ഇറാൻ നടത്തുന്ന ആക്രമണങ്ങൾക്കെതിരെ കുവൈത്ത് സ്വീകരിച്ച അതിശക്തമായ പ്രതിരോധ നടപടികളെക്കുറിച്ചും സൈനികർക്കുണ്ടായ നാശനഷ്ടങ്ങളെക്കുറിച്ചും പ്രതിരോധ മന്ത്രാലയം ഔദ്യോഗിക വിശദീകരണം നൽകി. സംഘർഷം ആരംഭിച്ചത് മുതൽ ഇതുവരെ ആകെ 178 ബാലിസ്റ്റിക് മിസൈലുകളും 384 ഡ്രോണുകളും സൈന്യം വിജയകരമായി തടഞ്ഞതായി മന്ത്രാലയ വക്താവ് കേണൽ സൗദ് അൽ-അത്വാൻ അറിയിച്ചു.
ഈ പ്രത്യാക്രമണ പ്രവർത്തനങ്ങൾക്കിടയിൽ കുവൈത്ത് സൈന്യത്തിലെ 27 അംഗങ്ങൾക്ക് പരിക്കേറ്റതായും മന്ത്രാലയം വെളിപ്പെടുത്തി. പരിക്കേറ്റവരുടെ ആരോഗ്യനില നിലവിൽ തൃപ്തികരമാണെന്നും, ഇതിൽ രണ്ടുപേർ ഇപ്പോഴും ആശുപത്രിയിൽ തീവ്രപരിചരണത്തിൽ തുടരുകയാണെന്നും വക്താവ് വ്യക്തമാക്കി. എന്നാൽ, കുവൈത്ത് നേവൽ സേനയിലെ രണ്ട് സൈനികർക്ക് ഈ പോരാട്ടങ്ങൾക്കിടയിൽ വീരമൃത്യു സംഭവിച്ചതായും മന്ത്രാലയം സ്ഥിരീകരിച്ചിട്ടുണ്ട്.
Also Read:ഖത്തർ എയർവേയ്സ് സർവീസുകൾ നിർത്തി; ഇന്ത്യയിലേക്ക് പ്രത്യേക വിമാനങ്ങളുമായി സ്പൈസ് ജെറ്റും ഇൻഡിഗോയും
രാജ്യത്തിന്റെ ആയുധസേന പൂർണ്ണ ജാഗ്രതയോടെ 24 മണിക്കൂറും സജ്ജമാണെന്നും എല്ലാ സംഭവവികാസങ്ങളും അതീവ സൂക്ഷ്മമായി നിരീക്ഷിച്ചുവരികയാണെന്നും അദ്ദേഹം കൂട്ടിച്ചേർത്തു. നിലവിലെ സാഹചര്യത്തിൽ പൗരന്മാരും പ്രവാസികളും ഔദ്യോഗിക ഉറവിടങ്ങളിൽ നിന്നുള്ള വിവരങ്ങൾ മാത്രം വിശ്വസിക്കണമെന്നും സോഷ്യൽ മീഡിയ വഴി പ്രചരിക്കുന്ന അഭ്യൂഹങ്ങളോ സ്ഥിരീകരിക്കാത്ത വീഡിയോകളോ പങ്കുവെക്കാതിരിക്കാൻ ശ്രദ്ധിക്കണമെന്നും മന്ത്രാലയം കർശന നിർദ്ദേശം നൽകി. ഓരോരുത്തരും ദേശീയ ഉത്തരവാദിത്തം പാലിച്ച് അതീവ ജാഗ്രതയോടെ ഇരിക്കണമെന്നാണ് മന്ത്രാലയത്തിന്റെ അഭ്യർത്ഥന.
The post കുവൈത്ത് പ്രതിരോധം ശക്തം; 178 മിസൈലുകളും 384 ഡ്രോണുകളും തകർത്തു! രണ്ട് നാവിക സൈനികർക്ക് വീരമൃത്യു appeared first on Express Kerala.