ടി20 ലോകകപ്പിലെ അതിനിർണായകമായ മത്സരത്തിൽ ഇന്ത്യ ഇന്ന് സിംബാബ്വെയെ നേരിടും. ചെന്നൈയിലെ ഐതിഹാസികമായ ചെപ്പോക്ക് സ്റ്റേഡിയത്തിൽ വൈകിട്ട് ഏഴ് മണിക്കാണ് മത്സരം ആരംഭിക്കുന്നത്. കഴിഞ്ഞ മത്സരത്തിൽ ദക്ഷിണാഫ്രിക്കയോട് ഏറ്റ അപ്രതീക്ഷിത തോൽവിയും നെറ്റ് റൺറേറ്റിലെ ഇടിവും ഇന്ത്യൻ ക്യാമ്പിൽ വലിയ ആശങ്കയുണ്ടാക്കിയിട്ടുണ്ട്. സെമി ഫൈനൽ സാധ്യതകൾ സജീവമായി നിലനിർത്താൻ ഇന്ന് സിംബാബ്വെയ്ക്കെതിരെ വലിയൊരു വിജയം തന്നെ സൂര്യകുമാറിനും സംഘത്തിനും അനിവാര്യമാണ്.
ടോപ്പ് ഓർഡറിലെ തുടർച്ചയായ പരാജയങ്ങൾ ഇന്ത്യൻ ടീമിനെ വലിയ രീതിയിൽ ബാധിച്ചിട്ടുണ്ട്. ഇടംകയ്യൻ ബാറ്റർമാർ കൂടുതലുള്ള നിലവിലെ ബാറ്റിംഗ് ക്രമത്തിൽ മാറ്റം വരുത്തുന്നതിന്റെ ഭാഗമായി മലയാളി താരം സഞ്ജു സാംസണെ പ്ലെയിങ് ഇലവനിലേക്ക് തിരികെ കൊണ്ടുവരാൻ ടീം മാനേജ്മെന്റ് ആലോചിക്കുന്നു. മോശം ഫോമിലുള്ള തിലക് വർമ്മയ്ക്ക് പകരം സഞ്ജുവിന് അവസരം നൽകിയാൽ അത് ബാറ്റിംഗിന് കൂടുതൽ കരുത്ത് പകരുമെന്നാണ് കരുതപ്പെടുന്നത്. യുവതാരം അഭിഷേക് ശർമ്മയ്ക്ക് മാനേജ്മെന്റ് പരസ്യമായി പിന്തുണ നൽകുന്നുണ്ടെങ്കിലും ഇന്നത്തെ മത്സരത്തിൽ അദ്ദേഹം എങ്ങനെ തിളങ്ങും എന്നത് നിർണ്ണായകമാകും.
Also Read: ടി20 ലോകകപ്പ്! ലങ്കയെ തകർത്തെറിഞ്ഞ് കിവികൾ; സെമി സ്വപ്നങ്ങൾക്ക് ചിറകുമുളച്ചു!
ചെപ്പോക്കിലെ പിച്ചിൽ സ്പിന്നർമാർക്ക് ലഭിക്കുന്ന മുൻതൂക്കം കണക്കിലെടുത്ത് ബൗളിംഗ് നിരയിൽ മാറ്റങ്ങൾ ഉണ്ടായേക്കാം. വരുൺ ചക്രവർത്തിയോടൊപ്പം കുൽദീപ് യാദവിനെ കൂടി ഉൾപ്പെടുത്താനുള്ള ആലോചനകൾ നടക്കുന്നുണ്ടെങ്കിലും ഇത് ബാറ്റിംഗ് ആഴത്തെ ബാധിക്കുമോ എന്ന ആശങ്ക ടീമിനുണ്ട്.
The post സഞ്ജു സാംസൺ തിരിച്ചെത്തിയേക്കും! ചെന്നൈയിൽ സിംബാബ്വെയെ നേരിടാൻ ടീം ഇന്ത്യ appeared first on Express Kerala.