ടി20 ലോകകപ്പ് ആവേശകരമായ അന്ത്യത്തിലേക്ക് നീങ്ങുമ്പോൾ, ടൂർണമെന്റിലെ താരമാകാൻ സാധ്യതയുള്ള അഞ്ച് കളിക്കാരെ പ്രവചിച്ച് മുൻ ഇന്ത്യൻ നായകനും ചീഫ് സെലക്ടറുമായ കൃഷ്ണമാചാരി ശ്രീകാന്ത് രംഗത്തെത്തി. സെമി ഫൈനലിലെയും ഫൈനലിലെയും പ്രകടനങ്ങളായിരിക്കും ഈ പുരസ്കാര ജേതാവിനെ നിർണ്ണയിക്കുന്നതിൽ പ്രധാന പങ്കുവഹിക്കുകയെന്ന് അദ്ദേഹം അഭിപ്രായപ്പെട്ടു.
ശ്രീകാന്തിന്റെ പട്ടികയിൽ ഒന്നാമതുള്ളത് ദക്ഷിണാഫ്രിക്കൻ നായകൻ ഏയ്ഡൻ മാർക്രമാണ്. ടീമിനെ തോൽവിയറിയാതെ സെമിയിലെത്തിച്ച മാർക്രം, ആറ് മത്സരങ്ങളിൽ നിന്ന് 66 ശരാശരിയിൽ 264 റൺസുമായി റൺവേട്ടക്കാരിൽ മൂന്നാം സ്ഥാനത്തുണ്ട്. രണ്ടാമനായി ശ്രീകാന്ത് തിരഞ്ഞെടുത്തത് ഇംഗ്ലണ്ടിന്റെ ഓൾറൗണ്ടർ വിൽ ജാക്സിനെയാണ്. ബാറ്റുകൊണ്ടും പന്തുകൊണ്ടും ഒരുപോലെ തിളങ്ങുന്ന ജാക്സ് ഇതിനോടകം നാലുതവണ കളിയിലെ താരമായി തിരഞ്ഞെടുക്കപ്പെട്ടു കഴിഞ്ഞു.
Also Read: വിജയിച്ചാൽ സെമി, മഴ പെയ്താൽ പുറത്ത്; ടീം ഇന്ത്യക്ക് ഇന്ന് നിർണായക പരീക്ഷണം
ദക്ഷിണാഫ്രിക്കൻ പേസർ ലുങ്കി എൻഗിഡിയാണ് പട്ടികയിലെ മൂന്നാമൻ. റബാഡ ഫോമിലല്ലാതിരുന്ന ഘട്ടത്തിൽ 5 മത്സരങ്ങളിൽ നിന്ന് 11 വിക്കറ്റുകളുമായി ടീമിന്റെ ബൗളിംഗ് കുന്തമുനയാകാൻ എൻഗിഡിക്ക് സാധിച്ചു. ന്യൂസിലൻഡ് നായകൻ മിച്ചൽ സാന്റ്നറാണ് നാലാമത്തെ താരം. മികച്ച എക്കണോമി റേറ്റിൽ പന്തെറിയുന്നതിനൊപ്പം നിർണ്ണായക ഘട്ടങ്ങളിൽ ബാറ്റിംഗിലും സാന്റ്നർ തിളങ്ങുന്നുണ്ട്. ഇന്ത്യൻ നിരയിൽ നിന്ന് മിസ്റ്ററി സ്പിന്നർ വരുൺ ചക്രവർത്തിക്കാണ് ശ്രീകാന്ത് സാധ്യത കൽപ്പിക്കുന്നത്. 6 മത്സരങ്ങളിൽ നിന്ന് 11 വിക്കറ്റുകൾ വീഴ്ത്തിയ വരുൺ സെമിയിലും ഫൈനലിലും ഈ പ്രകടനം തുടർന്നാൽ പുരസ്കാരം തേടിയെത്തുമെന്ന് അദ്ദേഹം നിരീക്ഷിച്ചു.
ടൂർണമെന്റിലെ മറ്റ് സ്ഥിതിവിവരക്കണക്കുകൾ പരിശോധിച്ചാൽ, അമേരിക്കയുടെ ഷാഡ്ലി വാൻ ഷാൽക്വിക് (13 വിക്കറ്റ്) വിക്കറ്റ് വേട്ടയിലും പാകിസ്താന്റെ സാഹിബ്സാദ ഫർഹാൻ (383 റൺസ്) റൺവേട്ടയിലും മുന്നിട്ടുനിൽക്കുന്നു. ഇന്ത്യൻ താരങ്ങളിൽ റൺവേട്ടയിൽ ഇഷാൻ കിഷൻ (ഏഴാം സ്ഥാനം), സൂര്യകുമാർ യാദവ് (എട്ടാം സ്ഥാനം) എന്നിവരാണ് ആദ്യ പത്തിലുള്ളത്.
The post ലോകകപ്പിലെ താരം ആര്? ശ്രീകാന്തിന്റെ പ്രവചനത്തിൽ അഞ്ച് പേർ; ലിസ്റ്റിൽ ഒരു ഇന്ത്യൻ താരം മാത്രം appeared first on Express Kerala.