അമേരിക്കൻ-ഇസ്രായേൽ വ്യോമാക്രമണത്തിൽ ആയത്തുള്ള അലി ഖമേനി കൊല്ലപ്പെട്ടതിനെത്തുടർന്ന് ഇറാന്റെ ഇടക്കാല പരമോന്നത നേതാവായി മുതിർന്ന പുരോഹിതൻ അയത്തൊള്ള അലിറേസ അറാഫിയെ നിയമിച്ചു. ഇറാന്റെ ഔദ്യോഗിക വാർത്താ ഏജൻസിയായ ഐഎസ്എൻഎ ആണ് ഈ വിവരം പുറത്തുവിട്ടത്. ഭരണഘടനയുടെ 111-ാം അനുച്ഛേദം അനുസരിച്ച്, സ്ഥിരമായ ഒരു പിൻഗാമിയെ തിരഞ്ഞെടുക്കുന്നത് വരെ രാജ്യത്തിന്റെ പരമാധികാരം മൂന്നംഗ നേതൃത്വ കൗൺസിലിൽ നിക്ഷിപ്തമായിരിക്കും. ഈ കൗൺസിലിലെ നിയമജ്ഞ അംഗമായാണ് 67-കാരനായ അറാഫി ചുമതലയേൽക്കുന്നത്. ഇറാന്റെ ചരിത്രത്തിലെ ഏറ്റവും വലിയ നേതൃത്വ പ്രതിസന്ധിക്കിടെയാണ് ഈ നിർണ്ണായക നീക്കം.
അയത്തൊള്ള അറാഫിക്ക് പുറമെ ഇറാൻ പ്രസിഡന്റ് മസൂദ് പെഷേഷ്കിയാൻ, ചീഫ് ജസ്റ്റിസ് ഘോലം-ഹൊസൈൻ മൊഹ്സെനി-എജെയി എന്നിവരടങ്ങുന്ന സമിതിയാണ് ഇനി സംയുക്തമായി രാജ്യത്തെ നയിക്കുക. ഖമനെയി ഏകപക്ഷീയമായി പ്രയോഗിച്ചിരുന്ന പരമോന്നത അധികാരം ഇനി ഈ മൂവർ സംഘത്തിലായിരിക്കും. 1959-ൽ ജനിച്ച അറാഫി, ഇറാന്റെ ഇസ്ലാമിക സെമിനാരികളുടെ ദേശീയ ശൃംഖലയുടെ തലവനും ഗാർഡിയൻ കൗൺസിൽ അംഗവുമാണ്. വൈദിക ശ്രേണിയിൽ വലിയ സ്വാധീനമുള്ള അദ്ദേഹത്തിന്റെ നേതൃത്വം ഈ പരിവർത്തന ഘട്ടത്തിൽ ഇറാന് നിർണ്ണായകമാകും.
The post ഇറാനിൽ പുതിയ നേതൃത്വം; ഇടക്കാല ചുമതലയേറ്റെടുത്ത് അയത്തൊള്ള അലിറേസ അറാഫി appeared first on Express Kerala.