പൊതുമേഖലാ സ്ഥാപനമായ യുണൈറ്റഡ് ഇലക്ട്രിക്കല് ഇന്ഡസ്ട്രീസ് ലിമിറ്റഡിന് (യു.എൻ.ഐ.എൽ.ഇ.സി) സർക്കാർ നൽകിയ വായ്പയും പലിശയും തിരിച്ചടക്കേണ്ടതില്ലെന്ന് മുഖ്യമന്ത്രിയുടെ അധ്യക്ഷതയിൽ ചേർന്ന മന്ത്രിസഭാ യോഗം തീരുമാനിച്ചു. 2019 മാർച്ച് വരെ കമ്പനി എടുത്ത 50.01 കോടി രൂപയുടെ വായ്പയും, അതിന്റെ പലിശയും പിഴപ്പലിശയും ഉൾപ്പെടെ ആകെ 76.22 കോടി രൂപ ഓഹരി മൂലധനമാക്കി മാറ്റാനാണ് സർക്കാർ തീരുമാനം. ഈ നടപടിയോടെ കമ്പനിയിൽ സർക്കാരിനുള്ള ഓഹരി വിഹിതം 81.22 കോടി രൂപയായി വർധിക്കും. കടബാധ്യതകളിൽ നിന്ന് മോചനം ലഭിക്കുന്നത് കൊല്ലത്തെ ഈ ‘മീറ്റർ കമ്പനി’യുടെ ഭാവി പ്രവർത്തനങ്ങൾക്ക് വലിയ ഊർജ്ജമാകും.
നിലവിൽ സ്മാർട്ട് മീറ്ററുകൾ, വാട്ടർ മീറ്ററുകൾ, സോളാർ ഉൽപ്പന്നങ്ങൾ എന്നിവ നിർമ്മിക്കുന്ന കമ്പനി പ്രതിരോധം, ഏറോസ്പേസ് തുടങ്ങിയ പുതിയ മേഖലകളിലേക്ക് പ്രവർത്തനം വ്യാപിപ്പിക്കാൻ ഒരുങ്ങുകയാണ്. ഇന്ത്യയിലുടനീളം സ്മാർട്ട് എനർജി മീറ്ററിംഗ് സംവിധാനം നടപ്പിലാക്കുന്നതിനായി പ്രമുഖ കമ്പനികളുമായി ചേർന്ന് കൺസോർഷ്യം രൂപീകരിക്കാനും ബിസിനസ് ഡെവലപ്മെന്റ് കൺസൾട്ടന്റുമാരെ നിയമിക്കാനുമുള്ള നടപടികൾ പുരോഗമിക്കുന്നു. എം.എൽ.എ ഫണ്ട് ഉപയോഗിച്ചുള്ള ലൈറ്റുകളുടെ നിർമ്മാണവും സ്ഥാപിക്കലും ഏറ്റെടുത്ത് നടത്തുന്ന സ്ഥാപനത്തിന്, പുതിയ സാമ്പത്തിക പുനഃക്രമീകരണം ബിസിനസ് രംഗത്ത് മികച്ച മുന്നേറ്റം നടത്താൻ സഹായകമാകും.
The post മീറ്റർ കമ്പനിക്ക് വൻ ആശ്വാസം! കോടികളുടെ സർക്കാർ വായ്പ ഓഹരിയാക്കി മാറ്റി, പ്രതിസന്ധി മറികടക്കാൻ വഴിതുറക്കുന്നു appeared first on Express Kerala.