിറങ്ങാത്ത ഒരു പുസ്തകത്തിലെ കാര്യങ്ങൾ സഭയിൽ ചർച്ച ചെയ്യുന്നത് ചട്ടവിരുദ്ധമാണെന്നും അത് ദേശീയ സുരക്ഷയെ ബാധിക്കുമെന്നും റിജിജു വ്യക്തമാക്കി. സുരക്ഷാ കാര്യങ്ങൾ ഗൗരവത്തോടെ കാണണമെന്നും അത് രാഷ്ട്രീയ നേട്ടങ്ങൾക്കായി ഉപയോഗിക്കരുതെന്നും അദ്ദേഹം കൂട്ടിച്ചേർത്തു.
Also Read: “മ്ലേച്ഛമായ പരാമർശം, എന്നെ ഇതിലേക്ക് വലിച്ചിഴയ്ക്കരുത്”; ബിജെപി അധ്യക്ഷനെതിരെ നടി തൃഷ രംഗത്ത്!
ലോക്സഭാ സ്പീക്കർ ഓം ബിർളയെ ഇംപീച്ച് ചെയ്യാനുള്ള പ്രതിപക്ഷ നീക്കത്തെയും കിരൺ റിജിജു പരിഹസിച്ചു. സഭയിൽ അതിനുള്ള അംഗബലം രാഹുലിനില്ലെന്നും അനാവശ്യ വിവാദങ്ങൾ ഉണ്ടാക്കാനുള്ള കോൺഗ്രസിന്റെ ശ്രമം മാത്രമാണിതെന്നും അദ്ദേഹം പറഞ്ഞു. പാർലമെന്റിൽ ഇത്തരം നീക്കങ്ങൾ വിജയിക്കില്ലെന്നും ഒന്നും സംഭവിക്കാൻ പോകുന്നില്ലെന്നും കേന്ദ്രമന്ത്രി വ്യക്തമാക്കി.
The post അതിർത്തി വിഷയങ്ങളിൽ രാഹുലിന് ഒന്നുമറിയില്ല, ആദ്യം പഠിക്കട്ടെ; ഗാൽവാൻ പരാമർശത്തിൽ ആഞ്ഞടിച്ച് കിരൺ റിജിജു appeared first on Express Kerala.