ശ്രീലങ്കൻ തീരത്ത് ഇറാനിയൻ കപ്പൽ അമേരിക്കൻ അന്തർവാഹിനി തകർത്ത സംഭവത്തിൽ കേന്ദ്ര സർക്കാരിനെതിരെ രൂക്ഷമായ ഭാഷയിലാണ് കോൺഗ്രസ് വിമർശനം ഉയർത്തിയിരിക്കുന്നത്. ഇന്ത്യയുടെ അതിഥിയായി എത്തിയ കപ്പലിനെ സംരക്ഷിക്കാൻ കഴിയാത്തത് രാജ്യത്തിന് നാണക്കേടാണെന്ന് കോൺഗ്രസ് ആരോപിച്ചു. സംഘർഷം ഇന്ത്യയുടെ അതിർത്തിക്ക് തൊട്ടടുത്തെത്തിയിട്ടും പ്രധാനമന്ത്രി നരേന്ദ്ര മോദി മൗനം പാലിക്കുന്നത് ഭീരുത്വമാണെന്ന് രാഹുൽ ഗാന്ധി പരിഹസിച്ചു. പ്രധാനമന്ത്രി മറ്റാരൊക്കെയോ നിയന്ത്രിക്കുന്ന പാവയായി മാറിയെന്നും അദ്ദേഹം കുറ്റപ്പെടുത്തി.
അമേരിക്കയ്ക്ക് മുന്നിലുള്ള ഈ കീഴടങ്ങൽ ഇന്ത്യയുടെ അന്തസ്സ് ഇല്ലാതാക്കുന്നതാണെന്ന് കോൺഗ്രസ് വക്താവ് പവൻ ഖേര പറഞ്ഞു. വിവാദമായ എപ്സ്റ്റീൻ ഗ്യാങ്ങിന്റെയും ഗൗതം അദാനിയുടെയും സമ്മർദ്ദത്തിലാണ് മോദിയെന്നും, അതുകൊണ്ടാണ് നിർണ്ണായകമായ ഇത്തരം വിഷയങ്ങളിൽ അദ്ദേഹം പ്രതികരിക്കാത്തതെന്നും ഖേര ആരോപിച്ചു. വിദേശകാര്യ മന്ത്രിയും പെട്രോളിയം മന്ത്രിയും എവിടെയാണെന്ന് പോലും അറിയാത്ത അവസ്ഥയാണെന്നും ഭരണകൂടം പൂർണ്ണമായും നിശബ്ദതയിലാണെന്നും അദ്ദേഹം കൂട്ടിച്ചേർത്തു.
Aslo Read: ഇന്ത്യക്ക് യുഎൻ സുരക്ഷാ കൗൺസിലിൽ സ്ഥിരാംഗത്വം വേണം; ശക്തമായ പിന്തുണയുമായി ഫിൻലാൻഡ്
ഇന്ത്യൻ മഹാസമുദ്ര മേഖലയിൽ മുപ്പത്തിയെട്ടോളം കപ്പലുകളും ആയിരക്കണക്കിന് ഇന്ത്യൻ നാവികരും കുടുങ്ങിക്കിടക്കുമ്പോൾ സർക്കാർ കാട്ടുന്ന ഈ നിസ്സംഗത കുറ്റകരമാണെന്നാണ് കോൺഗ്രസിന്റെ പക്ഷം. അതിഥിയായെത്തിയ ഇറാൻ കപ്പലിനെ അമേരിക്ക ഇന്ത്യൻ മഹാസമുദ്രത്തിൽ മുക്കിയിട്ടും ഒന്നും ചെയ്യാൻ കഴിയാത്തത് ഇന്ത്യയുടെ പ്രതിരോധ ശേഷിയെക്കുറിച്ചുള്ള ലോകത്തിന്റെ വിശ്വാസം തകർക്കുമെന്നും പവൻ ഖേര വിമർശിച്ചു.
The post ഇറാൻ കപ്പലിനെ അമേരിക്ക മുക്കി; ഇന്ത്യ നോക്കിനിന്നു! പ്രധാനമന്ത്രിയുടെ മൗനം നാണക്കേടെന്ന് രാഹുൽ ഗാന്ധി appeared first on Express Kerala.
