ടി20 ലോകകപ്പിൽ ന്യൂസിലാൻഡിനെതിരെ കാനഡയുടെ യുവതാരം യുവരാജ് സിങ് സമ്ര നടത്തിയ വെടിക്കെട്ട് ബാറ്റിംഗ് ക്രിക്കറ്റ് ലോകത്ത് വലിയ തരംഗമായിരിക്കുകയാണ്. വെറും 19 വയസ്സുള്ള ഈ താരം കിവി ബൗളർമാരെ തല്ലിച്ചതച്ച് റെക്കോർഡ് സെഞ്ച്വറി സ്വന്തമാക്കി. വെറും 58 പന്തിൽ നിന്നാണ് സമ്ര മൂന്നക്കം തികച്ചത്. ആകെ 65 പന്തുകൾ നേരിട്ട താരം ആറ് സിക്സറുകളും പതിനൊന്ന് ഫോറുകളും ഉൾപ്പെടെ 110 റൺസാണ് അടിച്ചുകൂട്ടിയത്.
ഈ തകർപ്പൻ പ്രകടനത്തോടെ ടി20 ലോകകപ്പ് ചരിത്രത്തിൽ സെഞ്ച്വറി നേടുന്ന ഏറ്റവും പ്രായം കുറഞ്ഞ താരമെന്ന റെക്കോർഡ് യുവരാജ് സമ്രയുടെ പേരിലായി. കൂടാതെ, ലോകകപ്പിൽ ഒരു അസോസിയേറ്റ് രാജ്യത്തിന് വേണ്ടി സെഞ്ച്വറി നേടുന്ന ആദ്യ താരമെന്ന ചരിത്രനേട്ടവും ഈ പത്തൊൻപതുകാരൻ സ്വന്തമാക്കി. ക്രിക്കറ്റിലെ വമ്പന്മാരായ ന്യൂസിലാൻഡിനെതിരെ തന്നെ ഇത്തരമൊരു നേട്ടം കൈവരിച്ചു എന്നത് സമ്രയുടെ പ്രകടനത്തിന് മാറ്റുകൂട്ടുന്നു.
Also Read:ഇന്ത്യൻ പരിശീലക സ്ഥാനം വിട്ട് ഗംഭീർ രാജസ്ഥാനിലേക്ക്? വമ്പൻ ഓഫറുമായി റോയൽസ്!
ടോസ് നേടി ബാറ്റിംഗ് തിരഞ്ഞെടുത്ത കാനഡയ്ക്ക് സമ്രയുടെ ഇന്നിംഗ്സ് വലിയ കരുത്താണ് നൽകിയത്. താരത്തിന്റെ മികവിൽ നിശ്ചിത 20 ഓവറിൽ നാല് വിക്കറ്റ് നഷ്ടത്തിൽ 173 റൺസ് എന്ന മികച്ച സ്കോറാണ് കാനഡ പടുത്തുയർത്തിയത്. ക്യാപ്റ്റൻ ദിൽപ്രീത് ബജ്വ 36 റൺസുമായി സമ്രയ്ക്ക് മികച്ച പിന്തുണ നൽകി. അസോസിയേറ്റ് ക്രിക്കറ്റിന്റെ വളർച്ച വിളിച്ചോതുന്ന ഒന്നായി സമ്രയുടെ ഈ റെക്കോർഡ് പ്രകടനം വിലയിരുത്തപ്പെടുന്നു.
The post ലോകകപ്പ് ചരിത്രത്തിൽ ചരിത്രം തിരുത്തി 19-കാരൻ; കാനഡയുടെ യുവരാജ് സമ്രയ്ക്ക് റെക്കോർഡ് സെഞ്ച്വറി appeared first on Express Kerala.