ചന്ദ്രനിൽ ആണവ നിലയം, ആകാശത്ത് സ്വർണ്ണ താഴികക്കുടം! ട്രംപിന്റെ ബഹിരാകാശ വിപ്ലവം വെറുംവാക്കാണോ അതോ ലോകം പേടിക്കണോ?

ഭൂമിയിലെ രാഷ്ട്രീയ പോരാട്ടങ്ങൾ കഴിഞ്ഞ് ഇനി ബഹിരാകാശത്തേക്ക് കണ്ണ് വെക്കുകയാണ് സാക്ഷാൽ അമേരിക്കൻ പ്രസിഡന്റ് ട്രംപ്. ചന്ദ്രനെ അമേരിക്കയുടെ ഒരു ‘കോളനി’യാക്കി മാറ്റുമെന്നും ബഹിരാകാശത്ത് ആണവ റിയാക്ടറുകൾ സ്ഥാപിക്കുമെന്നും കേൾക്കുമ്പോൾ ഒരു സയൻസ് ഫിക്ഷൻ സിനിമയുടെ തിരക്കഥ പോലെ തോന്നാം.

എന്നാൽ സംഗതി ഗൗരവമാണ്; ഇതിനായുള്ള എക്സിക്യൂട്ടീവ് ഉത്തരവിൽ ട്രംപ് ഒപ്പുവെച്ചു കഴിഞ്ഞു. ചൈനയുടെ ബഹിരാകാശ മുന്നേറ്റങ്ങളെ തടയാൻ ട്രംപ് ഒരുക്കുന്ന ഈ ‘മാസ്റ്റർ പ്ലാൻ’ ലോകത്തെ വിസ്മയിപ്പിക്കാനാണോ അതോ ട്രംപിന്റെ പതിവ് ശൈലിയിലുള്ള വെറും പബ്ലിസിറ്റി സ്റ്റണ്ടാണോ എന്നാണ് ഇപ്പോൾ രാഷ്ട്രീയ നിരീക്ഷകർ ചോദിക്കുന്നത്.

Also Read: കള്ളുകുടിയേക്കാൾ ദോഷം, അതിന് ശേഷം ചെയ്യുന്ന ഈ കാര്യം! കരളും ദഹനവ്യവസ്ഥയും തകരും; ഡോക്ടർമാർ പറയുന്നു

ബഹിരാകാശത്ത് അമേരിക്കയുടെ ചോദ്യം ചെയ്യപ്പെടാത്ത ആധിപത്യം (Space Dominance) ഉറപ്പാക്കുക എന്നതാണ് ട്രംപിന്റെ പ്രഖ്യാപിത ലക്ഷ്യം.

ആർട്ടെമിസ് ദൗത്യം: 2028-ഓടെ മനുഷ്യനെ വീണ്ടും ചന്ദ്രനിലിറക്കാൻ നാസയോട് ട്രംപ് ആവശ്യപ്പെട്ടു കഴിഞ്ഞു. വെറുതെ ചന്ദ്രനിൽ പോയി വരികയല്ല, 2030-ഓടെ അവിടെ ഒരു സ്ഥിരം താവളം പണിയണം. ഇത് ചൊവ്വയിലേക്കുള്ള അമേരിക്കയുടെ യാത്രയുടെ ആദ്യ പടിയാണത്രേ! നാസ ഇതിനകം തന്നെ ഇതിനായുള്ള ഒരുക്കങ്ങൾ തുടങ്ങിയിട്ടുണ്ട്.

ബഹിരാകാശത്തെ ആണവ റിയാക്ടറുകൾ; അപകടകരമായ നീക്കമോ?

ഭൂമിയിൽ ആണവ നിലയങ്ങൾ പണിയുന്നതിലെ പ്രതിസന്ധികൾ പോരാഞ്ഞിട്ടാണോ എന്നറിയില്ല, ചന്ദ്രനിലും ബഹിരാകാശ ഭ്രമണപഥത്തിലും ആണവ റിയാക്ടറുകൾ സ്ഥാപിക്കാനാണ് ട്രംപിന്റെ കല്പന. ചന്ദ്രനിലെ പര്യവേഷണങ്ങൾക്കും ഭാവിയിലെ സ്റ്റേഷനുകൾക്കും ആവശ്യമായ ഊർജ്ജം ഈ റിയാക്ടറുകൾ നൽകും. 2030-ഓടെ ചന്ദ്രോപരിതലത്തിൽ സ്ഥാപിക്കാൻ കഴിയുന്ന ഒരു ‘ഫിഷൻ റിയാക്ടർ’ (Fission Reactor) വികസിപ്പിക്കാൻ ശാസ്ത്രജ്ഞർക്ക് നിർദ്ദേശം നൽകിയിട്ടുണ്ട്.

Also Read: കൊത്തിന് കൊളുത്ത്..! ട്രംപിന് പുടിന്റെ താക്കീത്, വെനസ്വേലയെ തൊട്ടാൽ കളി മാറും; സോഷ്യലിസ്റ്റ് കരുത്തിന് കാവലായി റഷ്യൻ സിംഹം

‘ഗോൾഡൻ ഡോം’: ആകാശത്തിന് ഒരു സുരക്ഷാ കവചം

അമേരിക്കൻ മണ്ണിലേക്ക് ഒരു മിസൈൽ പോലും കടക്കാത്ത രീതിയിൽ രാജ്യത്തെ സംരക്ഷിക്കാൻ ‘ഗോൾഡൻ ഡോം’ (Golden Dome) എന്ന മിസൈൽ പ്രതിരോധ സംവിധാനവും ട്രംപ് വിഭാവനം ചെയ്യുന്നുണ്ട്. ഇസ്രയേലിന്റെ അയൺ ഡോമിന് സമാനമായി, പക്ഷേ അതിനേക്കാൾ കരുത്തുള്ള ഒരു സംവിധാനമാണിത്. 2028-ഓടെ ഇതിന്റെ പ്രോട്ടോടൈപ്പുകൾ തയ്യാറാക്കാനാണ് 2025 ജനുവരി 27-ലെ എക്സിക്യൂട്ടീവ് ഓർഡർ 14186 നിർദ്ദേശിക്കുന്നത്. ബഹിരാകാശത്തെ പ്രതിരോധ ശേഷി കൂടി വർദ്ധിപ്പിക്കുകയാണ് ഇതിന്റെ ഗൂഢലക്ഷ്യം.

50 ബില്യൺ ഡോളറിന്റെ ബഹിരാകാശ നിക്ഷേപം

വാക്കുകൾക്ക് പുറമെ വൻതോതിലുള്ള സാമ്പത്തിക നിക്ഷേപത്തിനും ട്രംപ് പദ്ധതിയിടുന്നുണ്ട് . 2028-ഓടെ ബഹിരാകാശ വിപണിയിൽ 50 ബില്യൺ ഡോളറിന്റെ അധിക നിക്ഷേപമാണ് അദ്ദേഹം ലക്ഷ്യമിടുന്നത്. അന്താരാഷ്ട്ര ബഹിരാകാശ നിലയം (ISS) 2030-ൽ വിരമിക്കുന്നതോടെ, ബഹിരാകാശത്ത് സ്വകാര്യ ഉടമസ്ഥതയിലുള്ള അമേരിക്കൻ സ്റ്റേഷനുകൾ വരണമെന്ന് ട്രംപ് ആഗ്രഹിക്കുന്നു. തന്റെ ഈ വമ്പൻ പ്ലാനുകൾ എങ്ങനെ നടപ്പിലാക്കുമെന്ന് വിശദീകരിക്കുന്ന സമഗ്രമായ റിപ്പോർട്ട് സമർപ്പിക്കാൻ നാസയ്ക്ക് ട്രംപ് നൽകിയിരിക്കുന്നത് വെറും 90 ദിവസമാണ് എന്നത് മറ്റൊരു വസ്തുത.

Also Read: ഇത് ‘ദൈവ’ വിശ്വാസികൾക്കുള്ള ചോദ്യം, വിശുദ്ധ മത ഗ്രന്ഥങ്ങളിൽ ഈ രഹസ്യമുണ്ടോ..!

സൂര്യനും ചന്ദ്രനും നക്ഷത്രങ്ങളും എല്ലാം അമേരിക്കയുടെ വരുതിയിലാക്കാൻ ട്രംപ് ശ്രമിക്കുമ്പോൾ ലോകം ചോദിക്കുന്നത് ഒന്നേയുള്ളൂ—ഇതൊക്കെ പ്രായോഗികമാണോ? അതോ പതിവ് പോലെ വമ്പൻ പ്രഖ്യാപനങ്ങൾ നടത്തി ആഗോള വിപണിയെയും രാഷ്ട്രീയത്തെയും ഒന്ന് ഇളക്കിമറിക്കുക മാത്രമാണോ ലക്ഷ്യം? എന്തുതന്നെയായാലും, ചന്ദ്രനിൽ ആണവ നിലയം സ്ഥാപിക്കുന്നതും ആകാശത്ത് സ്വർണ്ണ താഴികക്കുടം പണിയുന്നതും പണമൊഴുക്കി സാധിച്ചെടുക്കാമെന്ന ട്രംപിന്റെ ആത്മവിശ്വാസം ഒന്നു വേറെ തന്നെയാണ്. ശാസ്ത്രലോകം ഈ പ്രഖ്യാപനങ്ങളെ എങ്ങനെ കാണുന്നു എന്നത് കണ്ടറിയേണ്ടി വരും.
The post ചന്ദ്രനിൽ ആണവ നിലയം, ആകാശത്ത് സ്വർണ്ണ താഴികക്കുടം! ട്രംപിന്റെ ബഹിരാകാശ വിപ്ലവം വെറുംവാക്കാണോ അതോ ലോകം പേടിക്കണോ? appeared first on Express Kerala.