ഇറാൻ ഭരണകൂടം തകരില്ല; വിള്ളലുകളില്ലെന്ന് അമേരിക്കൻ രഹസ്യാന്വേഷണ റിപ്പോർട്ട്

ഇറാൻ ഭരണകൂടത്തിനുള്ളിൽ വിള്ളലുകളില്ലെന്നും രാജ്യം ഇപ്പോഴും സംഘടിതമായി തുടരുകയാണെന്നും വെളിപ്പെടുത്തിയിരിക്കുകയാണ് അമേരിക്ക. ഇതിന്റെ രഹസ്യാന്വേഷണ റിപ്പോർട്ടുകൾ പുറത്തുവന്നു. അമേരിക്കയും ഇസ്രയേലും സംയുക്തമായി നടത്തുന്ന രൂക്ഷമായ സൈനിക നീക്കം രണ്ടാഴ്ച പിന്നിടുമ്പോഴാണ്, ഇറാന്റെ തകർച്ച ഉടനെങ്ങും സംഭവിക്കില്ലെന്ന വിലയിരുത്തൽ പുറത്തുവരുന്നത്. യുദ്ധത്തിന്റെ പ്രാരംഭ ഘട്ടത്തിൽ തന്നെ പരമോന്നത നേതാവ് അയത്തുള്ള അലി ഖമീനിയെയും ഐ.ആർ.ജി.സി.യുടെ ഉന്നത കമാൻഡർമാരെയും വധിക്കാൻ സഖ്യസേനയ്ക്ക് സാധിച്ചിരുന്നു. എന്നാൽ ഈ കനത്ത ആഘാതത്തിലും പകച്ചുനിൽക്കാതെ, അടിയന്തരമായി രൂപീകരിച്ച ഇടക്കാല നേതൃത്വവും റെവലൂഷണറി ഗാർഡും ചേർന്ന് രാജ്യത്തിന്റെ നിയന്ത്രണം തിരിച്ചുപിടിക്കുകയായിരുന്നു.

യുദ്ധം വഴി ഇറാന്റെ മതഭരണകൂടത്തെ പൂർണ്ണമായി പുറത്താക്കാൻ കഴിയുമോ എന്ന കാര്യത്തിൽ ഇസ്രയേൽ നേതൃത്വത്തിനും ഇപ്പോൾ സംശയമുണ്ട്. ഭരണകൂടത്തിന് ജനതയ്ക്കുമേൽ ഇപ്പോഴും ശക്തമായ സ്വാധീനമുണ്ടെന്നാണ് രഹസ്യ ചർച്ചകളിൽ ഇസ്രയേൽ ഉദ്യോഗസ്ഥർ സമ്മതിക്കുന്നത്. അതേസമയം, യുദ്ധം നീണ്ടുപോകുന്നത് ആഗോള എണ്ണവിലയിൽ വലിയ വർധനവിന് കാരണമായിട്ടുണ്ട്. ഇത് അമേരിക്കയിൽ ട്രംപ് സർക്കാരിന് മേൽ വലിയ രാഷ്ട്രീയ സമ്മർദ്ദം സൃഷ്ടിക്കുന്നുണ്ടെങ്കിലും, ഇറാന്റെ നിലപാടുകൾ കടുത്തതായതിനാൽ യുദ്ധത്തിന് അമേരിക്ക സ്വീകാര്യമായ ഒരു അന്ത്യം കണ്ടെത്തുക എന്നത് നിലവിൽ ബുദ്ധിമുട്ടേറിയ കാര്യമാണ്.

Also Read:ഹോർമുസ് കുരുക്കിൽ ലോകം; ഒടുവിൽ റഷ്യ തന്നെ രക്ഷകൻ! അമേരിക്കൻ ഉപരോധങ്ങളിൽ വൻ വിട്ടുവീഴ്ച

ഇതിനിടെ, ഇറാന്റെ പുതിയ പരമോന്നത നേതാവായി ചുമതലയേറ്റ അയത്തുള്ള മുജ്താബ ഖമേനി തന്റെ ആദ്യ സന്ദേശം പുറത്തുവിട്ടു. വ്യോമാക്രമണത്തിൽ പരിക്കേറ്റ അദ്ദേഹം നേരിട്ട് പ്രത്യക്ഷപ്പെട്ടില്ലെങ്കിലും ദേശീയ ടെലിവിഷനിലൂടെ വായിച്ച സന്ദേശത്തിൽ കടുത്ത പോരാട്ടവീര്യമാണ് പ്രകടമായത്. ലോകത്തെ എണ്ണനീക്കത്തിന്റെ ജീവനാഡിയായ ഹോർമുസ് കടലിടുക്ക് അടച്ചിടുന്നത് തുടരുമെന്നും, തങ്ങളുടെ നേതാക്കളുടെ ചോരയ്ക്ക് പകരം വീട്ടുമെന്നും അദ്ദേഹം പ്രഖ്യാപിച്ചു. ഗൾഫ് രാജ്യങ്ങളിൽ നിന്ന് അമേരിക്കൻ സൈന്യം പിന്മാറണമെന്നും അദ്ദേഹം ആവശ്യപ്പെട്ടു.

എണ്ണവില ഉയരുന്നതിനെക്കുറിച്ച് പ്രതികരിച്ച അമേരിക്കൻ പ്രസിഡന്റ് ഡോണൾഡ് ട്രംപ്, ഇത് അമേരിക്കയ്ക്ക് സാമ്പത്തികമായി ഗുണകരമാണെന്ന നിലപാടാണ് സ്വീകരിച്ചത്. ലോകത്തെ ഏറ്റവും വലിയ എണ്ണ ഉത്പാദക രാജ്യമെന്ന നിലയിൽ വിലക്കയറ്റം അമേരിക്കക്ക് പണമുണ്ടാക്കാൻ സഹായിക്കുമെന്ന് അദ്ദേഹം ട്രൂത്ത് സോഷ്യലിൽ കുറിച്ചു. എണ്ണവിലയേക്കാൾ തനിക്ക് പ്രധാനം ഇറാനിലെ ഭരണകൂടം ആണവായുധങ്ങൾ സ്വന്തമാക്കുന്നത് തടയുക എന്നതാണെന്നും അദ്ദേഹം വ്യക്തമാക്കി.

The post ഇറാൻ ഭരണകൂടം തകരില്ല; വിള്ളലുകളില്ലെന്ന് അമേരിക്കൻ രഹസ്യാന്വേഷണ റിപ്പോർട്ട് appeared first on Express Kerala.