നിങ്ങളുടെ പേര് വോട്ടർപട്ടികയിലുണ്ടോ? പരിശോധിക്കാം; എഎസ്‌ഡി പട്ടികയിൽ ഉൾപ്പെട്ടവർക്ക് തിരുത്തലിന് ഇന്ന് അവസാന അവസരം

തിരുവനന്തപുരം: വരാനിരിക്കുന്ന നിയമസഭാ തിരഞ്ഞെടുപ്പിന് മുന്നോടിയായി വോട്ടർപട്ടിക ശുദ്ധീകരിക്കുന്ന നടപടികൾ സജീവമാകുന്നു. മരിച്ചവർ, സ്ഥലം മാറിപ്പോയവർ തുടങ്ങിയവരെ ഒഴിവാക്കിക്കൊണ്ട് തയ്യാറാക്കിയ എഎസ്‌ഡി പട്ടിക ഇപ്പോൾ ലഭ്യമാണ്. ഈ പട്ടികയിൽ അർഹരായ ആരെങ്കിലും ഉൾപ്പെട്ടിട്ടുണ്ടെങ്കിൽ പരാതി നൽകാനുള്ള അവസാന തീയതി (ഡിസംബർ18) ഇന്നാണ്.

നിങ്ങളുടെ പേര് പരിശോധിക്കേണ്ടത് എങ്ങനെ?മുഖ്യ തിരഞ്ഞെടുപ്പ് ഓഫീസറുടെ വെബ്സൈറ്റായ www.ceo.kerala.gov.in/asd-list വഴി വോട്ടർമാർക്ക് തങ്ങളുടെ പേര് ഒഴിവാക്കപ്പെട്ടിട്ടുണ്ടോ എന്ന് പരിശോധിക്കാം.

വെബ്സൈറ്റിൽ കയറി ജില്ല, നിയമസഭാ മണ്ഡലം, ബൂത്ത് നമ്പർ എന്നിവ തിരഞ്ഞെടുക്കുക.

2 . ‘ഡൗൺലോഡ് എഎസ്‌ഡി’ ബട്ടൺ ക്ലിക്ക് ചെയ്യുക.

പട്ടികയിൽ പേര്, തിരിച്ചറിയൽ കാർഡ് നമ്പർ, പുറത്താക്കാനുള്ള കാരണം എന്നിവ രേഖപ്പെടുത്തിയിട്ടുണ്ടാകും.

പുറത്താക്കപ്പെട്ടാൽ എന്തുചെയ്യണം?മതിയായ കാരണങ്ങളില്ലാതെയാണ് നിങ്ങളുടെ പേര് എഎസ്‌ഡി പട്ടികയിൽ ഉൾപ്പെട്ടതെങ്കിൽ, ഉടൻ തന്നെ ബൂത്ത് ലെവൽ ഓഫീസറെ (BLO) ബന്ധപ്പെടണം. എസ്ഐആർ ഫോം പൂരിപ്പിച്ചു നൽകി തെറ്റ് തിരുത്താൻ ഇന്നു (ഡിസംബർ18) വരെയാണ് അവസരം. ഇത്തരത്തിൽ അപേക്ഷ നൽകുന്നവരുടെ പേര് ഡിസംബർ 23-ന് പ്രസിദ്ധീകരിക്കുന്ന കരട് പട്ടികയിൽ ഉൾപ്പെടുത്തുന്നതാണ്.

Also Read: പരസ്പര സമ്മതത്തോടെയുള്ള വിവാഹമോചനം: ഒരു വർഷത്തെ കാത്തിരിപ്പ് നിർബന്ധമല്ല; ഡൽഹി ഹൈക്കോടതി

പുതിയ പേര് ചേർക്കാനും തെറ്റുകൾ തിരുത്താനുംകരട് വോട്ടർപട്ടിക പ്രസിദ്ധീകരിച്ച ശേഷം അതിൽ ഉൾപ്പെടാത്തവർക്ക് ഡിസംബർ 23 മുതൽ ജനുവരി 22 വരെ അപേക്ഷകൾ സമർപ്പിക്കാം.പുതിയ വോട്ടർമാർ ഫോം 6 വഴി അപേക്ഷിക്കണം. പ്രവാസി വോട്ടർമാർ ഫോം 6എ നൽകണം. തെറ്റുകൾ തിരുത്താനോ വിലാസം മാറ്റാനോ മറ്റ് തിരുത്തലുകൾക്കോ ഫോം 8 ആണ് ഉപയോഗിക്കേണ്ടത്. ഈ ഫോമുകൾ voters.eci.gov.in എന്ന ലിങ്കിൽ ഓൺലൈനായി ലഭ്യമാണ്.

ഹിയറിങ്ങിന് ശേഷം ഒരാളെ വോട്ടർപട്ടികയിൽ നിന്ന് ഒഴിവാക്കുകയാണെങ്കിൽ ജില്ലാ തിരഞ്ഞെടുപ്പ് ഓഫീസർക്ക് ഒന്നാം അപ്പീൽ നൽകാം. ഇതിലെ ഉത്തരവിനെതിരെ 30 ദിവസത്തിനകം ചീഫ് ഇലക്ടറൽ ഓഫീസർക്ക് രണ്ടാം അപ്പീലും നൽകാവുന്നതാണ്. ഫെബ്രുവരി 21-നാണ് അന്തിമ വോട്ടർപട്ടിക പ്രസിദ്ധീകരിക്കുന്നത്. എന്നാൽ നിയമസഭാ തിരഞ്ഞെടുപ്പിനുള്ള നാമനിർദ്ദേശ പത്രിക സമർപ്പിക്കേണ്ട അവസാന തീയതി വരെ വോട്ടർപട്ടികയിൽ പേര് ചേർക്കാനുള്ള അവസരം ഉണ്ടായിരിക്കും.
The post നിങ്ങളുടെ പേര് വോട്ടർപട്ടികയിലുണ്ടോ? പരിശോധിക്കാം; എഎസ്‌ഡി പട്ടികയിൽ ഉൾപ്പെട്ടവർക്ക് തിരുത്തലിന് ഇന്ന് അവസാന അവസരം appeared first on Express Kerala.