ദക്ഷിണേന്ത്യയിലെ രണ്ട് പ്രധാന നഗരങ്ങളായ ചെന്നൈയെയും ബെംഗളൂരുവിനെയും ബന്ധിപ്പിക്കുന്ന പുതിയ എക്സ്പ്രസ് വേയുടെ നിർമാണം 2026 അവസാനത്തോടെ പൂർത്തിയാകുമെന്ന് കേന്ദ്ര ഉപരിതല ഗതാഗത മന്ത്രി നിതിൻ ഗഡ്കരി. നിലവിൽ ആറ് മണിക്കൂറോളം എടുക്കുന്ന യാത്രാസമയം ഈ പാത യാഥാർത്ഥ്യമാകുന്നതോടെ വെറും രണ്ട് മണിക്കൂറായി ചുരുങ്ങുമെന്നാണ് മന്ത്രിയുടെ ഉറപ്പ്. ഡൽഹി-മുംബൈ, ബെംഗളൂരു-മൈസൂരു തുടങ്ങിയ വമ്പൻ പാതകളുടെ നിരയിലേക്കാണ് 260 കിലോമീറ്റർ ദൈർഘ്യമുള്ള ഈ പുതിയ എക്സ്പ്രസ് ഹൈവേയും ഇടംപിടിക്കുന്നത്. രാജ്യത്തെ ഗതാഗത സംവിധാനങ്ങൾ കൂടുതൽ സുഗമമാക്കുന്നതിന്റെ ഭാഗമായാണ് അതിവേഗ പാതകളുടെ നിർമാണം പുരോഗമിക്കുന്നത്.
Also Read: ഇന്ത്യൻ വാഹനങ്ങൾക്ക് ഇന്തോനേഷ്യയിൽ ബ്രേക്ക്
കർണാടക, ആന്ധ്രപ്രദേശ്, തമിഴ്നാട് എന്നീ മൂന്ന് സംസ്ഥാനങ്ങളിലൂടെ കടന്നുപോകുന്ന ഈ സ്വപ്ന പദ്ധതി 2024-ൽ പൂർത്തിയാക്കാനാണ് ലക്ഷ്യമിട്ടിരുന്നതെങ്കിലും സ്ഥലമേറ്റെടുപ്പിലെ തടസ്സങ്ങളും സാമ്പത്തിക പ്രതിസന്ധികളും മൂലം നിർമാണം വൈകുകയായിരുന്നു. പദ്ധതിയുടെ ഭാഗമായ കർണാടകയിലെ 72 കിലോമീറ്റർ പാത ഒരു വർഷം മുമ്പ് തന്നെ ഗതാഗതത്തിനായി തുറന്നുകൊടുത്തിരുന്നു. ആന്ധ്രപ്രദേശിലെ 85 കിലോമീറ്ററും തമിഴ്നാട്ടിലെ 106 കിലോമീറ്ററും ഉൾപ്പെടുന്ന ഭാഗങ്ങൾ നിലവിൽ പൂർത്തീകരണത്തിന്റെ അവസാന ഘട്ടത്തിലാണ്. തമിഴ്നാട്ടിലെ ചില ഭാഗങ്ങളിൽ കരാറുകാരുടെ സാമ്പത്തിക ബുദ്ധിമുട്ടുകൾ കാരണം നിർമാണം തടസ്സപ്പെട്ടെങ്കിലും ഇപ്പോൾ പ്രവർത്തനങ്ങൾ വേഗത്തിലാക്കിയിട്ടുണ്ട്.
ഈ വർഷം അവസാനത്തോടെ പണികൾ പൂർത്തിയാക്കി പാത ഭാഗികമായി തുറന്നുകൊടുക്കാനാണ് സർക്കാർ നീക്കം. പൂർണ്ണതോതിൽ പ്രവർത്തനക്ഷമമാകുന്നതോടെ ദക്ഷിണേന്ത്യയിലെ വ്യാപാര-വ്യവസായ മേഖലകൾക്കും വിനോദസഞ്ചാരത്തിനും ഈ പാത വലിയ കരുത്തേകും. യാത്രാസമയത്തിൽ നാല് മണിക്കൂറോളം ലാഭിക്കാൻ കഴിയുന്നത് യാത്രക്കാർക്ക് വലിയ ആശ്വാസമാകും. ആധുനിക സൗകര്യങ്ങളോടെ നിർമ്മിക്കുന്ന ഈ എക്സ്പ്രസ് വേ ദക്ഷിണേന്ത്യൻ സംസ്ഥാനങ്ങൾക്കിടയിലെ റോഡ് ഗതാഗതത്തിൽ പുതിയൊരു അധ്യായം കുറിക്കുമെന്നുറപ്പാണ്.
The post ചെന്നൈയിൽ നിന്ന് ബെംഗളൂരുവിലേക്ക് ഇനി വെറും 2 മണിക്കൂർ! റോഡ് യാത്രയിൽ വൻ വിപ്ലവവുമായി പുതിയ എക്സ്പ്രസ് വേ appeared first on Express Kerala.