ടി20 ലോകകപ്പിലെ ഐതിഹാസിക വിജയത്തിന് പിന്നാലെ ഇന്ത്യൻ ക്രിക്കറ്റ് ടീമിനെ വാനോളം പുകഴ്ത്തി മുൻ ഇംഗ്ലണ്ട് ക്യാപ്റ്റൻ മൈക്കൽ ആതർട്ടൺ. ഫൈനലിൽ ന്യൂസിലൻഡിനെ 96 റൺസിന് തകർത്ത് കിരീടം നിലനിർത്തിയ ഇന്ത്യ, ഒരേസമയം മൂന്ന് ഐസിസി ട്രോഫികൾ സ്വന്തമാക്കാനുള്ള സുവർണ്ണാവസരത്തിന്റെ പടിവാതിൽക്കലാണെന്ന് അദ്ദേഹം നിരീക്ഷിച്ചു.
കഴിഞ്ഞ വർഷം ദുബായിൽ നടന്ന ചാമ്പ്യൻസ് ട്രോഫി ഫൈനലിലും ഇപ്പോൾ ടി20 ലോകകപ്പിലും ന്യൂസിലൻഡിനെ തന്നെ കീഴടക്കി ഇന്ത്യ കിരീടം ചൂടി. 2027-ൽ ദക്ഷിണാഫ്രിക്ക, സിംബാബ്വെ, നമീബിയ എന്നിവിടങ്ങളിലായി നടക്കാനിരിക്കുന്ന ഏകദിന ലോകകപ്പ് കൂടി നേടാനായാൽ, ക്രിക്കറ്റ് ചരിത്രത്തിൽ മൂന്ന് പ്രധാന പരിമിത ഓവർ കിരീടങ്ങളും ഒരേസമയം കൈവശം വെക്കുന്ന ആദ്യ ടീമായി ഇന്ത്യ മാറുമെന്ന് ആതർട്ടൺ ചൂണ്ടിക്കാട്ടി.
Also Read:കളിക്കളത്തിൽ വിക്കറ്റ് വേട്ട, സോഷ്യൽ മീഡിയയിൽ രംഗൻ ചേട്ടൻ; വൈറലായി വരുൺ ചക്രവർത്തി
“കഴിഞ്ഞ ഐസിസി ടൂർണമെന്റുകളിലായി കളിച്ച 32 മത്സരങ്ങളിൽ 30 എണ്ണത്തിലും ഇന്ത്യ വിജയിച്ചു. ഏകദിന ലോകകപ്പ് ഫൈനലിൽ ഓസ്ട്രേലിയയോടും ഈ ലോകകപ്പിലെ ഗ്രൂപ്പ് ഘട്ടത്തിൽ ദക്ഷിണാഫ്രിക്കയോടും മാത്രമാണ് അവർ പരാജയപ്പെട്ടത്. വൈറ്റ് ബോൾ ക്രിക്കറ്റിൽ ഇന്ത്യയിപ്പോൾ അജയ്യരാണ്,” അദ്ദേഹം കൂട്ടിച്ചേർത്തു.
സൂര്യകുമാർ യാദവിന്റെ നേതൃത്വത്തിൽ ഇറങ്ങിയ ടീം ഇന്ത്യ ആധികാരികമായ പ്രകടനമാണ് 2026 ലോകകപ്പിൽ പുറത്തെടുത്തത്. സൂപ്പർ എട്ടിൽ ദക്ഷിണാഫ്രിക്കയോട് തോറ്റത് സെമി പ്രതീക്ഷകൾക്ക് വെല്ലുവിളിയായെങ്കിലും, ഈഡൻ ഗാർഡൻസിൽ വെസ്റ്റ് ഇൻഡീസിനെതിരെ സഞ്ജു സാംസൺ നേടിയ തകർപ്പൻ 97* റൺസ് ഇന്ത്യയെ വിജയത്തിലേക്കും സെമിയിലേക്കും നയിച്ചു. ഫൈനലിൽ 255 റൺസെന്ന റെക്കോർഡ് സ്കോർ പടുത്തുയർത്തിയ ഇന്ത്യ, ന്യൂസിലൻഡിനെ നിഷ്പ്രഭമാക്കിയാണ് സ്വന്തം മണ്ണിൽ തുടർച്ചയായ രണ്ടാം ടി20 ലോകകപ്പ് കിരീടം ഉയർത്തിയത്.
The post ‘ഇന്ത്യയെ തൊടാൻ ആരുമില്ല’; ലോകകപ്പ് വിജയത്തിന് പിന്നാലെ ടീം ഇന്ത്യയെ പുകഴ്ത്തി മൈക്കൽ ആതർട്ടൺ appeared first on Express Kerala.
