ഐപിഎൽ 19-ാം പതിപ്പിന് മുന്നോടിയായി ആരാധകർ ഏറെ കാത്തിരുന്ന തങ്ങളുടെ പുതിയ ജേഴ്സി ചെന്നൈ സൂപ്പർ കിംഗ്സ് പുറത്തിറക്കി. ‘എല്ലാം പുതിയതാണ്, എല്ലാം നിങ്ങൾക്കായി മാത്രം’ എന്ന ആവേശകരമായ ടാഗ്ലൈനോടെയാണ് ടീം ഇത്തവണ മഞ്ഞക്കുപ്പായം അവതരിപ്പിച്ചത്. കഴിഞ്ഞ സീസണിലെ നിരാശാജനകമായ പ്രകടനത്തിന് ശേഷം വലിയ മാറ്റങ്ങളുമായി എത്തുന്ന ടീം, നായകൻ റുതുരാജ് ഗെയ്ക്വാദിന്റെ നേതൃത്വത്തിലുള്ള ഒരു സിനിമാറ്റിക് വീഡിയോയിലൂടെയാണ് ജേഴ്സി ലോഞ്ച് ചെയ്തത്. ഈ വീഡിയോയിൽ എം.എസ് ധോണിക്കൊപ്പം രാജസ്ഥാൻ റോയൽസിൽ നിന്ന് ചെന്നൈയിലെത്തിയ മലയാളി താരം സഞ്ജു സാംസണെ പ്രത്യേകം പരാമർശിക്കുന്നത് ആരാധകർക്കിടയിൽ വലിയ ആവേശമാണ് സൃഷ്ടിച്ചിരിക്കുന്നത്.
ചെന്നൈയുടെ ഐക്കണിക് നിറമായ ‘കാനറി യെല്ലോ’യിൽ അത്യാധുനിക ഡിസൈനുകൾ സമന്വയിപ്പിച്ചാണ് ഇത്തവണത്തെ ജേഴ്സി ഒരുക്കിയിരിക്കുന്നത്. ജേഴ്സിയുടെ മുൻഭാഗത്ത് പ്രധാന സ്പോൺസറായ ‘ഇത്തിഹാദ് എയർവേയ്സി’ന്റെ ലോഗോ വലിയ പ്രാധാന്യത്തോടെ നൽകിയിട്ടുണ്ട്. കൂടാതെ, 2021 മുതൽ സി.എസ്.കെ പിന്തുടരുന്ന രീതി അനുസരിച്ച് ഇന്ത്യൻ സായുധ സേനയോടുള്ള ആദരസൂചകമായി തോളിൽ ‘ക്യാമഫ്ലേജ്’ സ്ട്രിപ്പുകളും ഉൾപ്പെടുത്തിയിട്ടുണ്ട്. വേനൽക്കാലത്തെ കടുത്ത ചൂടിലും താരങ്ങൾക്ക് ആശ്വാസം നൽകുന്നതിനായി ‘മോയിസ്ചർ വിക്കിംഗ്’ സാങ്കേതികവിദ്യയുള്ള പുനരുപയോഗം ചെയ്ത പോളിസ്റ്റർ തുണിത്തരമാണ് ഇതിനായി ഉപയോഗിച്ചിരിക്കുന്നത്.
Also Read: വിടവാങ്ങൽ മത്സരത്തിൽ അഴിഞ്ഞാട്ടം; ഇന്ത്യയ്ക്കെതിരെ 158 റൺസുമായി അലീസ ഹീലി
ആരാധകരുടെ ബജറ്റിന് അനുസരിച്ച് തിരഞ്ഞെടുക്കാൻ മൂന്ന് വിഭാഗങ്ങളിലായാണ് ജേഴ്സി വിപണിയിലെത്തുന്നത്. താരങ്ങൾ ഗ്രൗണ്ടിൽ ധരിക്കുന്ന അതേ നിലവാരത്തിലുള്ള ‘പ്ലെയർ എഡിഷൻ’ 4,999 മുതൽ 5,999 രൂപ വരെ വിലയിൽ ലഭ്യമാകും. മികച്ച ഗുണനിലവാരമുള്ള ‘റിപ്ലിക്ക എഡിഷൻ’ 2,499 മുതൽ 2,999 രൂപ വരെയും, സാധാരണ ആരാധകർക്കായി കുറഞ്ഞ വിലയിലുള്ള ‘ഫാൻ എഡിഷൻ’ 799 മുതൽ 1,299 രൂപ വരെയുള്ള നിരക്കിലും ലഭിക്കും. ചെപ്പോക്കിൽ പരിശീലനം ആരംഭിച്ച ഘട്ടത്തിൽ തന്നെ ജേഴ്സി കൂടി എത്തിയത് ടീമിന് പുതിയൊരു ഊർജ്ജം നൽകിയിട്ടുണ്ട്.
The post പുതിയ രൂപം, പുതിയ പോരാട്ടം; മഞ്ഞപ്പടയിൽ ഇനി ‘സഞ്ജു സാംസൺ’ യുഗം! ആവേശത്തിൽ ആരാധകർ appeared first on Express Kerala.