പശ്ചിമേഷ്യയിൽ യുദ്ധം കടുക്കുന്നു! ഖമേനിയുടെ എല്ലാ പിൻഗാമികളെയും വേട്ടയാടുമെന്ന് ഇസ്രയേൽ

കൊല്ലപ്പെട്ട ഇറാൻ പരമോന്നത നേതാവ് അലി ഖമേനിയുടെ പിൻഗാമിയായി വരുന്ന ഓരോരുത്തരെയും വേട്ടയാടുമെന്ന് ഇസ്രയേൽ ഡിഫൻസ് ഫോഴ്‌സ് മുന്നറിയിപ്പ് നൽകി. പുതിയ നേതാവിനെ തിരഞ്ഞെടുക്കാൻ ചുമതലപ്പെട്ട ‘അസംബ്ലി ഓഫ് എക്‌സ്‌പെർട്‌സ്’ സമിതിയിലെ അംഗങ്ങളെയും ഇസ്രയേൽ ലക്ഷ്യം വെക്കും. ഖമേനിയുടെ മകൻ മുജ്തബ ഖമേനി അടുത്ത നേതാവായേക്കും എന്ന റിപ്പോർട്ടുകൾക്കിടെയാണ്, പേർഷ്യൻ ഭാഷയിൽ എക്‌സിലൂടെ ഇസ്രയേൽ ഈ മുന്നറിയിപ്പ് നൽകിയത്. ഇറാന്റെ നേതൃത്വത്തെ പൂർണ്ണമായും ഇല്ലാതാക്കുന്നത് വരെ യുദ്ധം തുടരുമെന്നാണ് ഇസ്രയേലിന്റെ പ്രഖ്യാപനം.

നിലവിൽ ഇറാനിലെ ആകാശത്തിന്റെ നിയന്ത്രണം തങ്ങൾക്കാണെന്ന് അവകാശപ്പെട്ട ഇസ്രയേൽ പ്രധാനമന്ത്രി ബെഞ്ചമിൻ നെതന്യാഹു, ഇറാന്റെ എണ്ണ സംഭരണശാലകൾക്ക് നേരെയും ശക്തമായ ആക്രമണം നടത്തി. ഇസ്രയേലും അമേരിക്കയും ചേർന്ന് ഇറാനിൽ വ്യോമാക്രമണം കടുപ്പിച്ചിരിക്കുകയാണ്. ഇതിനിടെ ലെബനൻ തലസ്ഥാനമായ ബെയ്റൂട്ടിലെ ഒരു ഹോട്ടലിൽ തമ്പടിച്ചിരുന്ന ഇറാന്റെ ഖുദ്‌സ് ഫോഴ്‌സ് കമാൻഡർമാരെ ലക്ഷ്യം വെച്ചും ഇസ്രയേൽ മിസൈൽ ആക്രമണം നടത്തി.

Also Read: ബഹ്‌റൈനിലെ അമേരിക്കൻ നാവിക താവളത്തിന് നേരെ ഇറാന്റെ മിസൈൽ ആക്രമണം; 21 സൈനികർ കൊല്ലപ്പെട്ടു

ഇറാനെതിരെയുള്ള പ്രതിരോധ പ്രവർത്തനങ്ങൾക്കായി അമേരിക്ക തങ്ങളുടെ സഖ്യകക്ഷിയായ ബ്രിട്ടന്റെ സൈനിക താവളങ്ങളും ഉപയോഗിച്ചു തുടങ്ങി. ഇംഗ്ലണ്ടിലെ ഫെയർഫോർഡ്, ഇന്ത്യൻ മഹാസമുദ്രത്തിലെ ഡീഗോ ഗാർഷ്യ എന്നീ താവളങ്ങൾ വഴി ഇറാന്റെ മിസൈലുകളെ തടയാനുള്ള നടപടികൾ ആരംഭിച്ചതായി ബ്രിട്ടീഷ് പ്രതിരോധ മന്ത്രാലയം സ്ഥിരീകരിച്ചു. പശ്ചിമേഷ്യയിലെ സംഘർഷം പുതിയ തലങ്ങളിലേക്ക് വ്യാപിക്കുമ്പോൾ, അന്താരാഷ്ട്ര സൈനിക താവളങ്ങളുടെ ഉപയോഗം മേഖലയിൽ വലിയ ചലനങ്ങളാണ് ഉണ്ടാക്കുന്നത്.

The post പശ്ചിമേഷ്യയിൽ യുദ്ധം കടുക്കുന്നു! ഖമേനിയുടെ എല്ലാ പിൻഗാമികളെയും വേട്ടയാടുമെന്ന് ഇസ്രയേൽ appeared first on Express Kerala.