ടി20 ലോകകപ്പ് 2026-ലെ ആവേശകരമായ സൂപ്പർ 8 പോരാട്ടങ്ങൾക്കായി ക്രിക്കറ്റ് ലോകം ഒരുങ്ങുന്നു. ചിരവൈരികളായ പാകിസ്ഥാനെ തകർത്ത് അപരാജിത കുതിപ്പ് തുടരുന്ന ടീം ഇന്ത്യ, ഗ്രൂപ്പ് ഘട്ടത്തിൽ നെതർലൻഡ്സിനെതിരായ മത്സരം ബാക്കിനിൽക്കെത്തന്നെ സൂപ്പർ 8 യോഗ്യത ഉറപ്പാക്കിക്കഴിഞ്ഞു. സൂപ്പർ 8-ൽ ‘ഗ്രൂപ്പ് എക്സി’ലാണ് ഇന്ത്യ സ്ഥാനം പിടിച്ചിരിക്കുന്നത്. ദക്ഷിണാഫ്രിക്ക, വെസ്റ്റ് ഇൻഡീസ്, സിംബാബ്വെ എന്നിവരാണ് ഈ ഗ്രൂപ്പിൽ ഇന്ത്യയുടെ കരുത്തരായ എതിരാളികൾ.
സൂപ്പർ 8-ൽ ഇന്ത്യയുടെ ആദ്യ അങ്കം ഫെബ്രുവരി 22-ന് അഹമ്മദാബാദിലെ നരേന്ദ്ര മോദി സ്റ്റേഡിയത്തിൽ നടക്കും. കഴിഞ്ഞ ടി20 ലോകകപ്പ് ഫൈനലിന്റെ ആവർത്തനമെന്നോണം ദക്ഷിണാഫ്രിക്കയാണ് ഇന്ത്യയുടെ എതിരാളികൾ. പ്രോട്ടീസിനെതിരായ കഴിഞ്ഞ ടി20 പരമ്പരയിൽ 4-1 എന്ന നിലയിൽ ആധികാരിക ജയം നേടിയ ആത്മവിശ്വാസത്തിലാണ് ഇന്ത്യയെങ്കിലും ലോകവേദിയിൽ ദക്ഷിണാഫ്രിക്ക ഉയർത്തുന്ന വെല്ലുവിളി ചെറുതാകില്ല. രാത്രി 7 മണിക്കാണ് ഈ പോരാട്ടം ആരംഭിക്കുക.
Also Read:ഇന്ത്യയോടേറ്റ പ്രഹരം; ബാബറും ഷഹീനും പുറത്തേക്കോ? പാകിസ്ഥാന് ഇന്ന് ജീവൻമരണ പോരാട്ടം
തുടർന്ന് ഫെബ്രുവരി 26-ന് ചെന്നൈയിലെ ചെപ്പോക്ക് സ്റ്റേഡിയത്തിൽ വെച്ച് ഇന്ത്യ അട്ടിമറി വീരന്മാരായ സിംബാബ്വെയെ നേരിടും. സ്പിന്നിനെ തുണയ്ക്കുന്ന ചെപ്പോക്കിലെ പിച്ചിൽ ഓസ്ട്രേലിയയെപ്പോലും വീഴ്ത്തിയ സിംബാബ്വെയെ ഇന്ത്യക്ക് നിസ്സാരമായി കാണാനാവില്ല. മാർച്ച് ഒന്നിന് കൊൽക്കത്തയിലെ ഈഡൻ ഗാർഡൻസിൽ വെസ്റ്റ് ഇൻഡീസിനെതിരെയാണ് ഇന്ത്യയുടെ ഗ്രൂപ്പ് ഘട്ടത്തിലെ അവസാന സൂപ്പർ 8 മത്സരം.
അതേസമയം, ആരാധകർ ഉറ്റുനോക്കുന്ന ഇന്ത്യ-പാക് പോരാട്ടം ഇനി സെമിഫൈനലിലോ ഫൈനലിലോ മാത്രമേ സംഭവിക്കാൻ സാധ്യതയുള്ളൂ. ഇതിനായി പാകിസ്ഥാൻ ആദ്യം സൂപ്പർ 8-ലേക്ക് യോഗ്യത നേടേണ്ടതുണ്ട്. പാകിസ്ഥാൻ സൂപ്പർ 8-ൽ എത്തുകയും ഇന്ത്യയും പാകിസ്ഥാനും തങ്ങളുടെ ഗ്രൂപ്പുകളിൽ ആദ്യ രണ്ട് സ്ഥാനങ്ങളിൽ വരികയും ചെയ്താൽ സെമിയിൽ മറ്റൊരു ക്ലാസിക് പോരാട്ടം കാണാം. അങ്ങനെയൊരു സെമിഫൈനൽ പോരാട്ടം വന്നാൽ നിഷ്പക്ഷ വേദിയായ ശ്രീലങ്കയിലായിരിക്കും മത്സരം നടക്കുക.
The post പടയൊരുക്കി ടീം ഇന്ത്യ! അഹമ്മദാബാദിൽ ദക്ഷിണാഫ്രിക്കയുമായി ആദ്യ പോര്; സൂപ്പർ 8 മത്സരക്രമം പുറത്ത് appeared first on Express Kerala.