കാലിക്കറ്റ് സർവകലാശാലയുടെ ഓൺലൈൻ ബിരുദാനന്തര ബിരുദ കോഴ്സുകൾക്ക് യുജിസി ഔദ്യോഗികമായി അനുമതി നൽകി. സോഷ്യോളജി, ഹിസ്റ്ററി, പൊളിറ്റിക്കൽ സയൻസ്, ഇക്കണോമിക്സ് എന്നീ നാല് വിഷയങ്ങളിലാണ് ‘എൻടൈറ്റിൽഡ് മോഡിൽ’ പ്രോഗ്രാമുകൾ നടത്താൻ അനുമതി ലഭിച്ചിരിക്കുന്നത്. മാർച്ച് 31-നകം പ്രവേശന നടപടികൾ പൂർത്തിയാക്കാൻ യുജിസി നിർദ്ദേശിച്ചതിനെ തുടർന്ന് സർവകലാശാല ഇപ്പോൾ അപേക്ഷ ക്ഷണിച്ചിട്ടുണ്ട്. താൽപ്പര്യമുള്ളവർക്ക് cdoe.uoc.ac.in എന്ന വെബ്സൈറ്റ് വഴി ഓൺലൈനായി അപേക്ഷിക്കാം.
മാർച്ച് 20 ആണ് പിഴയില്ലാതെ അപേക്ഷിക്കാനുള്ള അവസാന തീയതി. എന്നാൽ 500 രൂപ പിഴയോടെ മാർച്ച് 27 വരെയും അപേക്ഷിക്കാവുന്നതാണ്. പ്രായപരിധിയില്ലാതെ ആർക്കും പ്രവേശനം നേടാം എന്നതും, ഈ കോഴ്സുകൾ യുജിസി മാനദണ്ഡപ്രകാരം റഗുലർ കോഴ്സുകൾക്ക് തുല്യമായിരിക്കും എന്നതും പ്രത്യേകതയാണ്. പ്രധാനമായും വിദേശത്തുള്ളവർക്കും ജോലിയിൽ ഏർപ്പെട്ടിരിക്കുന്നവർക്കും ഉപകരിക്കുന്ന രീതിയിലാണ് ഈ ഓൺലൈൻ പ്രോഗ്രാമുകൾ വിഭാവനം ചെയ്തിരിക്കുന്നത്.
Also Read: എസ്ബിഐ ക്ലർക്ക് മെയിൻസ് ഫലം 2026 പുറത്ത്
പഠനം സുഗമമാക്കാൻ രണ്ട് സ്കീമുകളാണ് സർവകലാശാല മുന്നോട്ട് വെക്കുന്നത്. പഠനം ഓൺലൈനായും പരീക്ഷ മാത്രം നിശ്ചിത കേന്ദ്രങ്ങളിൽ നേരിട്ടെത്തി എഴുതുന്നതുമാണ് ഒന്നാമത്തെ രീതി. പഠനവും പരീക്ഷയും പൂർണ്ണമായും ഓൺലൈനായി നടത്തുന്ന രണ്ടാമത്തെ രീതിയും വിദ്യാർത്ഥികൾക്ക് തിരഞ്ഞെടുക്കാം. ക്ലാസുകളും ഇന്റേണൽ, എക്സ്റ്റേണൽ പരീക്ഷകളും വിദഗ്ധരായ അധ്യാപകരുടെ മേൽനോട്ടത്തിൽ ഓൺലൈനായി തന്നെ പൂർത്തിയാക്കാം എന്നതിനാൽ വിദ്യാർത്ഥികൾക്ക് പഠനാവശ്യങ്ങൾക്കായി സർവകലാശാലയിൽ നേരിട്ട് എത്തേണ്ടി വരില്ല.
The post കാലിക്കറ്റ് സർവകലാശാലയിൽ ഓൺലൈൻ പിജി; യുജിസി അനുമതി ലഭിച്ചു, ഇപ്പോൾ അപേക്ഷിക്കാം appeared first on Express Kerala.