പശ്ചിമേഷ്യയിൽ അമേരിക്ക-ഇസ്രയേൽ സംയുക്ത സൈനിക നീക്കം ശക്തമായതോടെ അതീവ ജാഗ്രത പ്രഖ്യാപിച്ച് കുവൈത്ത്. സുരക്ഷാ മുൻകരുതലിന്റെ ഭാഗമായി രാജ്യത്തെ വ്യോമപാത താൽക്കാലികമായി അടച്ചതായി കുവൈത്ത് ഡയറക്ടറേറ്റ് ജനറൽ ഓഫ് സിവിൽ ഏവിയേഷൻ അറിയിച്ചു. വിമാനങ്ങളുടെയും യാത്രക്കാരുടെയും സുരക്ഷ മുൻനിർത്തിയാണ് ഈ അടിയന്തര നടപടിയെന്ന് അധികൃതർ വ്യക്തമാക്കി. നിലവിലെ പ്രക്ഷുബ്ധമായ സാഹചര്യത്തിൽ വിമാനത്താവളത്തിന്റെ പ്രവർത്തനം സുരക്ഷിതമാക്കാൻ ലക്ഷ്യമിട്ടുള്ള നീക്കമാണിതെന്ന് ഡയറക്ടറേറ്റ് വക്താവ് അബ്ദുല്ല രഹ്ജി അറിയിച്ചു. പ്രാദേശിക, അന്തർദേശീയ ഏജൻസികളുമായി സഹകരിച്ച് അധികൃതർ 24 മണിക്കൂറും സാഹചര്യം നിരീക്ഷിച്ചുവരികയാണ്.
വ്യോമപാത അടച്ചതിന് പിന്നാലെ കുവൈത്തിന്റെ വിവിധ ഭാഗങ്ങളിൽ അപായ സൈറണുകൾ മുഴങ്ങിയത് ജനങ്ങൾക്കിടയിൽ ആശങ്ക പടർത്തിയിട്ടുണ്ട്. അപ്രതീക്ഷിതമായ ഈ സുരക്ഷാ മാറ്റങ്ങൾക്കിടയിൽ, ഔദ്യോഗിക ചാനലുകൾ വഴി വരുന്ന അറിയിപ്പുകൾ മാത്രം വിശ്വസിക്കണമെന്നും വ്യാജവാർത്തകൾ പ്രചരിപ്പിക്കരുതെന്നും സിവിൽ ഏവിയേഷൻ അതോറിറ്റി പൊതുജനങ്ങളോടും മാധ്യമങ്ങളോടും അഭ്യർത്ഥിച്ചു. സ്ഥിതിഗതികൾ വിലയിരുത്തിയ ശേഷം തുടർ നടപടികൾ വരും മണിക്കൂറുകളിൽ പ്രഖ്യാപിക്കും. യാത്രക്കാർ തങ്ങളുടെ വിമാനങ്ങളുടെ സമയക്രമം അറിയാൻ ബന്ധപ്പെട്ട വിമാനക്കമ്പനികളുമായി നേരിട്ട് ബന്ധപ്പെടേണ്ടതാണ്.
The post യുദ്ധഭീതിയിൽ പശ്ചിമേഷ്യ: കുവൈത്ത് വ്യോമപാത അടച്ചു; രാജ്യത്തെങ്ങും അപായ സൈറണുകൾ appeared first on Express Kerala.