ഇറാൻ വ്യോമമേഖലയിൽ കടന്ന് അയ്യായിരത്തോളം ബോംബുകൾ വർഷിച്ചതായി ഇസ്രയേൽ പ്രതിരോധ സേന അവകാശപ്പെട്ടു. ഇറാന്റെ സൈനിക ശക്തിയെ തകർക്കാൻ ലക്ഷ്യമിട്ടുള്ള ഈ നീക്കത്തിന് പിന്നാലെ, ഇറാനിലെ രണ്ടായിരത്തോളം തന്ത്രപ്രധാന കേന്ദ്രങ്ങളിൽ തങ്ങളും ആക്രമണം നടത്തിയതായി അമേരിക്കൻ ഭരണകൂടം വ്യക്തമാക്കി. എന്നാൽ ഈ നീക്കങ്ങളെ നിസ്സാരമായി കാണാത്ത ഇറാൻ, ശക്തമായ പ്രത്യാക്രമണമാണ് നടത്തുന്നത്. ഏകദേശം 500 ബാലിസ്റ്റിക് മിസൈലുകളും രണ്ടായിരത്തോളം ഡ്രോണുകളും ഇറാൻ തിരിച്ചടിച്ചതായി അമേരിക്കൻ നേവി അഡ്മിറൽ ബ്രാഡ് കൂപ്പർ സ്ഥിരീകരിച്ചു.
അരാംകോയ്ക്ക് നേരെ ആക്രമണം; എണ്ണ ഉൽപാദന മേഖലയിൽ ആശങ്ക
ലോകത്തിലെ ഏറ്റവും വലിയ എണ്ണക്കമ്പനികളിലൊന്നായ സൗദി അറേബ്യയിലെ അരാംകോയുടെ ‘റാസ് തനുറ’ എണ്ണ ശുദ്ധീകരണശാലയ്ക്ക് നേരെ ഇറാൻ ഡ്രോൺ ആക്രമണം നടത്തി. ഇത് രണ്ടാം തവണയാണ് അരാംകോ ലക്ഷ്യം വെക്കപ്പെടുന്നത്. നിലവിൽ എണ്ണ ഉൽപാദനത്തിന് തടസ്സമില്ലെങ്കിലും മേഖലയിൽ കനത്ത സുരക്ഷാ ഭീഷണിയുണ്ട്. ഇതിന് പുറമെ സൗദിയിലെ സിഐഎ താവളത്തിലും ഇറാന്റെ ഡ്രോണുകൾ പതിച്ചതായി ഔദ്യോഗിക സ്ഥിരീകരണമുണ്ട്.
Also Read:ട്രംപിന്റെ ആത്മവിശ്വാസം! ഇറാനെതിരെയുള്ള സൈനിക നീക്കത്തിന് പത്തിൽ 15 മാർക്ക്
യുദ്ധത്തിന്റെ കനൽ അയൽരാജ്യങ്ങളിലേക്കും പടരുകയാണ്. യുഎഇയിൽ നടന്ന വിവിധ ആക്രമണങ്ങളിൽ വിദേശികളടക്കം 78 പേർക്ക് പരിക്കേൽക്കുകയും മൂന്ന് പേർ കൊല്ലപ്പെടുകയും ചെയ്തു. 129 ഡ്രോണുകളും മൂന്ന് മിസൈലുകളുമാണ് യുഎഇക്ക് നേരെ ഇറാൻ തൊടുത്തത്. ബഹ്റൈനെ ലക്ഷ്യമാക്കി 74 മിസൈലുകളും 95 ഡ്രോണുകളും ഇറാൻ അയച്ചു. ഇതോടെ മേഖലയിലെ വ്യോമ സുരക്ഷാ സംവിധാനങ്ങൾ അതീവ ജാഗ്രതയിലാണ്.
യുദ്ധം ഊർജ്ജ വിപണിയെയും ബാധിച്ചിരിക്കുകയാണ്. ഖത്തർ തങ്ങളുടെ പ്രകൃതിവാതക ഉൽപാദനം പൂർണ്ണമായും നിർത്തിവെച്ചു. ഇറാൻ സൈന്യത്തിന് വേണ്ടി ചാരവൃത്തി നടത്തിയ ഏതാനും പേരെ ഖത്തർ സുരക്ഷാ സേന അറസ്റ്റ് ചെയ്തിട്ടുണ്ട്. 10 ഡ്രോണുകളും 2 ക്രൂസ് മിസൈലുകളുമാണ് ഖത്തറിന് നേരെ ഇറാൻ പ്രയോഗിച്ചത്.
The post ഇറാൻ വ്യോമപാതയിൽ ഇസ്രയേലിന്റെ ബോംബ് വർഷം; മിസൈലുകളുമായി തിരിച്ചടിച്ച് ഇറാൻ appeared first on Express Kerala.
