വനിതാ ഏകദിന ക്രിക്കറ്റ് ചരിത്രത്തിലെ ഏറ്റവും ഉയർന്ന റൺ ചേസ് എന്ന റെക്കോർഡ് സ്വന്തമാക്കി ന്യൂസിലൻഡ് വനിതാ ടീം ചരിത്രം കുറിച്ചു. ദക്ഷിണാഫ്രിക്കയ്ക്കെതിരായ രണ്ടാം ഏകദിനത്തിൽ 347 റൺസ് എന്ന കൂറ്റൻ ലക്ഷ്യം മറികടന്നാണ് ‘വൈറ്റ് ഫേൺസ്’ ഈ അവിശ്വസനീയ വിജയം നേടിയത്. ഇതോടെ മൂന്ന് മത്സരങ്ങളടങ്ങിയ പരമ്പരയിൽ ന്യൂസിലൻഡ് 1-1ന് ഒപ്പമെത്തി. കഴിഞ്ഞ വർഷം നവി മുംബൈയിൽ ഓസ്ട്രേലിയക്കെതിരെ ഇന്ത്യ കുറിച്ച (341/5) റെക്കോർഡാണ് ഇതോടെ പഴങ്കഥയായത്.
ക്യാപ്റ്റൻ അമേലിയ കെറുടെ അതിശയിപ്പിക്കുന്ന ബാറ്റിംഗ് പ്രകടനമാണ് ന്യൂസിലൻഡിനെ വിജയതീരത്തെത്തിച്ചത്. 139 പന്തിൽ നിന്ന് പുറത്താകാതെ 179 റൺസ് അടിച്ചുകൂട്ടിയ കെറുടെ ഇന്നിംഗ്സിൽ 23 ഫോറുകളും ഒരു സിക്സറും ഉൾപ്പെടുന്നു. 68 റൺസെടുത്ത ഇസബെല്ല ഗെയ്സ് നൽകിയ മികച്ച പിന്തുണയും വിജയത്തിൽ നിർണായകമായി. അവസാന ഓവറിൽ ജയിക്കാൻ 11 റൺസ് വേണമെന്നിരിക്കെ, രണ്ട് പന്തുകൾ ബാക്കിനിൽക്കെ ഫോറുകളിലൂടെ കെർ ടീമിനെ ലക്ഷ്യത്തിലെത്തിക്കുകയായിരുന്നു.
Also Read: കൂട്ട് അഞ്ച് നായ്ക്കൾ, ക്രിക്കറ്റിൽ സുഹൃത്തുക്കളില്ല; മനസ്സ് തുറന്ന് അർജുൻ ടെൻഡുൽക്കർ!
ആദ്യ ഏകദിനത്തിൽ പരാജയപ്പെട്ട ന്യൂസിലൻഡ് ഈ വിജയത്തോടെ പരമ്പരയിലേക്ക് ശക്തമായി തിരിച്ചെത്തിയിരിക്കുകയാണ്. ദക്ഷിണാഫ്രിക്ക ഉയർത്തിയ 346 റൺസ് എന്ന വലിയ സ്കോർ പിന്തുടരുമ്പോൾ ഇതൊരു ബാറ്റിംഗ് പിച്ചാണെന്നും ജയിക്കാൻ സാധിക്കുമെന്നും ഡ്രസ്സിംഗ് റൂമിൽ വെച്ച് ഉറച്ചു വിശ്വസിച്ചിരുന്നതായി അമേലിയ കെർ മത്സരശേഷം പറഞ്ഞു. ഇനി നടക്കാനിരിക്കുന്ന മൂന്നാം ഏകദിനം പരമ്പര വിജയികളെ നിർണയിക്കും.
The post വനിതാ ക്രിക്കറ്റിൽ ലോകറെക്കോർഡ് തിരുത്തി ന്യൂസിലൻഡ്; ദക്ഷിണാഫ്രിക്കയ്ക്കെതിരെ അവിശ്വസനീയ റൺ ചേസ് appeared first on Express Kerala.
