കൊച്ചി വൈറ്റില മേൽപ്പാലത്തിന് താഴെയുള്ള റെയിൽവേ ട്രാക്കിൽ കോട്ടയം ചിങ്ങവനം സ്വദേശിനി സുധാ ബേബിയെ കൊല്ലപ്പെട്ട നിലയിൽ കണ്ടെത്തിയ സംഭവത്തിൽ പ്രതി പിടിയിലായി. സുധയുടെ കുടുംബസുഹൃത്തും ഹൈക്കോടതിയിലെ റിട്ടയേർഡ് ഉദ്യോഗസ്ഥനുമായ ഷാജിയെയാണ് മരട് പൊലീസ് കസ്റ്റഡിയിലെടുത്തത്. സുധയുടെ അമ്മയോടൊപ്പം ഹൈക്കോടതിയിൽ ജോലി ചെയ്തിരുന്ന ഇയാൾക്ക് കുടുംബവുമായി വർഷങ്ങളായുള്ള ബന്ധമുണ്ട്. ഇരുവരും തമ്മിലുണ്ടായ വാക്കുതർക്കമാണ് കൊലപാതകത്തിൽ കലാശിച്ചതെന്നാണ് പൊലീസിന്റെ പ്രാഥമിക നിഗമനം.
ഇന്ന് പുലർച്ചെ നാലരയോടെ വൈറ്റില വഴി കടന്നുപോയ അമൃത എക്സ്പ്രസിന്റെ ലോക്കോ പൈലറ്റാണ് മൃതദേഹം ആദ്യം കണ്ടത്. റെയിൽവേ ട്രാക്കിന് സമീപം മുഖത്ത് പരിക്കേറ്റ നിലയിലും ശരീരത്തിൽ രക്തക്കറകളോടെയുമാണ് മൃതദേഹം കിടന്നിരുന്നത്. നിലവിൽ സർവീസ് ഇല്ലാത്ത ട്രാക്കിലാണ് മൃതദേഹം കണ്ടെത്തിയത് എന്നത് പൊലീസിന്റെ സംശയം വർദ്ധിപ്പിച്ചു. തുടർന്ന് നടത്തിയ ഇൻക്വസ്റ്റ് നടപടികൾക്ക് ശേഷം കൊലപാതകമാണെന്ന് പൊലീസ് സ്ഥിരീകരിക്കുകയായിരുന്നു. മൃതദേഹത്തിന് സമീപത്ത് നിന്ന് കണ്ടെത്തിയ മൊബൈൽ സിം കാർഡ് കേന്ദ്രീകരിച്ച് നടത്തിയ അന്വേഷണമാണ് മരിച്ചത് സുധയാണെന്ന് തിരിച്ചറിയാൻ സഹായിച്ചത്.
Also Read: സ്വത്ത് ലിവ്-ഇൻ പങ്കാളിക്ക് നൽകുമെന്ന് ഭയം; ബെംഗളൂരുവിൽ സഹോദരിയെ കൊലപ്പെടുത്തി യുവതിയും മകനും
പ്രതിയെ കണ്ടെത്തുന്നതിൽ സിസിടിവി ദൃശ്യങ്ങൾ നിർണ്ണായകമായി. സുധയും ഷാജിയും കാറിൽ നിന്നിറങ്ങി ട്രാക്കിന് സമീപത്തേക്ക് നടന്നുപോകുന്നതും, പിന്നീട് ഷാജി ഒറ്റയ്ക്ക് മടങ്ങിവരുന്നതുമായ ദൃശ്യങ്ങൾ പൊലീസിന് ലഭിച്ചിട്ടുണ്ട്. വർഷങ്ങളായുള്ള സൗഹൃദത്തിനിടെ അടുത്തകാലത്തുണ്ടായ ചില തർക്കങ്ങളാണ് കൊലപാതകത്തിന് കാരണമെന്ന് ഷാജി പൊലീസിനോട് സമ്മതിച്ചു. തലയ്ക്കേറ്റ ഗുരുതരമായ പരിക്കാണ് മരണകാരണമെന്നാണ് പ്രാഥമിക നിഗമനം.
അമ്മയുടെ ചികിത്സയ്ക്കായി കൊച്ചിയിൽ താമസിച്ചുവരികയായിരുന്നു സുധ. നിലവിൽ മൃതദേഹം പോസ്റ്റ്മോർട്ടം നടപടികൾക്കായി മാറ്റിയിരിക്കുകയാണ്. പോസ്റ്റ്മോർട്ടം റിപ്പോർട്ട് ലഭിച്ചാലുടൻ ഷാജിയുടെ അറസ്റ്റ് ഔദ്യോഗികമായി രേഖപ്പെടുത്തുമെന്ന് പൊലീസ് അറിയിച്ചു. കൊലപാതകത്തിന് പിന്നിൽ മറ്റ് കാരണങ്ങളുണ്ടോ എന്നും കൂടുതൽ പേർക്ക് പങ്കുണ്ടോ എന്നും പൊലീസ് വിശദമായി പരിശോധിച്ചുവരികയാണ്.
The post റെയിൽവേ ട്രാക്കിൽ മൃതദേഹം; സുധയെ കൊലപ്പെടുത്തിയത് കുടുംബസുഹൃത്തെന്ന് പൊലീസ് appeared first on Express Kerala.