ഐപിഎൽ 2026 മിനി ലേലത്തിൽ ഒരു ടീമും തിരിഞ്ഞുനോക്കാതിരുന്നതിന്റെ നിരാശ വിൻഡീസ് ബൗളർമാരോട് തീർത്ത് ഡെവോൺ കോൺവെ. വെസ്റ്റ് ഇൻഡീസിനെതിരായ മൂന്നാം ടെസ്റ്റിന്റെ ഒന്നാം ദിനം അവസാനിക്കുമ്പോൾ പുറത്താകാതെ 178 റൺസുമായി കോൺവെ ഇരട്ട സെഞ്ച്വറിക്കരികിലാണ്. കോൺവെയുടെയും ക്യാപ്റ്റൻ ടോം ലാതമിന്റെയും (137) തകർപ്പൻ സെഞ്ച്വറികളുടെ കരുത്തിൽ ഒന്നാം ദിനം കളി നിർത്തുമ്പോൾ ഒരു വിക്കറ്റ് നഷ്ടത്തിൽ 334 റൺസ് എന്ന ശക്തമായ നിലയിലാണ് ന്യൂസിലൻഡ്.
ബാറ്റിംഗ് വെടിക്കെട്ട്
ടോസ് നേടി ബാറ്റിംഗ് തിരഞ്ഞെടുത്ത കിവികൾക്കായി ഓപ്പണിംഗ് വിക്കറ്റിൽ ലാതമും കോൺവെയും ചേർന്ന് 323 റൺസിന്റെ റെക്കോർഡ് കൂട്ടുകെട്ടാണ് പടുത്തുയർത്തിയത്. വിൻഡീസ് ബൗളർമാരെ കാഴ്ചക്കാരാക്കി 279 പന്തുകൾ നേരിട്ട കോൺവെ 25 ഫോറുകൾ സഹിതമാണ് 178 റൺസെടുത്തത്. കളി അവസാനിക്കാൻ നിമിഷങ്ങൾ ബാക്കിനിൽക്കെയാണ് ലാതം പുറത്തായത്. നിലവിൽ 9 റൺസുമായി ജേക്കബ് ഡഫി കോൺവെയ്ക്കൊപ്പം ക്രീസിലുണ്ട്.
Also Read: എതിരാളികൾക്ക് നെഞ്ചിടിപ്പ്! 2020-ലെ ആ മാരക ഫോമിലേക്ക് മുംബൈ ഇന്ത്യൻസ്; ആറാം കിരീടം ഉറപ്പ്
ഐപിഎല്ലിലെ തിരിച്ചടി
ചെന്നൈ സൂപ്പർ കിംഗ്സിന്റെ വിശ്വസ്തനായിരുന്ന കോൺവെയെ ഇത്തവണ ലേലത്തിന് മുൻപ് സിഎസ്കെ റിലീസ് ചെയ്തിരുന്നു. എന്നാൽ ഡിസംബർ 16-ന് നടന്ന മിനി ലേലത്തിൽ 2 കോടി അടിസ്ഥാന വിലയുണ്ടായിരുന്ന കോൺവെയെ വാങ്ങാൻ ചെന്നൈ ഉൾപ്പെടെ ഒരു ടീമും തയ്യാറായില്ല. ഐപിഎല്ലിൽ 29 മത്സരങ്ങളിൽ നിന്ന് 1080 റൺസ് നേടിയിട്ടുള്ള താരത്തിന്റെ ഈ അവഗണനയ്ക്ക് ബാറ്റ് കൊണ്ടാണ് അദ്ദേഹം മറുപടി നൽകിയിരിക്കുന്നത്.
The post ലേലത്തിൽ കൈവിട്ടവർ കാണുന്നുണ്ടോ? കോൺവെയുടെ പകവീട്ടൽ! 178 റൺസുമായി പുറത്താകാതെ താരം appeared first on Express Kerala.