ട്വന്റി20 ലോകകപ്പിലെ സെമി ഫൈനൽ പ്രതീക്ഷകൾ നിലനിർത്താൻ വെസ്റ്റ് ഇൻഡീസിനെതിരെ ഇന്ത്യ ഇന്ന് ഇറങ്ങുമ്പോൾ ബാറ്റിംഗ് ക്രമത്തിൽ പരീക്ഷണങ്ങൾക്ക് സാധ്യതയുണ്ടെന്ന് അസിസ്റ്റന്റ് കോച്ച് റയാൻ ടെൻ ഡോഷേറ്റ് വ്യക്തമാക്കി. കൊൽക്കത്ത ഈഡൻ ഗാർഡൻസിൽ നടക്കുന്ന മത്സരത്തിന് മുന്നോടിയായി മാധ്യമങ്ങളോട് സംസാരിക്കവെയാണ് അദ്ദേഹം ടീം തന്ത്രങ്ങളെക്കുറിച്ച് സൂചന നൽകിയത്. ടീമിൽ വലിയ മാറ്റങ്ങൾ വരുത്തില്ലെങ്കിലും എതിർ ടീമിന്റെ ബൗളിംഗ് കരുത്ത് പരിഗണിച്ച് താരങ്ങളുടെ ബാറ്റിംഗ് പൊസിഷനിൽ മാറ്റം വരുത്തിയേക്കും.
കഴിഞ്ഞ മത്സരത്തിൽ സിംബാബ്വെയ്ക്കെതിരെ ആറാം നമ്പറിലിറങ്ങി 16 പന്തിൽ 44 റൺസുമായി തിളങ്ങിയ തിലക് വർമ്മ ഇന്നും അതേ സ്ഥാനത്ത് തന്നെ ഇറങ്ങുമെന്ന് ഉറപ്പില്ലെന്ന് അദ്ദേഹം പറഞ്ഞു. സഞ്ജു സാംസൺ ടോപ്പ് ഓർഡറിൽ മികച്ച പ്രകടനം നടത്തുന്നത് ടീമിന് ഗുണകരമാണെന്നും ലഭ്യമായ ഓപ്ഷനുകളിൽ നിന്ന് സാഹചര്യത്തിനനുസരിച്ചുള്ള ബാറ്റിംഗ് ഓർഡർ തിരഞ്ഞെടുക്കുമെന്നും ഡോഷേറ്റ് കൂട്ടിച്ചേർത്തു. കഴിഞ്ഞ കളിയിൽ ഹാർദിക് പാണ്ഡ്യക്കൊപ്പം ചേർന്ന് 84 റൺസിന്റെ വെടിക്കെട്ട് കൂട്ടുകെട്ടുണ്ടാക്കാൻ തിലകിന് സാധിച്ചിരുന്നു.
Also Read: ആവേശപ്പോര്! സെമി ലക്ഷ്യമിട്ട് ഇന്ത്യ; പ്ലെയിംഗ് ഇലവനിൽ മാറ്റമില്ലാതെ നീലപ്പട
സൂപ്പർ-8 ലെ ആദ്യ മത്സരത്തിൽ ദക്ഷിണാഫ്രിക്കയോട് പരാജയപ്പെട്ട ഇന്ത്യക്ക് സെമിയിൽ കടക്കാൻ ഇന്നത്തെ വിജയം അത്യന്താപേക്ഷിതമാണ്. ദക്ഷിണാഫ്രിക്ക കഴിഞ്ഞ മത്സരത്തിൽ വെസ്റ്റ് ഇൻഡീസിനെ തോൽപ്പിച്ചതിനാൽ, ഇന്ന് ഏത് മാർജിനിൽ വിജയിച്ചാലും ഇന്ത്യക്ക് സെമി ഫൈനൽ ഉറപ്പിക്കാം.
The post സഞ്ജു ടോപ്പ് ഓർഡറിലോ? തിലകിന്റെ പൊസിഷൻ മാറുമോ! ഇന്ത്യയുടെ പുതിയ പ്ലാൻ appeared first on Express Kerala.