ആർട്ടിഫിഷ്യൽ ഇന്റലിജൻസ് രംഗത്തെ ഭീമന്മാരായ ഓപ്പൺഎഐയും എലോൺ മസ്കും തമ്മിലുള്ള പോരാട്ടം പുതിയ തലത്തിലേക്ക്. ചാറ്റ്ജിപിടി സുരക്ഷിതമല്ലാത്ത എഐ ചാറ്റ്ബോട്ടാണെന്നും അതിനേക്കാൾ ഏറെ സുരക്ഷിതമാണ് തന്റെ കമ്പനിയായ xAI വികസിപ്പിച്ച ഗ്രോക്ക് എന്നും മസ്ക് അവകാശപ്പെട്ടു. ഒരു വീഡിയോ സാക്ഷ്യപ്പെടുത്തലിനിടെ മസ്ക് നടത്തിയ ഈ പരാമർശങ്ങൾ ടെക്ക്രഞ്ച് ആണ് റിപ്പോർട്ട് ചെയ്തത്. ചില ഉപയോക്താക്കളുടെ മരണവുമായി വരെ ചാറ്റ്ജിപിടിയെ ബന്ധിപ്പിക്കുന്ന പരോക്ഷമായ പരാമർശങ്ങൾ നടത്തിയ മസ്ക്, ഗ്രോക്കിന് ഇത്തരം സുരക്ഷാ വീഴ്ചകളുടെ ചരിത്രമില്ലെന്നും വാദിച്ചു.
ഓപ്പൺഎഐയുടെ ഘടനയിൽ വന്ന മാറ്റങ്ങളെയും മസ്ക് രൂക്ഷമായി വിമർശിച്ചു. ലാഭേച്ഛയില്ലാത്ത ഒരു ഗവേഷണ സ്ഥാപനമായി തുടങ്ങിയ ഓപ്പൺഎഐ, ഇന്ന് കോടിക്കണക്കിന് ഡോളർ മൂല്യമുള്ള ലാഭേച്ഛയുള്ള കമ്പനിയായി മാറിയത് അതിന്റെ യഥാർത്ഥ ലക്ഷ്യങ്ങളെ ലംഘിക്കുന്നതാണെന്ന് അദ്ദേഹം ആരോപിച്ചു. വരുമാനം വർദ്ധിപ്പിക്കുന്നതിനായി ചാറ്റ്ജിപിടിയിൽ പരസ്യങ്ങൾ ഉൾപ്പെടുത്താനുള്ള നീക്കങ്ങളെയും മസ്ക് ചോദ്യം ചെയ്തു. ലാഭത്തിന് മുൻതൂക്കം നൽകുന്നതിലൂടെ എഐയുടെ സുരക്ഷാ മാനദണ്ഡങ്ങളിൽ ഓപ്പൺഎഐ വിട്ടുവീഴ്ച ചെയ്യുകയാണെന്നാണ് മസ്കിന്റെ പ്രധാന വാദം.
Also Read: രാത്രി ആകാശം പകൽ പോലെ തിളങ്ങാത്തതെന്ത്? ശാസ്ത്രലോകത്തെ കുഴപ്പിച്ച ‘പ്രപഞ്ച രഹസ്യം’
അതേസമയം, മസ്കിന്റെ ഈ സുരക്ഷാ വാദങ്ങൾക്കെതിരെ മറുപക്ഷത്തുനിന്ന് വിമർശനങ്ങൾ ഉയരുന്നുണ്ട്. നിയന്ത്രണങ്ങളില്ലാതെ ചിത്രങ്ങൾ നിർമ്മിക്കാനും ഉപയോക്താക്കളുടെ സ്വകാര്യതയിലേക്ക് കടന്നുകയറാനും ഗ്രോക്ക് എഐ അനുവദിക്കുന്നുണ്ടെന്നും, അങ്ങനെയുള്ളപ്പോൾ ഓപ്പൺഎഐയെ സുരക്ഷിതമല്ലെന്ന് വിളിക്കുന്നത് ഇരട്ടത്താപ്പാണെന്നും വിലയിരുത്തലുകളുണ്ട്. തങ്ങളുടെ വ്യാപാര രഹസ്യങ്ങൾ മോഷ്ടിച്ചു എന്നാരോപിച്ച് കാലിഫോർണിയ ഫെഡറൽ കോടതിയിൽ മസ്ക് ഓപ്പൺഎഐക്കെതിരെ കേസ് ഫയൽ ചെയ്തതോടെ ഇരുവിഭാഗവും തമ്മിലുള്ള നിയമയുദ്ധം മുറുകിയിരിക്കുകയാണ്.
ഒരുകാലത്ത് ഓപ്പൺഎഐ സ്ഥാപിക്കാൻ കൈകോർത്ത എലോൺ മസ്കും സാം ആൾട്ട്മാനും ഇന്ന് കടുത്ത എതിരാളികളാണ്. ഇരുവരും തമ്മിലുള്ള സൗഹൃദം ഇനി പുനഃസ്ഥാപിക്കാൻ സാധ്യതയില്ലെന്ന് സാം ആൾട്ട്മാൻ അടുത്തിടെ വ്യക്തമാക്കുകയുണ്ടായി. എഐ സാങ്കേതികവിദ്യയിൽ ആധിപത്യം സ്ഥാപിക്കാനുള്ള ഈ മത്സരം കേവലം ബിസിനസ് തർക്കങ്ങൾക്കപ്പുറം വലിയ നിയമയുദ്ധങ്ങളിലേക്കും വ്യക്തിപരമായ ആരോപണങ്ങളിലേക്കും നീളുകയാണ്. വരും മാസങ്ങളിൽ ഈ എഐ ഭീമന്മാർ തമ്മിലുള്ള പോരാട്ടം കൂടുതൽ രൂക്ഷമാകുമെന്നാണ് സൂചന.
The post ചാറ്റ്ജിപിടി സുരക്ഷിതമല്ല, ഗ്രോക്ക് ആണ് മികച്ചത്; ഓപ്പൺഎഐക്കെതിരെ വീണ്ടും ആഞ്ഞടിച്ച് എലോൺ മസ്ക് appeared first on Express Kerala.