ആക്ഷൻ കിംഗ് അർജുൻ സർജ സംവിധാനം ചെയ്ത ബഹുഭാഷാ ചിത്രം ‘സീതാ പയനം’ ബോക്സോഫീസിൽ തകർപ്പൻ കുതിപ്പ് തുടരുന്നു. റിലീസ് ചെയ്ത് വെറും നാല് ദിവസത്തിനുള്ളിൽ ഒമ്പത് കോടി രൂപയുടെ ആഗോള ഗ്രോസ് കളക്ഷനാണ് ചിത്രം സ്വന്തമാക്കിയത്. പ്രണയത്തിനും കുടുംബബന്ധങ്ങൾക്കും പ്രാധാന്യം നൽകുന്ന ഈ റൊമാന്റിക് ഡ്രാമ ഒരേസമയം പ്രേക്ഷകരുടെയും നിരൂപകരുടെയും പ്രശംസ പിടിച്ചുപറ്റിയിരിക്കുകയാണ്. അർജുൻ സർജയും മകൾ ഐശ്വര്യ അർജുനും ആദ്യമായി ഒന്നിച്ചഭിനയിക്കുന്നു എന്ന പ്രത്യേകതയും ഈ ചിത്രത്തിനുണ്ട്. കേരളത്തിൽ ശ്രീ ഗോകുലം മൂവീസിന്റെ ബാനറിൽ ഗോകുലം ഗോപാലനാണ് ചിത്രം വിതരണത്തിനെത്തിച്ചത്.
Also Read: ബോക്സ് ഓഫീസിനെ വിറപ്പിക്കാൻ ‘ലോക 2’; നിർണ്ണായക വെളിപ്പെടുത്തലുമായി കല്യാണി പ്രിയദർശൻ
നീണ്ട ഇടവേളയ്ക്ക് ശേഷം ഐശ്വര്യ അർജുൻ വെള്ളിത്തിരയിലേക്ക് തിരിച്ചെത്തുന്ന ചിത്രത്തിൽ നിരഞ്ജൻ സുധീന്ദ്രയാണ് നായകനായി വേഷമിടുന്നത്. കന്നഡ ആക്ഷൻ സൂപ്പർ സ്റ്റാർ ധ്രുവ സർജ അതിഥി വേഷത്തിലെത്തുന്നു എന്നതും ആരാധകരെ ആവേശത്തിലാഴ്ത്തുന്നു. പ്രകാശ് രാജ്, സത്യരാജ്, കോവൈ സരള തുടങ്ങിയ വമ്പൻ താരനിരയാണ് ചിത്രത്തിന്റെ മറ്റൊരു ആകർഷണം. സുമിത്ര, പോസാനി കൃഷ്ണ മൂർത്തി, ബിത്തിരി സതി, സിരി ഹനുമന്ത് തുടങ്ങി തെന്നിന്ത്യയിലെ പ്രമുഖ താരങ്ങളെല്ലാം ഈ ചിത്രത്തിൽ അണിനിരക്കുന്നുണ്ട്. ഡ്രീം ബിഗ് ഫിലിംസാണ് കേരളത്തിലെ തിയേറ്ററുകളിൽ ചിത്രം പ്രദർശനത്തിനെത്തിച്ചത്.
ചിത്രത്തിന്റെ തിരക്കഥയും സംവിധാനവും അർജുൻ സർജ തന്നെയാണ് നിർവഹിച്ചിരിക്കുന്നത്. അനൂപ് റൂബൻസ് ഒരുക്കിയ സംഗീതവും ജി. ബാലമുരുകന്റെ ഛായാഗ്രഹണവും ചിത്രത്തിന് കരുത്തേകുന്നു. അയൂബ് ഖാനാണ് ചിത്രത്തിന്റെ എഡിറ്റിംഗ് കൈകാര്യം ചെയ്തിരിക്കുന്നത്. പട്ടത്ത് യാനൈ, പ്രേമ ബാരാഹ തുടങ്ങിയ ചിത്രങ്ങളിലൂടെ ശ്രദ്ധേയയായ ഐശ്വര്യ അർജുന്റെ മികച്ച പ്രകടനം ചിത്രത്തിന് കൂടുതൽ മാറ്റുകൂട്ടുന്നു. പ്രതീഷ് ശേഖറാണ് ചിത്രത്തിന്റെ പി ആർ ഓ. വരും ദിവസങ്ങളിലും ചിത്രം വലിയ കളക്ഷൻ നേടുമെന്നാണ് സിനിമാ ലോകത്തെ വിലയിരുത്തൽ.
The post നാല് ദിനത്തിൽ ഒമ്പത് കോടി; ബോക്സോഫീസ് കീഴടക്കി ‘സീതാ പയനം’! appeared first on Express Kerala.