2026 ടി20 ലോകകപ്പിന്റെ ആവേശകരമായ സൂപ്പർ 8 പോരാട്ടങ്ങൾക്ക് തുടക്കമാകുമ്പോൾ, നാളെ നടക്കാനിരിക്കുന്ന ഇന്ത്യ-ദക്ഷിണാഫ്രിക്ക മത്സരത്തിന് മുന്നോടിയായി മൈൻഡ് ഗെയിമുമായി ദക്ഷിണാഫ്രിക്കൻ പരിശീലകൻ ഷുക്രി കൊണാർഡ്. അഹമ്മദാബാദിലെ നരേന്ദ്ര മോദി സ്റ്റേഡിയത്തിൽ പതിനായിരക്കണക്കിന് ആരാധകർക്ക് മുന്നിൽ കളിക്കുമ്പോൾ സമ്മർദ്ദം പൂർണ്ണമായും ഇന്ത്യയ്ക്കായിരിക്കുമെന്നും അത് തങ്ങൾക്ക് അനുകൂലമാകുമെന്നും അദ്ദേഹം അഭിപ്രായപ്പെട്ടു.
ഇന്ത്യൻ ടീം എപ്പോഴും ആരാധകരുടെ കടുത്ത നിരീക്ഷണത്തിലാണെന്നും സെമി ഫൈനലിലും ഫൈനലിലും എത്തണമെന്ന വലിയ പ്രതീക്ഷകൾ അവർക്ക് മേൽ കടുത്ത മാനസിക സമ്മർദ്ദം ചെലുത്തുന്നുണ്ടെന്നും കൊണാർഡ് ചൂണ്ടിക്കാട്ടി. അഹമ്മദാബാദിൽ ഈ സമ്മർദ്ദത്തിൽ ഇന്ത്യ അടിപതറുന്ന സാഹചര്യം സൃഷ്ടിക്കാനാണ് തങ്ങൾ ശ്രമിക്കുന്നതെന്നും അദ്ദേഹം വ്യക്തമാക്കി.
Also Read: അഭിഷേക് തന്നെ ഓപ്പണർ!’അവൻ ലോകോത്തര താരം, തിരിച്ചുവരും’; നിലപാട് വ്യക്തമാക്കി മോണി മോർക്കൽ
ഇന്ത്യൻ നിരയിൽ തുടർച്ചയായി മൂന്ന് മത്സരങ്ങളിൽ പൂജ്യത്തിന് പുറത്തായ അഭിഷേക് ശർമയെ ലക്ഷ്യം വെച്ചും പ്രോട്ടീസ് പരിശീലകൻ സംസാരിച്ചു. ടീമിലെ സ്ഥാനം നിലനിർത്താൻ നാളെ മികച്ച പ്രകടനം നടത്തിയേ തീരൂ എന്ന അവസ്ഥയിലുള്ള താരം തങ്ങളേക്കാൾ വലിയ സമ്മർദ്ദത്തിലായിരിക്കും മൈതാനത്തിറങ്ങുകയെന്ന് അദ്ദേഹം പരിഹസിച്ചു.
കഴിഞ്ഞ വർഷത്തെ ഇന്ത്യൻ പര്യടനത്തിലൂടെ അഹമ്മദാബാദിലെ സാഹചര്യങ്ങൾ തങ്ങൾക്ക് പരിചിതമാണെന്നും അദ്ദേഹം കൂട്ടിച്ചേർത്തു. ഗ്രൂപ്പ് ഘട്ടത്തിൽ തോൽവി അറിയാതെയാണ് സൂര്യയും സംഘവും സൂപ്പർ 8-ലേക്ക് പ്രവേശിച്ചത്. എന്നാൽ വെസ്റ്റ് ഇൻഡീസ്, സിംബാബ്വെ, ദക്ഷിണാഫ്രിക്ക തുടങ്ങിയ കരുത്തർ അടങ്ങിയ ഗ്രൂപ്പിൽ ഇന്ത്യയ്ക്ക് കാര്യങ്ങൾ എളുപ്പമാകില്ല. പ്രത്യേകിച്ച്, കഴിഞ്ഞ മൂന്ന് ലോകകപ്പ് മത്സരങ്ങളിലും റൺസൊന്നുമെടുക്കാൻ കഴിയാത്ത ഓപ്പണർ അഭിഷേക് ശർമയുടെ ഫോം ഇന്ത്യയ്ക്ക് വലിയ തലവേദനയാണ് സൃഷ്ടിക്കുന്നത്.
The post ഇന്ത്യയ്ക്ക് മേൽ കടുത്ത സമ്മർദ്ദം! അഹമ്മദാബാദിൽ വിറയ്ക്കും; ദക്ഷിണാഫ്രിക്കൻ പരിശീലകൻ ഷുക്രി കൊണാർഡ് appeared first on Express Kerala.