കണ്ണൂരിൽ ആരോഗ്യമന്ത്രി വീണാ ജോർജിനെതിരെയുണ്ടായ ശാരീരിക ആക്രമണത്തെ അതിശക്തമായ ഭാഷയിലാണ് ഗതാഗത മന്ത്രി കെ ബി ഗണേഷ് കുമാർ വിമർശിച്ചത്. ഒരു സ്ത്രീയെ തള്ളിയിട്ട് കഴുത്തൊടിക്കുന്ന നിലയിലേക്ക് കാര്യങ്ങൾ എത്തിക്കുന്നത് വെറും ചട്ടമ്പിത്തരമാണെന്ന് അദ്ദേഹം പറഞ്ഞു. പരാക്രമം കാണിക്കേണ്ടത് സ്ത്രീകളോടല്ലെന്നും ഇത്തരം പ്രവണതകൾ കേരളത്തിലെ ജനങ്ങൾക്ക് സ്വീകാര്യമല്ലെന്നും അദ്ദേഹം ഓർമ്മിപ്പിച്ചു. ചെങ്ങന്നൂരിൽ പുതിയ കെഎസ്ആർടിസി സമുച്ചയത്തിന്റെ നിർമ്മാണ ഉദ്ഘാടനം നിർവ്വഹിച്ചു സംസാരിക്കുകയായിരുന്നു മന്ത്രി.
ജനാധിപത്യപരമായ പ്രതിഷേധങ്ങൾ ആകാം എന്ന നിലപാടാണ് ഗണേഷ് കുമാർ പങ്കുവെച്ചത്. മന്ത്രിക്ക് നേരെ കരിങ്കൊടി കാണിക്കുന്നതിലോ പ്രതിഷേധ യോഗങ്ങൾ സംഘടിപ്പിക്കുന്നതിലോ തെറ്റില്ല. എന്നാൽ തെരുവുനായ്ക്കളെപ്പോലെ ഒരു സ്ത്രീയുടെ നേരെ കുരച്ചുചാടുന്നതും അവരെ തള്ളിയിട്ട് പരിക്കേൽപ്പിക്കുന്നതും മര്യാദയല്ലെന്ന് അദ്ദേഹം പറഞ്ഞു. നമ്മുടെ സംസ്കാരത്തിന് ഒട്ടും യോജിക്കാത്ത രീതിയിലാണ് പ്രതിഷേധക്കാർ പെരുമാറിയതെന്നും മന്ത്രി കൂട്ടിച്ചേർത്തു.
Also Read:സംഘർഷസാധ്യത, വി.ഡി. സതീശന്റെ സുരക്ഷ വർധിപ്പിച്ചു; ആലപ്പുഴയിൽ കനത്ത പോലീസ് കാവൽ
കണ്ണൂർ റെയിൽവേ സ്റ്റേഷനിൽ വെച്ച് ഇന്നലെ വൈകീട്ടാണ് ആരോഗ്യമന്ത്രിക്ക് നേരെ ആക്രമണമുണ്ടായത്. ആക്രമണത്തിൽ പരിക്കേറ്റ മന്ത്രിയെ ആദ്യം ജില്ലാ ആശുപത്രിയിലും പിന്നീട് വിദഗ്ധ ചികിത്സക്കായി പരിയാരം മെഡിക്കൽ കോളേജിലേക്കും മാറ്റി. സംഭവത്തിൽ വധശ്രമം ഉൾപ്പെടെയുള്ള വകുപ്പുകൾ ചേർത്താണ് പോലീസ് കേസ് എടുത്തിരിക്കുന്നത്. മന്ത്രിയെ ആക്രമിച്ചതിനും തടയാൻ ശ്രമിച്ച ഗൺമാനെ മർദ്ദിച്ചതിനും കൃത്യമായ തെളിവുകൾ എഫ്ഐആറിൽ രേഖപ്പെടുത്തിയിട്ടുണ്ട്.
മന്ത്രിക്കെതിരായ ആക്രമണവുമായി ബന്ധപ്പെട്ട് അഞ്ച് കെഎസ്യു പ്രവർത്തകരെ പോലീസ് അറസ്റ്റ് ചെയ്തു. എം സി അതുൽ, സി എച് മുബാസ്, മുഹമ്മദ് യാസീൻ, അക്ഷയ് മാട്ടൂൽ, ബിഥുൽ എന്നിവരെയാണ് കോടതി റിമാൻഡ് ചെയ്തത്. ‘കൊല്ലെടാ’ എന്ന് ആക്രോശിച്ചുകൊണ്ട് ആയുധവുമായി ചാടി വീണാണ് മന്ത്രിയെ ആക്രമിച്ചതെന്ന് പോലീസ് റിപ്പോർട്ടുകൾ വ്യക്തമാക്കുന്നു.
The post ആരോഗ്യമന്ത്രിക്കെതിരായ ആക്രമണം ചട്ടമ്പിത്തരം! പരാക്രമം കാണിക്കേണ്ടത് സ്ത്രീകളോടല്ല; കെ ബി ഗണേഷ് കുമാർ appeared first on Express Kerala.