യാത്ര കഴിഞ്ഞ് വീട്ടിലെത്തിയ ദമ്പതികൾ ഉറങ്ങിക്കിടന്ന നാല് വയസ്സുകാരനായ മകനെ ടാക്സി കാറിൽ മറന്നുവെച്ചു. ഫെബ്രുവരി 14-ന് ബെംഗളൂരുവിലാണ് സംഭവം നടന്നത്. കാറിൽ നിന്ന് ഇറങ്ങിയപ്പോൾ കുട്ടി കൂടെയുണ്ടെന്ന നിഗമനത്തിലായിരുന്നു മാതാപിതാക്കൾ. എന്നാൽ പിൻസീറ്റിൽ ഉറങ്ങുകയായിരുന്ന കുഞ്ഞിനെ ശ്രദ്ധിക്കാതെ ഡ്രൈവർ വണ്ടിയുമായി പോവുകയായിരുന്നു. അല്പസമയത്തിന് ശേഷം കുട്ടി കൂടെയില്ലെന്ന് തിരിച്ചറിഞ്ഞ മാതാപിതാക്കൾ പരിഭ്രാന്തരായി ഉടൻ തന്നെ ‘നമ്മ 112’ എന്ന പോലീസ് ഹെൽപ്പ്ലൈൻ നമ്പറിൽ വിവരമറിയിച്ചു.
സന്ദേശം ലഭിച്ച് വെറും രണ്ട് മിനിറ്റിനുള്ളിൽ പോലീസ് സംഭവസ്ഥലത്തെത്തുകയും ടാക്സിയുടെ നമ്പറും ലൊക്കേഷനും വേഗത്തിൽ കണ്ടെത്തുകയും ചെയ്തു. തുടർന്ന് ഡ്രൈവറെ ഫോണിൽ ബന്ധപ്പെട്ട് കുട്ടി കാറിലുണ്ടെന്ന് ഉറപ്പുവരുത്തിയ പോലീസ്, ഉടൻ തന്നെ മാതാപിതാക്കളുടെ അപ്പാർട്ട്മെന്റിലേക്ക് വണ്ടി എത്തിക്കാൻ നിർദ്ദേശം നൽകി. പോലീസിന്റെ കൃത്യസമയത്തുള്ള ഇടപെടലിനെത്തുടർന്ന് ഒരു മണിക്കൂറിനുള്ളിൽ തന്നെ കുഞ്ഞിനെ സുരക്ഷിതമായി മാതാപിതാക്കളുടെ അടുത്തെത്തിക്കാൻ സാധിച്ചു. ബെംഗളൂരു പോലീസിന്റെ ഈ കാര്യക്ഷമമായ നീക്കത്തിന് വലിയ പ്രശംസയാണ് സോഷ്യൽ മീഡിയയിൽ ലഭിക്കുന്നത്.
The post നാല് വയസ്സുകാരനെ ടാക്സിയിൽ മറന്നുവെച്ച് ദമ്പതികൾ! മിന്നൽ വേഗത്തിൽ ഇടപെട്ട് ബെംഗളൂരു പോലീസ് appeared first on Express Kerala.