വിരമിക്കില്ല, ബോറടിക്കുമ്പോൾ കളി നിർത്തും; തന്നെ തഴയുന്നതിനെതിരെ കടുത്ത ഭാഷയിൽ മുഹമ്മദ് ഷമി

ടി20 ഫോർമാറ്റിൽ തന്നെ തുടർച്ചയായി അവഗണിക്കുന്ന ബി.സി.സി.ഐ സെലക്ഷൻ കമ്മിറ്റിക്കെതിരെ കടുത്ത ഭാഷയിൽ പ്രതികരിച്ച് ഇന്ത്യൻ പേസർ മുഹമ്മദ് ഷമി. ഒരു യൂട്യൂബ് ചാനലിന് നൽകിയ അഭിമുഖത്തിലാണ് താരം തന്റെ അതൃപ്തി പരസ്യമാക്കിയത്. കഴിഞ്ഞ അഞ്ചാറ് വർഷത്തെ ഐപിഎൽ കണക്കുകൾ പരിശോധിച്ചാൽ ഏതൊരു ഇന്ത്യൻ ബൗളറേക്കാളും മികച്ച പ്രകടനമാണ് താൻ കാഴ്ചവെച്ചതെന്നും എന്നിട്ടും തന്നെ ടി20 ബൗളറല്ലെന്ന് പറയുന്നത് അംഗീകരിക്കാനാവില്ലെന്നും ഷമി പറഞ്ഞു.

തന്റെ കഴിവിനെ ചോദ്യം ചെയ്യുന്നവർ റെക്കോർഡുകൾ പരിശോധിക്കണമെന്ന് ഷമി ആവശ്യപ്പെട്ടു. കഴിഞ്ഞ ഏതാനും വർഷങ്ങൾക്കിടെ ഐപിഎല്ലിൽ മാത്രം താൻ 130 വിക്കറ്റുകൾ നേടിയിട്ടുണ്ട്. സയ്യിദ് മുഷ്താഖ് അലി ട്രോഫിയിൽ ഏഴ് മത്സരങ്ങളിൽ നിന്ന് 16 വിക്കറ്റുകൾ വീഴ്ത്തി ഫോം തെളിയിച്ചിട്ടും 2026 ടി20 ലോകകപ്പ് ടീമിൽ നിന്ന് തന്നെ ഒഴിവാക്കിയത് എന്തിനാണെന്ന് ഷമി ചോദിച്ചു. ഹർഷിത് റാണയ്ക്ക് പകരക്കാരനായി മുഹമ്മദ് സിറാജിനെയാണ് സെലക്ടർമാർ ടീമിലെടുത്തത്.

Also Read:കൊണോലി മാജിക്! ഗുജറാത്തിനെ തകർത്ത് പഞ്ചാബ് കിംഗ്‌സിന് ആവേശത്തുടക്കം

വിരമിക്കലിനെക്കുറിച്ച് ഇപ്പോൾ ചിന്തിക്കുന്നതേയില്ലെന്ന് ഷമി വ്യക്തമാക്കി. കളി ആസ്വദിക്കുകയാണെന്നും ബോറടിക്കുമ്പോൾ മാത്രമേ ക്രിക്കറ്റ് നിർത്തുകയുള്ളൂവെന്നും അദ്ദേഹം പറഞ്ഞു. ടീമിൽ ഇടം ലഭിക്കാത്തതിന് പിന്നിൽ പി.ആർ ഏജൻസികളുടെ സ്വാധീനമുണ്ടോ എന്ന ചോദ്യത്തിന് ‘അതെ’ എന്നായിരുന്നു ഷമിയുടെ മറുപടി. പല താരങ്ങൾക്കും വേണ്ടി കമ്പനികൾ പി.ആർ വർക്കുകൾ ചെയ്യുന്നുണ്ടെന്നും എന്നാൽ താൻ സ്വന്തം കഴിവിൽ വിശ്വസിക്കുന്നുവെന്നും അദ്ദേഹം കൂട്ടിച്ചേർത്തു.

നിലവിൽ ലക്നൗ സൂപ്പർ ജയന്റ്സിന്റെ ബൗളിംഗ് നിരയെ നയിക്കുന്ന ഷമി, ഐപിഎല്ലിലെ മികച്ച പ്രകടനത്തിലൂടെ സെലക്ടർമാർക്ക് മറുപടി നൽകാനൊരുങ്ങുകയാണ്. പരിക്കിന് ശേഷം പൂർണ്ണ കായികക്ഷമത വീണ്ടെടുത്തിട്ടും അജിത് അഗാർക്കറുടെ നേതൃത്വത്തിലുള്ള കമ്മിറ്റി തന്നെ തഴയുന്നതിലുള്ള പ്രതിഷേധമാണ് ഷമിയുടെ വാക്കുകളിൽ നിഴലിക്കുന്നത്. ബംഗാളിനായി ആഭ്യന്തര സീസണിൽ 67 വിക്കറ്റുകൾ വീഴ്ത്തി മിന്നും ഫോമിലാണ് താരം ഇപ്പോഴുള്ളത്.

The post വിരമിക്കില്ല, ബോറടിക്കുമ്പോൾ കളി നിർത്തും; തന്നെ തഴയുന്നതിനെതിരെ കടുത്ത ഭാഷയിൽ മുഹമ്മദ് ഷമി appeared first on Express Kerala.