വൻ വിവാദങ്ങൾക്ക് വഴിതെളിച്ച ‘കേരള സ്റ്റോറി 2’ എന്ന സിനിമയുടെ റിലീസ് തടഞ്ഞുകൊണ്ടുള്ള ഹൈക്കോടതി ഉത്തരവ് നിലനിൽക്കെ, പശ്ചിമ ബംഗാളിലെ തിയറ്ററുകളിൽ ചിത്രത്തിൻ്റെ ബുക്കിങ് ആരംഭിച്ചത് പുതിയ തർക്കങ്ങൾക്ക് കാരണമാകുന്നു. ബുക്ക് മൈ ഷോ വഴി ഉച്ചയ്ക്ക് 12 മണിക്ക് ശേഷമുള്ള ഷോകൾക്കാണ് നിലവിൽ ബുക്കിങ് നടക്കുന്നത്. കോടതി വിധിയോടുള്ള അനാദരവാണിതെന്ന് ചൂണ്ടിക്കാട്ടി ഹർജിക്കാർ ഈ വിവരം വീണ്ടും കോടതിയുടെ ശ്രദ്ധയിൽപ്പെടുത്താൻ ഒരുങ്ങുകയാണ്. 15 ദിവസത്തേക്ക് ചിത്രത്തിന് ഏർപ്പെടുത്തിയ ഇടക്കാല സ്റ്റേ ലംഘിച്ചുകൊണ്ടാണ് അണിയറ പ്രവർത്തകരുടെ ഈ നീക്കം.
മതസൗഹാർദ്ദത്തിന് ഭീഷണി ഉയർത്തുന്നതാണ് ചിത്രമെന്ന് നിരീക്ഷിച്ച കോടതി, സിനിമയ്ക്ക് പ്രദർശനാനുമതി നൽകിയ സെൻസർ ബോർഡ് നടപടിയെ രൂക്ഷമായി വിമർശിച്ചിരുന്നു. കേരളത്തെ വർഗീയതയുടെയും മതഭ്രാന്തിൻ്റെയും നാടായി ചിത്രീകരിക്കുന്നത് അംഗീകരിക്കാനാവില്ലെന്നും സെൻസർ തീരുമാനം പുനഃപരിശോധിക്കണമെന്നും കോടതി കഴിഞ്ഞ ദിവസം വ്യക്തമാക്കിയിരുന്നു. കണ്ണൂർ സ്വദേശി ശ്രീദേവ് നമ്പൂതിരി, ഫ്രഡി ഫ്രാൻസിസ് എന്നിവരാണ് സിനിമയ്ക്കെതിരെ ഹർജി നൽകിയത്. കേരളത്തെ തകർക്കാനും ക്രമസമാധാന പ്രശ്നങ്ങൾ സൃഷ്ടിക്കാനും ലക്ഷ്യമിട്ടുള്ളതാണ് ഈ സിനിമയെന്ന് ഇവർ വാദിക്കുന്നു.
Also Read: താരനിരയുമായി ‘ധൂമകേതു’ വരുന്നു; നിഖില വിമലും ഷൈനും സജിൻ ഗോപുവും ഒന്നിക്കുന്ന ചിത്രം പാക്കപ്പായി!
കാമാഖ്യ നാരായണ സിങ് സംവിധാനം ചെയ്യുന്ന ചിത്രം ഫെബ്രുവരി 27-ന് റിലീസ് ചെയ്യാനായിരുന്നു നേരത്തെ തീരുമാനിച്ചിരുന്നത്. എന്നാൽ ട്രെയിലറിലെ വിദ്വേഷ പ്രചരണങ്ങളും യുവതിയെ നിർബന്ധിച്ച് ബീഫ് കഴിപ്പിക്കുന്നതുൾപ്പെടെയുള്ള രംഗങ്ങളും വലിയ പ്രതിഷേധങ്ങൾക്ക് വഴിവെച്ചിരുന്നു. കോടതി വിധി വന്നതിന് പിന്നാലെ നിർമ്മാതാക്കൾ അപ്പീൽ നൽകിയിട്ടുണ്ടെങ്കിലും, നിലവിലെ സ്റ്റേ മറികടന്ന് ബുക്കിങ് ആരംഭിച്ചത് നിയമപരമായി വലിയ തിരിച്ചടികൾക്ക് കാരണമായേക്കാം.
The post കോടതി സ്റ്റേ നിലനിൽക്കെ ‘കേരള സ്റ്റോറി 2’ ബുക്കിങ് ആരംഭിച്ചു; നിയമനടപടിയുമായി ഹർജിക്കാർ appeared first on Express Kerala.