സംവിധായകൻ രഞ്ജിത്ത് പ്രതിയായ ലൈംഗികാതിക്രമ കേസിൽ അന്വേഷണം ഊർജ്ജിതമാക്കിയിരിക്കുകയാണ് പൊലീസ്. യുവനടി തന്റെ പരാതിയിൽ പരാമർശിച്ച, അതിക്രമം നടന്നുവെന്ന് പറയപ്പെടുന്ന കാരവൻ അന്വേഷണസംഘം കണ്ടെത്തിക്കഴിഞ്ഞു. കാരവന്റെ ഉള്ളിൽ സിസിടിവി കാമറകൾ ലഭ്യമല്ലെങ്കിലും, അതിന്റെ പുറത്തുള്ള സിസിടിവി ദൃശ്യങ്ങൾ ശേഖരിച്ച് സംഭവദിവസത്തെ കൂടുതൽ വിവരങ്ങൾ പുറത്തുകൊണ്ടുവരാനാണ് പൊലീസ് നിലവിൽ ശ്രമിക്കുന്നത്.
വരുന്ന ശനിയാഴ്ച രഞ്ജിത്തിന്റെ ജാമ്യാപേക്ഷ കോടതി പരിഗണിക്കുമ്പോൾ കേസിൽ പരമാവധി തെളിവുകൾ ഹാജരാക്കാനാണ് പ്രത്യേക അന്വേഷണ സംഘത്തിന്റെ നീക്കം. ഇതിന്റെ ഭാഗമായി പീഡനം നടന്നതായി പറയുന്ന സിനിമാ സെറ്റിൽ അന്ന് ഉണ്ടായിരുന്ന കൂടുതൽ ചലച്ചിത്ര പ്രവർത്തകരുടെ മൊഴികൾ പൊലീസ് രേഖപ്പെടുത്തും. നിലവിൽ സബ് ജയിലിൽ കഴിയുന്ന രഞ്ജിത്തിനെ കസ്റ്റഡിയിൽ വിട്ടുകിട്ടാനുള്ള അപേക്ഷയും ശനിയാഴ്ച കോടതിയുടെ പരിഗണനയ്ക്ക് വരും.
Also Read:തിരുവനന്തപുരം മെഡിക്കൽ കോളേജ് പാർക്കിംഗിൽ നവജാതശിശുവിന്റെ മൃതദേഹം കണ്ടെത്തി
ഈ വർഷം ജനുവരിയിൽ ഫോർട്ട് കൊച്ചിയിൽ നടന്ന ഷൂട്ടിംഗിനിടെയാണ് പരാതിക്കാസ്പദമായ സംഭവം ഉണ്ടായത്. കാരവനുള്ളിൽ വെച്ച് രഞ്ജിത്ത് തനിക്ക് നേരെ ലൈംഗിക അതിക്രമം നടത്തിയെന്ന് യുവനടി സിറ്റി പൊലീസ് കമ്മീഷണർക്ക് നൽകിയ പരാതിയിൽ പറയുന്നു. സംഭവത്തെത്തുടർന്നുണ്ടായ മാനസികാഘാതത്തിൽ കഴിഞ്ഞ ആഴ്ചയാണ് നടി പരാതിയുമായി രംഗത്തെത്തിയത്. ഡിസിപി അശ്വതി ജിജിയുടെ നേതൃത്വത്തിലുള്ള പ്രത്യേക സംഘം പ്രാഥമിക അന്വേഷണങ്ങൾ പൂർത്തിയാക്കിയ ശേഷമാണ് രഞ്ജിത്തിനെ അറസ്റ്റ് ചെയ്തത്.
The post രഞ്ജിത്ത് പ്രതിയായ പീഡനക്കേസ്: അതിക്രമം നടന്ന കാരവൻ പൊലീസ് കണ്ടെത്തി; അന്വേഷണം ഊർജ്ജിതം appeared first on Express Kerala.
