ഇറാന്റെ പുതിയ പരമോന്നത നേതാവ് മുജ്തബ ഖമേനിക്ക് ഗുരുതരമായി പരിക്കേറ്റെന്നും അദ്ദേഹം നിലവിൽ റഷ്യയിൽ അതീവ രഹസ്യമായി ചികിത്സയിലാണെന്നും റിപ്പോർട്ടുകൾ പുറത്തുവരുന്നു. കുവൈത്ത് ആസ്ഥാനമായുള്ള അൽ ജരിദ പത്രമാണ് ഈ നിർണ്ണായക വിവരം പുറത്തുവിട്ടത്. റഷ്യൻ പ്രസിഡന്റ് വ്ലാഡിമിർ പുടിന്റെ പ്രത്യേക വാഗ്ദാനത്തെത്തുടർന്ന് സൈനിക വിമാനത്തിൽ മുജ്തബയെ മോസ്കോയിലേക്ക് മാറ്റുകയായിരുന്നു എന്നാണ് റിപ്പോർട്ട്. അതീവ രഹസ്യമായി നടന്ന ഈ നീക്കത്തെക്കുറിച്ച് റഷ്യൻ നയതന്ത്രജ്ഞൻ ദിമിത്രി പെസ്കോവ് പ്രതികരിക്കാൻ വിസമ്മതിച്ചതോടെ സംഭവത്തിലെ ദുരൂഹത വർദ്ധിച്ചിരിക്കുകയാണ്.
മുജ്തബ ഖമേനി കൊല്ലപ്പെട്ടുവെന്ന് നേരത്തെ അമേരിക്കൻ പ്രസിഡന്റ് ഡോണൾഡ് ട്രംപ് ഉൾപ്പെടെയുള്ളവർ പ്രസ്താവന നടത്തിയിരുന്നുവെങ്കിലും അദ്ദേഹം ജീവനോടെയുണ്ടെന്നാണ് രഹസ്യാന്വേഷണ വിഭാഗങ്ങളെ ഉദ്ധരിച്ചുള്ള പുതിയ റിപ്പോർട്ടുകൾ വ്യക്തമാക്കുന്നത്. എന്നാൽ പരിക്കുകൾ ഗുരുതരമായതിനാൽ അദ്ദേഹത്തിന്റെ ആശയവിനിമയങ്ങൾ ഉൾപ്പെടെ ഇപ്പോൾ ഐആർജിസിയുടെ പൂർണ്ണ നിയന്ത്രണത്തിലാണ്. പുറംലോകത്തേക്ക് എത്തുന്ന അദ്ദേഹത്തിന്റെ സന്ദേശങ്ങൾ ഐആർജിസി ഉദ്യോഗസ്ഥർ വഴിയാണ് കൈമാറുന്നത്.
Also Read:ഇറാനിൽ മൂന്നാഴ്ച കൂടി ആക്രമണം തുടരാൻ ഇസ്രയേൽ; ലക്ഷ്യം ആയുധശേഷി തകർക്കൽ
മുൻ പരമോന്നത നേതാവ് ആയത്തുള്ള അലി ഖമേനി കൊല്ലപ്പെട്ട അമേരിക്കൻ-ഇസ്രയേൽ സംയുക്ത ആക്രമണത്തിലാണ് മുജ്തബയ്ക്കും പരിക്കേറ്റതെന്നാണ് സൂചന. ഈ ആക്രമണത്തിൽ അദ്ദേഹത്തിന്റെ മകനും ഭാര്യയും കൊല്ലപ്പെട്ടിരുന്നു. അലി ഖമേനിക്ക് പിന്നാലെ പരമോന്നത നേതാവായി മുജ്തബയെ നിയമിച്ചെങ്കിലും ഇതുവരെ അദ്ദേഹത്തിന്റെ പുതിയ ചിത്രങ്ങളോ വീഡിയോകളോ പുറത്തുവന്നിട്ടില്ല.
The post മുജ്തബ ഖമേനി റഷ്യയിൽ ചികിത്സയിൽ; അതീവ രഹസ്യ നീക്കവുമായി പുടിൻ? appeared first on Express Kerala.
