ഇറാൻ പരമോന്നത നേതാവ് ആയത്തുള്ള അലി ഖമേനിവധിക്കപ്പെട്ട സംഭവത്തിൽ കേന്ദ്ര സർക്കാർ പുലർത്തുന്ന നിശബ്ദത നിഷ്പക്ഷതയല്ല, മറിച്ച് ഉത്തരവാദിത്തങ്ങളിൽ നിന്നുള്ള ഒഴിഞ്ഞുമാറലാണെന്ന് സോണിയ ഗാന്ധി ആരോപിച്ചു. ‘ദി ഇന്ത്യൻ എക്സ്പ്രസിൽ’ എഴുതിയ ലേഖനത്തിലാണ് അവർ കേന്ദ്ര സർക്കാരിനെതിരെ വിമർശനം ഉന്നയിച്ചത്. ഇസ്രയേലും അമേരിക്കയും സംയുക്തമായി നടത്തിയ ആക്രമണത്തിൽ ഒരു രാഷ്ട്രത്തലവൻ കൊല്ലപ്പെട്ടത് അന്താരാഷ്ട്ര നിയമങ്ങളുടെ ലംഘനമാണെന്നും, ലോകക്രമത്തിന്റെ തകർച്ചയ്ക്ക് ഇത് കാരണമാകുമെന്നും സോണിയ ചൂണ്ടിക്കാട്ടി.
ഇന്ത്യയുടെ നിർണ്ണായക ഘട്ടങ്ങളിൽ ഇറാൻ നൽകിയ പിന്തുണ മറക്കരുതെന്ന് സോണിയ ഗാന്ധി കേന്ദ്ര സർക്കാരിനെ ഓർമ്മിപ്പിച്ചു. 1994-ൽ കശ്മീർ വിഷയത്തിൽ യുഎൻ കമ്മീഷനിൽ ഇന്ത്യക്കെതിരെ കൊണ്ടുവരാൻ ശ്രമിച്ച പ്രമേയം തടയുന്നതിൽ ഇറാൻ വഹിച്ച പങ്ക് വളരെ വലുതാണ്. ഇന്ത്യയുടെ സാമ്പത്തിക മുന്നേറ്റത്തിന്റെ കാലഘട്ടത്തിൽ ഈ പ്രശ്നം ആഗോളതലത്തിൽ വഷളാകാതിരിക്കാൻ ഇറാൻ സഹായിച്ചിരുന്നു. കൂടാതെ, 2001-ൽ അടൽ ബിഹാരി വാജ്പേയിയുടെ ഇറാൻ സന്ദർശനത്തിലൂടെ ഉറപ്പിച്ച ആഴമേറിയ ബന്ധം ഇന്നത്തെ സർക്കാർ വിസ്മരിക്കുകയാണെന്നും അവർ വിമർശിച്ചു.
Also Read: വിവാഹത്തിന് പിന്നാലെ വിദ്യാർത്ഥികൾക്ക് കൈത്താങ്ങായി വിജയ് ദേവരകൊണ്ട; സ്കോളർഷിപ്പ് പ്രഖ്യാപിച്ചു
ഇറാൻ നടത്തിയ തിരിച്ചടിയെ മാത്രം അപലപിക്കുകയും അതിന് കാരണമായ ഇസ്രയേലിന്റെ കടന്നുകയറ്റത്തെ അവഗണിക്കുകയും ചെയ്യുന്ന നിലപാട് രാജ്യത്തിന്റെ വിദേശനയത്തിന്റെ വിശ്വാസ്യതയെ സംശയമുനയിൽ നിർത്തുന്നതാണെന്ന് സോണിയ ഗാന്ധി പറഞ്ഞു. ഗസയിൽ സ്ത്രീകളും കുട്ടികളും കൊല്ലപ്പെടുന്ന സാഹചര്യത്തിൽ ഇസ്രയേലിന് പിന്തുണ പ്രഖ്യാപിച്ച സർക്കാർ നടപടിയെയും അവർ ചോദ്യം ചെയ്തു. സമകാലിക അന്താരാഷ്ട്ര ബന്ധങ്ങളിൽ വിള്ളലുണ്ടാക്കുന്ന ഇത്തരം സംഭവങ്ങളിൽ ഇന്ത്യ പുലർത്തുന്ന മൗനം രാജ്യത്തിന്റെ സ്വതന്ത്ര നിലപാടുകളെ തകർക്കുമെന്ന് അവർ മുന്നറിയിപ്പ് നൽകി.
സോണിയ ഗാന്ധിയുടെ നിലപാടിനെ പിന്തുണച്ച് ലോക്സഭാ പ്രതിപക്ഷ നേതാവ് രാഹുൽ ഗാന്ധിയും രംഗത്തെത്തി. ഒരു രാഷ്ട്രത്തലവനെ ലക്ഷ്യം വെച്ചുള്ള ആക്രമണം പരമാധികാരത്തിലേക്കുള്ള കടന്നുകയറ്റമാണെന്ന് അദ്ദേഹം പറഞ്ഞു. നിഷ്പക്ഷത ഉപേക്ഷിക്കുന്നത് അന്താരാഷ്ട്ര തലത്തിൽ ഇന്ത്യയുടെ പദവിക്ക് മങ്ങലേൽപ്പിക്കുമെന്നും, രാജ്യത്തിന്റെ താൽപ്പര്യങ്ങൾ സംരക്ഷിക്കുന്നതിൽ സർക്കാർ പരാജയപ്പെടുകയാണെന്നും രാഹുൽ ഗാന്ധി വ്യക്തമാക്കി.
The post ഖമേനി വധം! ഇന്ത്യയുടെ മൗനം രാജ്യത്തിന്റെ വിദേശനയത്തിന് തിരിച്ചടിയെന്ന് സോണിയ ഗാന്ധി; ഇറാൻ സഹായം ഓർമ്മിപ്പിച്ചു appeared first on Express Kerala.