പബ്ലിക് വൈഫൈ ഉപയോഗിക്കുമ്പോൾ ഈ അബദ്ധങ്ങൾ ഒഴിവാക്കാം! നിങ്ങളുടെ ഡാറ്റ സുരക്ഷിതമാക്കാൻ വഴികൾ

റെയിൽവേ സ്റ്റേഷനുകളിലും വിമാനത്താവളങ്ങളിലും ലഭ്യമാകുന്ന സൗജന്യ വൈഫൈ കണക്ഷനുകൾ യാത്രക്കാർക്ക് വലിയൊരു ആശ്വാസം തന്നെയാണ്. സുരക്ഷാ മുൻകരുതലുകളില്ലാതെ ഇത്തരം പബ്ലിക് നെറ്റ്‌വർക്കുകളെ ആശ്രയിക്കുന്നത് നിങ്ങളുടെ സ്വകാര്യ വിവരങ്ങളും ബാങ്കിംഗ് രേഖകളും സൈബർ തട്ടിപ്പുകാർക്ക് മുന്നിൽ തുറന്നുവെക്കുന്നതിന് തുല്യമാണ്. നമുക്ക് നിസ്സാരമെന്ന് തോന്നുന്ന അശ്രദ്ധകൾ വലിയ സാമ്പത്തിക നഷ്ടങ്ങൾക്കും ഡാറ്റാ ചോർച്ചയ്ക്കും കാരണമായേക്കാം. കൂടാതെ യാത്രയ്ക്കിടയിൽ വൈഫൈ ഉപയോഗിക്കുമ്പോൾ ഓരോ യാത്രികനും കൃത്യമായ ജാഗ്രത പുലർത്തേണ്ടതുണ്ട്. ഔദ്യോഗിക നെറ്റ്‌വർക്കുകൾക്ക് സമാനമായ പേരുകളിൽ വ്യാജ വൈഫൈ സിഗ്നലുകൾ നിർമ്മിച്ച് ഉപയോക്താക്കളെ കുടുക്കുക എന്നതാണ് ഹാക്കർമാരുടെ പ്രധാന രീതി.

വൈഫൈ കണക്ട് ചെയ്യുമ്പോൾ അനാവശ്യമായ പെർമിഷനുകൾ ചോദിക്കുന്നുണ്ടെങ്കിൽ ആ നെറ്റ്‌വർക്ക് ഒഴിവാക്കുന്നതാണ് ബുദ്ധി. കൂടാതെ, പേജുകൾ ലോഡ് ചെയ്യാൻ അമിതമായി സമയമെടുക്കുന്നതും ഒരു അപായസൂചനയായി കരുതണം. ഫോണിലെ ‘ഓട്ടോ ജോയിൻ ഫീച്ചർ ഓഫ് ചെയ്യുന്നതാണ് ഏറ്റവും സുരക്ഷിതമായ മാർഗ്ഗം. ഇത് നിങ്ങൾ അറിയാതെ തന്നെ ഫോൺ അപകടകരമായ വൈഫൈ സിഗ്നലുകളുമായി കണക്ട് ആകുന്നത് തടയും. നമ്മൾ ആപ്പുകൾ ഉപയോഗിക്കാത്ത സമയത്ത് പോലും പശ്ചാത്തലത്തിൽ വിവരങ്ങൾ കൈമാറാൻ സാധ്യതയുണ്ട്. ഇത് നിയന്ത്രിക്കാനായി ‘പ്രൈവസി ഫയർവാൾ’ ആപ്പുകൾ ഇൻസ്റ്റാൾ ചെയ്യുന്നത് ഗുണകരമാകും. ബ്രൗസിംഗ് കൂടുതൽ സുരക്ഷിതമാക്കാൻ ബ്രൗസറിലെ ‘ഡിഎൻഎസ് ഓവർ എച്ച്ടിടിപി’ സംവിധാനം പ്രയോജനപ്പെടുത്താം. സന്ദർശിക്കുന്ന വെബ്സൈറ്റുകളുടെ വിവരങ്ങൾ എൻക്രിപ്റ്റ് ചെയ്യുന്നതിലൂടെ ഹാക്കർമാർ നിങ്ങളെ വ്യാജ സൈറ്റുകളിലേക്ക് വഴിതിരിച്ചുവിടുന്നത് ഒരു പരിധിവരെ തടയാൻ ഇതിലൂടെ സാധിക്കും.

Also Read: വാട്‌സ്ആപ്പ് സുരക്ഷ! നിങ്ങളുടെ ഡിജിറ്റൽ ജീവിതം എത്രത്തോളം സുരക്ഷിതമാണ്?

സൗജന്യ വൈഫൈ ഉപയോഗിക്കുമ്പോൾ നിങ്ങളുടെ ബാങ്ക് വിവരങ്ങൾ ചോരാൻ സാധ്യതയുള്ളതിനാൽ പണമിടപാടുകൾ പരമാവധി ഒഴിവാക്കുക. അത്യാവശ്യ ഘട്ടങ്ങളിൽ വിശ്വസനീയമായ വിപിഎൻ സേവനങ്ങൾ ഉപയോഗിക്കുന്നത് ഡാറ്റ സുരക്ഷിതമാക്കാൻ സഹായിക്കും. പബ്ലിക് വൈഫൈ ഉപയോഗം കഴിഞ്ഞാലുടൻ കണക്ഷൻ വിച്ഛേദിക്കാനും ‘ഫോർഗെറ്റ് നെറ്റ്‌വർക്ക്’ നൽകാനും മറക്കരുത്. സൈബർ ലോകത്തെ ഇത്തരം ചതിക്കുഴികളെക്കുറിച്ച് ബോധവാന്മാരായിരിക്കുന്നത് നിങ്ങളുടെ യാത്രകൾ കൂടുതൽ സുരക്ഷിതമാക്കും.

The post പബ്ലിക് വൈഫൈ ഉപയോഗിക്കുമ്പോൾ ഈ അബദ്ധങ്ങൾ ഒഴിവാക്കാം! നിങ്ങളുടെ ഡാറ്റ സുരക്ഷിതമാക്കാൻ വഴികൾ appeared first on Express Kerala.