സ്വർണവിലയിൽ വീണ്ടും ഇടിവ്; ഉപഭോക്താക്കൾക്ക് ആശ്വാസമായി

സംസ്ഥാനത്ത് സ്വർണവിലയിൽ വീണ്ടും കുറവ് രേഖപ്പെടുത്തി. 22 കാരറ്റ് സ്വർണത്തിന് ഗ്രാമിന് 45 രൂപ കുറഞ്ഞ് 14,870 രൂപയായും, ഒരു പവൻ സ്വർണത്തിന് 1,18,960 രൂപയായുമാണ് ഇന്ന് വ്യാപാരം നടക്കുന്നത്. കഴിഞ്ഞ കുറച്ചു ദിവസങ്ങളായി വിപണിയിൽ ദൃശ്യമാകുന്ന ഈ ഇടിവ് ഉപഭോക്താക്കൾക്ക് വലിയ ആശ്വാസമാണ് നൽകുന്നത്. ജനുവരിയിൽ രേഖപ്പെടുത്തിയ പവന് 1,31,160 രൂപ എന്ന സർവകാല റെക്കോർഡിൽ നിന്നാണ് വില ഇപ്പോൾ താഴേക്ക് വരുന്നത്. സ്വർണത്തോടൊപ്പം വെള്ളി വിലയിലും മാറ്റങ്ങൾ പ്രകടമാണ്. നിലവിൽ ഒരു ഗ്രാം വെള്ളിക്ക് 280 രൂപ എന്ന നിരക്കിലാണ് വ്യാപാരം.

സാധാരണയായി യുദ്ധസാഹചര്യങ്ങളിൽ സുരക്ഷിത നിക്ഷേപം എന്ന നിലയിൽ സ്വർണവില ഉയരാറാണ് പതിവ്. പശ്ചിമേഷ്യയിലെ ഇറാൻ-ഇസ്രയേൽ തർക്കങ്ങളും ലബനൻ അതിർത്തിയിലെ അസ്ഥിരതയും വിപണിയെ സ്വാധീനിക്കുന്നുണ്ടെങ്കിലും സ്വർണവില കുറയാൻ പ്രധാന കാരണം അമേരിക്കൻ ഡോളർ കരുത്താർജിച്ചതാണ്. ക്രൂഡ് ഓയിൽ വിലയിലുണ്ടായ വർധനവും വിവിധ രാജ്യങ്ങൾ പലിശ നിരക്കുകളിൽ വരുത്തിയ മാറ്റങ്ങളും സ്വർണത്തേക്കാൾ ഡോളറിന് മൂല്യം കൂടാൻ കാരണമായി. ഇതാണ് പശ്ചിമേഷ്യൻ സംഘർഷങ്ങൾക്കിടയിലും സ്വർണവില താഴാൻ ഇടയാക്കിയത്.

Also Read: ക്രൂഡ് ഓയിൽ വിലയിൽ വൻ ചാഞ്ചാട്ടം; ഇന്ത്യൻ വിപണിയിൽ പെട്രോൾ, ഡീസൽ നിരക്കുകൾ ഇങ്ങനെ

മാർച്ച് മാസത്തിന്റെ തുടക്കത്തിൽ സ്വർണവില ഉയർന്ന നിലയിലായിരുന്നെങ്കിലും പിന്നീട് വലിയ തോതിലുള്ള ചാഞ്ചാട്ടങ്ങളാണ് വിപണിയിൽ കണ്ടത്. മാർച്ച് ഒന്നിന് പവന് 1,26,920 രൂപ എന്ന ഉയർന്ന നിരക്കിലായിരുന്ന സ്വർണം, മാർച്ച് ആറായപ്പോഴേക്കും 1,18,160 രൂപ എന്ന മാസത്തെ ഏറ്റവും കുറഞ്ഞ നിരക്കിലേക്ക് എത്തി. പശ്ചിമേഷ്യൻ സംഘർഷം വരും ദിവസങ്ങളിൽ കൂടുതൽ വഷളായാൽ സ്വർണവിലയിൽ വീണ്ടും അപ്രതീക്ഷിത മാറ്റങ്ങൾ ഉണ്ടായേക്കാമെന്നാണ് സാമ്പത്തിക വിദഗ്ധരുടെ വിലയിരുത്തൽ. ആഡംബര വിപണിയെയും ഗൾഫിലെ റമദാൻ വിപണിയെയും ഈ അസ്ഥിരത കാര്യമായി ബാധിച്ചിട്ടുണ്ട്.

The post സ്വർണവിലയിൽ വീണ്ടും ഇടിവ്; ഉപഭോക്താക്കൾക്ക് ആശ്വാസമായി appeared first on Express Kerala.