ആരോഗ്യകരമായ പ്രഭാതഭക്ഷണത്തിന് ഏറ്റവും അനുയോജ്യമായ ഒന്നാണ് മുട്ട. പേശികളുടെ വളർച്ചയ്ക്കും തലച്ചോറിന്റെ പ്രവർത്തനത്തിനും ആവശ്യമായ പ്രോട്ടീൻ, അമിനോ ആസിഡുകൾ, വിറ്റാമിൻ എ, ഡി, ഇ, ബി 12 എന്നിവയാൽ സമ്പന്നമാണ് മുട്ട. മുട്ടയുടെ മഞ്ഞക്കരു കണ്ണുകളുടെയും തലച്ചോറിന്റെയും ആരോഗ്യത്തിന് ഗുണകരമാകുമ്പോൾ, വെള്ള കൊളസ്ട്രോൾ രഹിതമായ പ്രോട്ടീൻ പ്രദാനം ചെയ്യുന്നു. എന്നാൽ മുട്ടയുടെ ഗുണങ്ങൾ പൂർണ്ണമായി ലഭിക്കുന്നതിന് അത് കൃത്യമായ അളവിൽ കഴിക്കേണ്ടത് പ്രധാനമാണ്.
അസ്ഥികളുടെ ആരോഗ്യത്തിൽ മുട്ട വരുത്തുന്ന വിസ്മയകരമായ മാറ്റങ്ങളെക്കുറിച്ച് ‘ഫുഡ് ആൻഡ് ഫംഗ്ഷൻ’ ജേണലിൽ പ്രസിദ്ധീകരിച്ച പഠനം വ്യക്തമാക്കുന്നു. മുട്ട പൂർണ്ണമായും ഒഴിവാക്കുന്നവരേക്കാൾ ദിവസവും ഒന്നര മുട്ട വീതം കഴിക്കുന്നവർക്ക് അസ്ഥിസാന്ദ്രത കൂടുതലാണെന്ന് ഏകദേശം 19,000 ആളുകളിൽ നടത്തിയ പഠനം വെളിപ്പെടുത്തുന്നു. നട്ടെല്ലിലെയും തുടയെല്ലിലെയും അസ്ഥിസാന്ദ്രത വർദ്ധിപ്പിക്കാൻ മുട്ടയിലെ പോഷകങ്ങൾ സഹായിക്കുന്നുണ്ട്. പ്രത്യേകിച്ച് പ്രായമായവരിൽ അസ്ഥികൾക്ക് കരുത്ത് പകരാൻ മുട്ട പതിവായി ഭക്ഷണത്തിൽ ഉൾപ്പെടുത്തുന്നത് നല്ലതാണ്.
Also Read: ദിവസവും 3 മണിക്കൂർ വെറുതെ ചിന്തിച്ചു കളയുന്നു! ഇന്ത്യക്കാരെ തളർത്തുന്ന ‘ഓവർതിങ്കിങ്’ എന്ന വില്ലൻ
സാധാരണക്കാർക്ക് ദിവസവും ഒന്നോ രണ്ടോ മുട്ടകൾ സുരക്ഷിതമായി കഴിക്കാമെന്നാണ് പോഷകാഹാര വിദഗ്ധർ നിർദ്ദേശിക്കുന്നത്. ഇത് കൊളസ്ട്രോളിനെ ദോഷകരമായി ബാധിക്കാതെ തന്നെ ശരീരത്തിന് ആവശ്യമായ ഊർജ്ജവും പോഷകങ്ങളും നൽകുന്നു. എന്നാൽ അമിതവണ്ണമോ ഉയർന്ന കൊളസ്ട്രോളോ ഉള്ളവർ മുട്ട കഴിക്കുമ്പോൾ ശ്രദ്ധിക്കണം. ഇക്കൂട്ടർ മുട്ട പൂർണ്ണമായും ഒഴിവാക്കുന്നതിന് പകരം രണ്ട് മുട്ടയുടെ വെള്ളയും ഒരു മഞ്ഞക്കരുവും മാത്രം കഴിക്കുന്നത് ആരോഗ്യകരമായ ബാലൻസ് നിലനിർത്താൻ സഹായിക്കും.
The post ദിവസവും ഒന്നര മുട്ട കഴിച്ചാൽ അസ്ഥികൾക്ക് വജ്രായുധം; അസ്ഥിസാന്ദ്രത വർദ്ധിപ്പിക്കുമെന്ന് പുതിയ പഠനം appeared first on Express Kerala.