അലഹബാദ് ഹൈക്കോടതിയുടെ ലഖ്നൗ ബെഞ്ചിൽ കേസുകളുടെ ബാഹുല്യം കാരണം ജഡ്ജിക്ക് ശാരീരിക ബുദ്ധിമുട്ട് അനുഭവപ്പെട്ടതിനെ തുടർന്ന് വിധി പറയുന്നത് മാറ്റിവെച്ചു. രാവിലെ മുതൽ രാത്രി ഏഴുമണി വരെ നീണ്ട മാരത്തൺ വാദങ്ങൾക്കൊടുവിലാണ് ജസ്റ്റിസ് സുഭാഷ് വിദ്യാർത്ഥിക്ക് വിശപ്പും തളർച്ചയും അനുഭവപ്പെട്ടത്. അന്ന് വാദം കേൾക്കാനായി പട്ടികപ്പെടുത്തിയിരുന്ന 235 കേസുകളിൽ മുപ്പതോളം കേസുകളിൽ അദ്ദേഹം വാദം പൂർത്തിയാക്കിയിരുന്നു. ഇതിൽ സുപ്രീംകോടതി പുനഃപരിശോധനയ്ക്കായി അയച്ച സുപ്രധാനമായ മുപ്പതാമത്തെ കേസിന്റെ വാദം രാത്രി ഏഴുമണി വരെ നീണ്ടുനിന്നു.
ഒരു ഡെബ്റ്റ് റിക്കവറി ട്രൈബ്യൂണലിന്റെ ഉത്തരവിനെച്ചൊല്ലിയുള്ള ഹർജിയാണ് ജസ്റ്റിസ് സുഭാഷ് വിദ്യാർത്ഥി പരിഗണിച്ചത്. നേരത്തെ ഈ കേസിൽ ഹൈക്കോടതി നൽകിയ ഉത്തരവ്, എതിർകക്ഷിയുടെ ഭാഗം കേട്ടില്ലെന്ന കാരണത്താൽ സുപ്രീംകോടതി റദ്ദാക്കുകയും അടിയന്തരമായി തീരുമാനമെടുക്കാൻ നിർദ്ദേശിക്കുകയും ചെയ്തിരുന്നു. ഈ മാസം 24-ന് വിഷയത്തിൽ തീർപ്പുണ്ടാക്കാനുള്ള കാലാവധി അവസാനിക്കാനിരിക്കെയാണ് അഭിഭാഷകർ ദീർഘനേരം കോടതിയിൽ വാദമുഖങ്ങൾ നിരത്തിയത്. ഇത്രയും സമയം തുടർച്ചയായി ജോലി ചെയ്തത് ജഡ്ജിയുടെ ആരോഗ്യത്തെ ബാധിക്കുകയായിരുന്നു.
തുടർച്ചയായ ജോലി കാരണം തനിക്ക് വലിയ ശാരീരിക ബുദ്ധിമുട്ട് അനുഭവപ്പെടുന്നുണ്ടെന്നും വിശപ്പും തളർച്ചയും കാരണം വിധി പറയാൻ പ്രാപ്തനല്ലെന്നും ജസ്റ്റിസ് കോടതിയെ അറിയിച്ചു. കോടതി നടപടികളിലെ അമിത ജോലിഭാരം നീതിന്യായ വ്യവസ്ഥയിലെ ഉദ്യോഗസ്ഥരെ എത്രത്തോളം ബാധിക്കുന്നു എന്നതിന്റെ നേർക്കാഴ്ചയായി ഈ സംഭവം മാറി. ജഡ്ജിയുടെ തുറന്നുപറച്ചിലിനെത്തുടർന്ന് കേസിൽ വിധി പറയുന്നത് മറ്റൊരു ദിവസത്തേക്ക് മാറ്റിവെച്ചു.
The post വിധി പറയാൻ വയ്യ! തളർന്നുപോയെന്ന് ജസ്റ്റിസ്; ഹൈക്കോടതിയിൽ വിധി പ്രസ്താവം മാറ്റിവെച്ചു appeared first on Express Kerala.