ദുബായിലേക്ക് യാത്ര ചെയ്യാനൊരുങ്ങുന്ന പ്രവാസികൾക്കും വിനോദസഞ്ചാരികൾക്കും ആശ്വാസമായി എയർ ഇന്ത്യ എക്സ്പ്രസിന്റെ പുതിയ നോൺ-സ്റ്റോപ്പ് വിമാന സർവീസുകൾ വരുന്നു. ഹൈദരാബാദിൽ നിന്ന് ദുബായിലേക്കുള്ള ഈ നേരിട്ടുള്ള സർവീസുകൾ 2026 മാർച്ച് 29 മുതലാണ് ആരംഭിക്കുന്നത്. എയർ ഇന്ത്യയുടെ ആഗോള പുനസംഘടനയുടെ ഭാഗമായി മിഡിൽ ഈസ്റ്റ് റൂട്ടുകളിലെ ഭൂരിഭാഗം സർവീസുകളും എയർ ഇന്ത്യ എക്സ്പ്രസിന് കീഴിലേക്ക് മാറ്റുന്നതിന്റെ ഭാഗമായാണ് ഈ പുതിയ തീരുമാനം. ഹൈദരാബാദിൽ നിന്ന് നിലവിൽ ഷാർജ, മസ്കത്ത്, ജിദ്ദ ഉൾപ്പെടെയുള്ള നഗരങ്ങളിലേക്ക് സർവീസ് നടത്തുന്ന എയർലൈനിന്റെ വളർച്ചയിൽ ഈ പുതിയ റൂട്ട് വലിയൊരു നാഴികക്കല്ലായി മാറും.
യാത്രക്കാർക്ക് കുറഞ്ഞ നിരക്കിൽ ടിക്കറ്റുകൾ ലഭ്യമാക്കുന്നതിനൊപ്പം വിമാനത്തിനുള്ളിൽ ‘ഗോർമയർ’ എന്ന പേരിൽ 500 രൂപ മുതൽ ആരംഭിക്കുന്ന വൈവിധ്യമാർന്ന ഭക്ഷണങ്ങളും പ്രീ-ബുക്ക് ചെയ്യാവുന്നതാണ്. ഈ പുതിയ റൂട്ട് വരുന്നതോടെ മത്സരമുണ്ടാകുകയും ടിക്കറ്റ് നിരക്കിൽ വലിയ കുറവുണ്ടാകുകയും ചെയ്യുമെന്നാണ് പ്രവാസികളുടെ പ്രതീക്ഷ. നിലവിൽ എയർ ഇന്ത്യ എക്സ്പ്രസ് വിവിധ റൂട്ടുകളിൽ പ്രഖ്യാപിച്ചിട്ടുള്ള പ്രത്യേക ഇളവുകൾ യാത്രക്കാർക്ക് കൂടുതൽ ലാഭകരമായ യാത്രകൾക്ക് അവസരമൊരുക്കുന്നുണ്ട്. മിഡിൽ ഈസ്റ്റിലേക്കുള്ള കണക്റ്റിവിറ്റി വർദ്ധിപ്പിക്കുന്നതിലൂടെ പ്രവാസികളുടെ യാത്രാക്ലേശം ഒരു പരിധിവരെ കുറയ്ക്കാൻ ഈ നീക്കം സഹായിക്കും.
The post ഹൈദരാബാദിൽ നിന്ന് ദുബായിലേക്ക് ഇനി കുറഞ്ഞ ചെലവിൽ പറക്കാം; പുതിയ സർവീസുകളുമായി എയർ ഇന്ത്യ എക്സ്പ്രസ് appeared first on Express Kerala.