2026 ടി20 ലോകകപ്പിലെ സെമിഫൈനൽ പോരാട്ടങ്ങൾക്ക് ആവേശം പകർന്ന് സൂപ്പർ എട്ട് ഘട്ടത്തിലെ നിർണായക മത്സരത്തിൽ ഇന്ന് ആതിഥേയരായ ശ്രീലങ്ക ന്യൂസിലൻഡിനെ നേരിടും. കൊളംബോയിലെ ആർ. പ്രേമദാസ സ്റ്റേഡിയത്തിൽ വൈകീട്ട് 7 മണിക്കാണ് ഈ പോരാട്ടം നടക്കുന്നത്. ഇരു ടീമുകൾക്കും സെമി പ്രതീക്ഷ നിലനിർത്താൻ ഇന്ന് വിജയം അനിവാര്യമാണ്.
പാകിസ്ഥാനെതിരായ ആദ്യ സൂപ്പർ എട്ട് മത്സരം മഴയെത്തുടർന്ന് ഉപേക്ഷിച്ചതിനാൽ ഒരു പോയിന്റുമായാണ് ന്യൂസിലൻഡ് ഇറങ്ങുന്നത്. ഗ്രൂപ്പ് ഘട്ടത്തിൽ മിന്നും പ്രകടനം കാഴ്ചവെച്ച കിവികൾക്ക്, ലങ്കയെ അവരുടെ തട്ടകത്തിൽ വീഴ്ത്താനായാൽ സെമി പ്രവേശനം എളുപ്പമാകും. ഗ്രൂപ്പ് ഘട്ടത്തിലെ മൂന്ന് വിജയങ്ങളുടെ ആത്മവിശ്വാസം അവർക്കുണ്ട്.
Also Read: ഇംഗ്ലണ്ടിനോട് തോറ്റു, പാകിസ്ഥാൻ പുറത്തേക്കോ? സെമിയിലെത്താൻ ഇനി അത്ഭുതങ്ങൾ സംഭവിക്കണം
മറുഭാഗത്ത്, ഇംഗ്ലണ്ടിനോടേറ്റ അപ്രതീക്ഷിത തോൽവിയുടെ ആഘാതത്തിലാണ് ആതിഥേയരായ ശ്രീലങ്ക. പല്ലക്കല്ലെയിൽ നടന്ന ആദ്യ സൂപ്പർ എട്ട് മത്സരത്തിൽ ഇംഗ്ലണ്ട് ഉയർത്തിയ 147 റൺസ് എന്ന ചെറിയ ലക്ഷ്യം പോലും മറികടക്കാൻ ലങ്കൻ ബാറ്റർമാർക്ക് സാധിച്ചിരുന്നില്ല. ബാറ്റിംഗ് നിരയിലെ പിഴവുകൾ തിരുത്തി വിജയവഴിയിൽ തിരിച്ചെത്താനാണ് ലങ്കൻ ടീം ലക്ഷ്യമിടുന്നത്. ഹോം ഗ്രൗണ്ടിന്റെ ആനുകൂല്യം മുതലാക്കി ലങ്കൻ കരുത്തുകാട്ടുമോ അതോ കിവികൾ സെമിയിലേക്ക് ഒരു ചുവട് കൂടി അടുപ്പിക്കുമോ എന്നാണ് ക്രിക്കറ്റ് ലോകം ഉറ്റുനോക്കുന്നത്.
The post സെമി പോരാട്ടം മുറുകുന്നു; ഇന്ന് ശ്രീലങ്കയ്ക്ക് മുന്നിൽ കിവി വെല്ലുവിളി! appeared first on Express Kerala.