മലയാളി പ്രേക്ഷകർക്ക് ഏറെ പ്രിയപ്പെട്ട നടി ലെന തന്റെ ജീവിതത്തിലെ പ്രതിസന്ധികളെയും ആത്മീയമായ ഉണർവിനെയും കുറിച്ച് മനസ് തുറക്കുന്നു. വിവാഹമോചനത്തിന് പിന്നാലെ കൊടൈക്കനാലിൽ വച്ച് ‘മാജിക് മഷ്റൂം’ പരീക്ഷിച്ചതും തുടർന്നുണ്ടായ സംഭവവികാസങ്ങളുമാണ് താരം വെളിപ്പെടുത്തിയത്. ആ പരീക്ഷണത്തിന് ശേഷം താൻ അനുഭവിച്ച മാനസിക മാറ്റങ്ങളെ കുടുംബാംഗങ്ങളും അന്നത്തെ ഭർത്താവും മാനസികരോഗമായി തെറ്റിദ്ധരിച്ചുവെന്നും, അതിന്റെ ഫലമായി തന്നെ നിർബന്ധപൂർവ്വം സൈക്യാട്രിക് ആശുപത്രിയിൽ പ്രവേശിപ്പിച്ചുവെന്നും ലെന രഞ്ജിനി ഹരിദാസുമായുള്ള അഭിമുഖത്തിൽ പറഞ്ഞു.
ആശുപത്രിയിൽ വച്ച് നൽകിയ കടുത്ത മരുന്നുകൾ (ട്രാൻക്വിലൈസറുകൾ) തന്നെ അബോധാവസ്ഥയിലാക്കിയെന്നും മസ്തിഷ്കം മരവിച്ച അവസ്ഥയിലേക്ക് എത്തിച്ചുവെന്നും താരം ഓർക്കുന്നു. സത്യത്തിൽ താൻ പരമമായ ചില സത്യങ്ങൾ കണ്ടെത്തിയ ആവേശത്തിലായിരുന്നുവെങ്കിലും ചുറ്റുമുള്ളവർക്ക് അത് മനസ്സിലാക്കാൻ സാധിച്ചില്ല. മരുന്നുകൾ പെട്ടെന്ന് നിർത്തുമ്പോഴുണ്ടാകുന്ന വിറയലും പാർശ്വഫലങ്ങളും കണ്ട് ഭ്രാന്ത് കൂടുകയാണെന്ന് അവർ വീണ്ടും വിലയിരുത്തി. ഏകദേശം 14 വർഷത്തോളം ഇത്തരം മരുന്നുകൾ കഴിക്കേണ്ടി വന്നത് തന്റെ ശാരീരികവും മാനസികവുമായ ആരോഗ്യത്തെ സാരമായി ബാധിച്ചു.
Also Read: റൊണാൾഡോയ്ക്കും മെസ്സിക്കും പിന്നാലെ കിം തേഹ്യുങ്; സൈനിക സേവനത്തിനിടയിലും ഗൂഗിൾ സെർച്ചിൽ വി-തരംഗം!
ഈ കാലഘട്ടത്തിൽ ഉണ്ടായ സാമ്പത്തിക തകർച്ചയും ലെനയെ തളർത്തി. 16 വയസ്സു മുതൽ ജോലി ചെയ്ത് പണം സമ്പാദിച്ചിരുന്ന ലെനയ്ക്ക് തന്റെ 24-ാം വയസ്സിൽ ബാങ്ക് ബാലൻസ് പൂജ്യം ആകുന്നത് കാണേണ്ടി വന്നു. മരുന്നുകളുടെ ഫലമായി 20 കിലോയോളം ഭാരം കുറയുകയും കടുത്ത വിഷാദത്തിലേക്കും ആത്മഹത്യാ ചിന്തകളിലേക്കും താൻ നീങ്ങുകയും ചെയ്തു. ആത്മീയമായ വലിയ തിരിച്ചറിവുകൾ ഉണ്ടാകുമ്പോൾ ഭൗതികമായ ലോകം തകർന്നടിയുമെന്ന് താൻ അക്ഷരാർത്ഥത്തിൽ അനുഭവിച്ചറിയുകയായിരുന്നുവെന്ന് ലെന വ്യക്തമാക്കുന്നു.
ജീവിതം ‘റോക്ക് ബോട്ടം’ എന്ന അവസ്ഥയിൽ എത്തിനിൽക്കുമ്പോഴാണ് അഭിനയത്തിലേക്കുള്ള മടങ്ങിവരവ് ലെനയ്ക്ക് തുണയായത്. യാദൃശ്ചികമെന്നോണം അന്ന് ലഭിച്ച സീരിയലിലെ കഥാപാത്രം ജീവിതത്തിൽ തകർന്നടിയുകയും സാമ്പത്തിക ബുദ്ധിമുട്ട് അനുഭവിക്കുകയും ചെയ്യുന്ന ഒരു പെൺകുട്ടിയുടേതായിരുന്നു. ആ കഥാപാത്രമായി അഭിനയിക്കുമ്പോൾ താൻ ഒഴുക്കിയ കണ്ണീർ യഥാർത്ഥ ജീവിതത്തിലെ സങ്കടങ്ങളിൽ നിന്നുള്ളതായിരുന്നു. ആ ജോലിയിലൂടെയാണ് താൻ വീണ്ടും സാമ്പത്തികമായി സ്വതന്ത്രയാകാനും സ്വന്തം കാലിൽ നിൽക്കാനും തുടങ്ങിയതെന്ന് ലെന വെളിപ്പെടുത്തി.
The post എനിക്ക് ഭ്രാന്തായിരുന്നില്ല, പക്ഷേ അവർ എന്നെ മരുന്നടിച്ച് ആശുപത്രിയിലാക്കി; നടി ലെനയുടെ ഞെട്ടിക്കുന്ന വെളിപ്പെടുത്തൽ! appeared first on Express Kerala.