കൊച്ചിക്ക് ടൂറിസം ഉണർവ്! ആലങ്ങാട് തീർത്ഥാടന സർക്യൂട്ടിനും ആലുവ പാലം നവീകരണത്തിനുമായി 3.49 കോടി

എറണാകുളം ജില്ലയിലെ വിനോദസഞ്ചാര മേഖലയ്ക്ക് വലിയ ഉണർവ് പകർന്ന് രണ്ട് പ്രധാന പദ്ധതികൾക്കായി സംസ്ഥാന സർക്കാർ 3.49 കോടി രൂപയുടെ ഭരണാനുമതി നൽകി. കളമശ്ശേരി മണ്ഡലത്തിലെ ആലങ്ങാട് തീർത്ഥാടന ടൂറിസം സർക്യൂട്ടിനായി 2.01 കോടി രൂപയും, ആലുവ പാലത്തിന്റെ സൗന്ദര്യവൽക്കരണത്തിനും ദീപാലങ്കാരത്തിനുമായി 1.47 കോടി രൂപയുമാണ് അനുവദിച്ചത്. ടൂറിസം വകുപ്പിന്റെ പുതിയ നയങ്ങൾക്കനുസരിച്ച് ജില്ലയിലെ വിനോദസഞ്ചാര സാധ്യതകൾ വർധിപ്പിക്കാനാണ് ഈ തുക വിനിയോഗിക്കുക.

ആലങ്ങാട് പ്രദേശത്തെ വിവിധ മതസൗഹാർദ്ദ കേന്ദ്രങ്ങളെയും തീർത്ഥാടന കേന്ദ്രങ്ങളെയും പരസ്പരം ബന്ധിപ്പിക്കുന്നതാണ് ‘ആലങ്ങാട് പിൽഗ്രിം ടൂറിസം സർക്യൂട്ട്’. ഇവിടങ്ങളിലെത്തുന്ന ആഭ്യന്തര തീർത്ഥാടകർക്ക് കൂടുതൽ അടിസ്ഥാന സൗകര്യങ്ങൾ ഒരുക്കുന്നതിനും പ്രദേശത്തെ ഒരു പ്രധാന സാംസ്കാരിക-പൈതൃക കേന്ദ്രമായി ഉയർത്തുന്നതിനും ഈ പദ്ധതി ലക്ഷ്യമിടുന്നു. ഇതിലൂടെ പ്രദേശത്തെ വിനോദസഞ്ചാര മേഖലയ്ക്ക് പുതിയൊരു മുഖച്ഛായ കൈവരുമെന്നാണ് പ്രതീക്ഷിക്കുന്നത്.

Also Read: വേദനിക്കുന്നവരുടെ സങ്കടം നമ്മുടെ കൂടി വേദനയാണ്; എം. സ്വരാജ്

സംസ്ഥാന സർക്കാരിന്റെ ഡിസൈൻ പോളിസിയുടെ ഭാഗമായി പാലങ്ങളെ ദീപാലങ്കൃതമാക്കുന്ന പദ്ധതിയിലാണ് ആലുവ പാലത്തെ ഉൾപ്പെടുത്തിയിരിക്കുന്നത്. പാലത്തിലെ പെയിന്റിംഗ്, ആകർഷകമായ ലൈറ്റിംഗ് ജോലികൾ എന്നിവ പൂർത്തിയാകുന്നതോടെ ആലുവ മണപ്പുറം മേഖലയിലെ രാത്രികാല വിനോദസഞ്ചാര സാധ്യതകൾ വർധിക്കും. കൊച്ചിയിലെത്തുന്ന ടൂറിസ്റ്റുകളെ കൂടുതൽ ആകർഷിക്കാൻ ഈ പദ്ധതികൾക്ക് കഴിയുമെന്ന് ടൂറിസം മന്ത്രി പി.എ. മുഹമ്മദ് റിയാസ് വ്യക്തമാക്കി.

The post കൊച്ചിക്ക് ടൂറിസം ഉണർവ്! ആലങ്ങാട് തീർത്ഥാടന സർക്യൂട്ടിനും ആലുവ പാലം നവീകരണത്തിനുമായി 3.49 കോടി appeared first on Express Kerala.