തെന്നിന്ത്യൻ സിനിമാ ലോകം ഏറെ ആകാംക്ഷയോടെ കാത്തിരിക്കുന്ന രാം ചരൺ ചിത്രം ‘പെഡ്ഡി’യിലെ രണ്ടാമത്തെ ഗാനം പുറത്തിറങ്ങി. ഓസ്കാർ ജേതാവ് എ.ആർ. റഹ്മാൻ ഈണം നൽകിയ ‘ചന്ദാമാമാ..’ എന്ന് തുടങ്ങുന്ന മനോഹരമായ മെലഡിയാണ് അണിയറപ്രവർത്തകർ പുറത്തുവിട്ടത്. കയ്യിൽ ക്രിക്കറ്റ് ബാറ്റുമായി രാം ചരൺ അവതരിപ്പിക്കുന്ന ഗംഭീര നൃത്തരംഗങ്ങളാണ് ഈ പാട്ടിന്റെ പ്രധാന ആകർഷണം. ജാനി മാസ്റ്റർ കൊറിയോഗ്രഫി നിർവഹിച്ച ഈ നൃത്തച്ചുവടുകൾ ഇതിനോടകം തന്നെ സോഷ്യൽ മീഡിയയിൽ തരംഗമായി മാറിക്കഴിഞ്ഞു. നായിക ജാൻവി കപൂറിനൊപ്പം സംഗീത സംവിധായകൻ എ.ആർ. റഹ്മാനും ഗാനരംഗത്തിൽ പ്രത്യക്ഷപ്പെടുന്നു എന്നത് ആരാധകർക്ക് ഇരട്ടി മധുരമായി.
Also Read: ‘എൽ ജഗദമ്മ ഏഴാം ക്ലാസ് ബി’ ഫെബ്രുവരിയിൽ തിയറ്ററുകളിലേക്ക്
ദേശീയ അവാർഡ് ജേതാവ് ബുചി ബാബു സന സംവിധാനം ചെയ്യുന്ന ഈ ബിഗ് ബഡ്ജറ്റ് ചിത്രം 2026 മാർച്ച് 27-നാണ് ആഗോളതലത്തിൽ റിലീസ് ചെയ്യുന്നത്. ‘അച്ചിയമ്മ’ എന്ന ശ്രദ്ധേയമായ കഥാപാത്രമായാണ് ജാൻവി കപൂർ ചിത്രത്തിലെത്തുന്നത്. കന്നഡ സൂപ്പർ താരം ശിവരാജ് കുമാർ, ജഗപതി ബാബു, ബോളിവുഡ് താരം ദിവ്യേന്ദു തുടങ്ങിയ വൻ താരനിര തന്നെ ചിത്രത്തിൽ അണിനിരക്കുന്നുണ്ട്. ഇതുവരെ കാണാത്ത ലുക്കിലും മാസ്സ് അവതാരത്തിലുമാണ് രാം ചരൺ ഈ ചിത്രത്തിൽ പ്രത്യക്ഷപ്പെടുന്നത് എന്ന സൂചനകൾ സിനിമയെക്കുറിച്ചുള്ള പ്രതീക്ഷകൾ വർധിപ്പിക്കുന്നു. സ്പോർട്സ് ഡ്രാമ പശ്ചാത്തലത്തിൽ ഒരുങ്ങുന്ന ചിത്രത്തിനായി രത്നവേലു ക്യാമറയും നവീൻ നൂലി എഡിറ്റിംഗും നിർവഹിക്കുന്നു.
വൃദ്ധി സിനിമാസിന്റെ ബാനറിൽ വെങ്കട സതീഷ് കിലാരു നിർമ്മിക്കുന്ന ചിത്രം മൈത്രി മൂവി മേക്കേഴ്സും സുകുമാർ റൈറ്റിംഗ്സും ചേർന്നാണ് അവതരിപ്പിക്കുന്നത്. അത്യാധുനിക സാങ്കേതിക വിദ്യകളുടെ സഹായത്തോടെ ഒരുക്കുന്ന ‘പെഡ്ഡി’ രാം ചരണിന്റെ കരിയറിലെ തന്നെ ഏറ്റവും വലിയ പ്രോജക്റ്റുകളിൽ ഒന്നാണ്. ഇഷാൻ സക്സേന (കോ-പ്രൊഡ്യൂസർ), വി. വൈ. പ്രവീൺ കുമാർ (എക്സിക്യൂട്ടീവ് പ്രൊഡ്യൂസർ), അവിനാഷ് കൊല്ല (പ്രൊഡക്ഷൻ ഡിസൈൻ) എന്നിവരാണ് മറ്റ് അണിയറ പ്രവർത്തകർ. ഫസ്റ്റ് ഷോ മാർക്കറ്റിംഗും ശബരി പി.ആർ.ഒയുമായി പ്രവർത്തിക്കുന്ന ചിത്രം ബോക്സ് ഓഫീസിൽ പുതിയ ചരിത്രം കുറിക്കുമെന്നാണ് വിലയിരുത്തപ്പെടുന്നത്.
The post രാം ചരണിന്റെ തകർപ്പൻ ചുവടുകളുമായി ‘ചന്ദാമാമാ..’; റഹ്മാൻ മാന്ത്രികതയിൽ ‘പെഡ്ഡി’ ഒരുങ്ങുന്നു! appeared first on Express Kerala.