ശ്രീലങ്കൻ തീരത്ത് തങ്ങളുടെ യുദ്ധക്കപ്പൽ മുക്കിയതിന് പിന്നാലെ അമേരിക്കയ്ക്ക് നേരെ ശക്തമായ തിരിച്ചടിയുമായി ഇറാൻ. വടക്കൻ പേർഷ്യൻ ഗൾഫിലൂടെ സഞ്ചരിക്കുകയായിരുന്ന അമേരിക്കൻ എണ്ണക്കപ്പലിന് നേരെ വ്യാഴാഴ്ച രാവിലെ തങ്ങളുടെ വ്യോമസേന ആക്രമണം നടത്തിയതായി ഇറാന്റെ സായുധസേനയായ ഐആർജിസി അവകാശപ്പെട്ടു. ആക്രമണത്തിന് പിന്നാലെ കപ്പലിന് തീപിടിച്ചതായും ഇറാന്റെ ഔദ്യോഗിക വാർത്താ ഏജൻസിയായ തസ്നിം റിപ്പോർട്ട് ചെയ്യുന്നു.
കഴിഞ്ഞ ദിവസം ഇറാൻ നാവികസേനയുടെ ‘ഇറിസ് ദേന’ എന്ന യുദ്ധക്കപ്പൽ അമേരിക്കൻ അന്തർവാഹിനി ആക്രമണത്തിൽ തകർന്നിരുന്നു. 87 നാവികർ കൊല്ലപ്പെട്ട ഈ സംഭവത്തിന് അമേരിക്ക കനത്ത വില നൽകേണ്ടിവരുമെന്ന് ഇറാൻ വിദേശകാര്യമന്ത്രി മുന്നറിയിപ്പ് നൽകിയിരുന്നു. ഇതിന് പിന്നാലെയാണ് മേഖലയിലൂടെയുള്ള അമേരിക്കൻ, ഇസ്രയേൽ, യൂറോപ്യൻ കപ്പലുകളെ നിരീക്ഷിക്കുകയാണെന്നും അവയെ കടന്നുപോകാൻ അനുവദിക്കില്ലെന്നും ഐആർജിസി വ്യക്തമാക്കിയത്.
യുദ്ധസമയത്ത് അന്താരാഷ്ട്ര നിയമങ്ങൾ പാലിച്ച് ഹോർമുസ് കടലിടുക്ക് വഴിയുള്ള ഗതാഗതം നിയന്ത്രിക്കാൻ തങ്ങൾക്ക് അധികാരമുണ്ടെന്നാണ് ഇറാന്റെ വാദം. നിലവിലെ സാഹചര്യം പശ്ചിമേഷ്യയിൽ വലിയൊരു യുദ്ധഭീതിയാണ് സൃഷ്ടിച്ചിരിക്കുന്നത്. എണ്ണക്കപ്പലുകൾക്ക് നേരെയുള്ള ആക്രമണം ആഗോള വിപണിയിലും വലിയ ആശങ്കകൾക്ക് കാരണമായിട്ടുണ്ട്.
The post യുദ്ധക്കപ്പൽ മുക്കിയതിന് ഇറാന്റെ പകരംവീട്ടൽ? അമേരിക്കൻ എണ്ണക്കപ്പലിന് നേരെ ആക്രമണം; കടലിൽ തീപിടിത്തം appeared first on Express Kerala.
