കണ്ണൂരിൽ ആരോഗ്യ മന്ത്രി വീണാ ജോർജിനെതിരെയുണ്ടായ കരിങ്കൊടി പ്രതിഷേധവും അതിനെത്തുടർന്നുള്ള വിവാദങ്ങളും പുതിയ തലങ്ങളിലേക്ക് കടക്കുകയാണ്. മന്ത്രിയെ ആക്രമിച്ചെന്ന് വ്യാജ പ്രചാരണം നടത്തിയെന്ന് ആരോപിച്ച് സ്പീക്കർ എ.എൻ. ഷംസീറിനെതിരെ യൂത്ത് കോൺഗ്രസ് പോലീസിൽ പരാതി നൽകി. സംഭവത്തിൽ നടന്ന ഗൂഢാലോചന അന്വേഷിക്കണമെന്നും സ്പീക്കറുടെ ഫോൺ പരിശോധിക്കണമെന്നുമാണ് യൂത്ത് കോൺഗ്രസ് സംസ്ഥാന വർക്കിങ് പ്രസിഡന്റ് ബിനു ചുള്ളിയിലിന്റെ ആവശ്യം.
അതേസമയം, മന്ത്രിയെ ആക്രമിച്ചത് കെ.എസ്.യു പ്രവർത്തകരാണെന്ന സി.പി.എം വാദത്തെ പ്രതിപക്ഷം ശക്തമായി എതിർക്കുന്നു. സി.പി.എം പുറത്തുവിട്ട ദൃശ്യങ്ങളിലുള്ളത് മന്ത്രിയുടെ ഗൺമാനാണെന്നാണ് കെ.എസ്.യുവിന്റെ ആരോപണം. കെ.എസ്.യു പ്രവർത്തകർ മന്ത്രിയുടെ അടുത്തേക്ക് എത്തിയിട്ടുപോലുമില്ലെന്നും പ്രതിഷേധത്തെ വധശ്രമമായി ചിത്രീകരിച്ച് രാഷ്ട്രീയ ലാഭമുണ്ടാക്കാനാണ് സർക്കാർ ശ്രമിക്കുന്നതെന്നും പ്രതിപക്ഷ സംഘടനകൾ ആരോപിക്കുന്നു.
Also Read: ആരോഗ്യമന്ത്രിക്കെതിരായ പ്രതിഷേധം! മന്ത്രിയുടെ അടുത്തേക്ക് പ്രവർത്തകർ പോയില്ല
പരിയാരം മെഡിക്കൽ കോളേജ് ഐ.സി.യുവിൽ കഴിയുന്ന മന്ത്രിയെ സന്ദർശിച്ച സി.പി.എം നേതാവ് എം.വി. ജയരാജൻ, ഇത് ആസൂത്രിതമായ കൊലപാതകശ്രമമാണെന്ന് ആവർത്തിച്ചു. മന്ത്രിയുടെ കഴുത്തിന്റെ വലതുഭാഗത്ത് പരിക്കുണ്ടെന്നും ഒരാൾ കറുത്ത തുണിയുമായി മന്ത്രിയുടെ അടുത്തേക്ക് വരുന്ന ദൃശ്യങ്ങൾ വ്യക്തമാണെന്നും അദ്ദേഹം പറഞ്ഞു. സംഘർഷാവസ്ഥ കണക്കിലെടുത്ത് പ്രവർത്തകർ ആത്മസംയമനം പാലിക്കണമെന്നും ജനാധിപത്യപരമായി പ്രതിഷേധിക്കണമെന്നും അദ്ദേഹം കൂട്ടിച്ചേർത്തു.
The post ‘സ്പീക്കർ ഷംസീറിനെതിരെ അന്വേഷണം വേണം, ഫോൺ പരിശോധിക്കണം’; ഡിജിപിക്ക് പരാതി നൽകി യൂത്ത് കോൺഗ്രസ് appeared first on Express Kerala.