ഐപിഎല്ലിലെ ആവേശപ്പോരാട്ടത്തിൽ ഇന്ന് റോയൽ ചലഞ്ചേഴ്സ് ബെംഗളൂരുവും ചെന്നൈ സൂപ്പർ കിംഗ്സും നേർക്കുനേർ. ബെംഗളൂരുവിലെ ചിന്നസ്വാമി സ്റ്റേഡിയത്തിൽ രാത്രി 7:30-നാണ് സൌത്ത് ഇന്ത്യൻ ഡെർബി എന്ന് വിശേഷിപ്പിക്കപ്പെടുന്ന ഈ പോരാട്ടം അരങ്ങേറുന്നത്. സ്വന്തം തട്ടകത്തിന്റെ ആനുകൂല്യവും ആദ്യ മത്സരത്തിൽ സൺറൈസേഴ്സിനെ തകർത്ത ആത്മവിശ്വാസവുമായാണ് വിരാട് കോഹ്ലിയും സംഘവും എത്തുന്നത്. എന്നാൽ കളിച്ച രണ്ട് മത്സരങ്ങളിലും പരാജയപ്പെട്ട സിഎസ്കെക്ക് ഇന്ന് വിജയം അനിവാര്യമാണ്.
രാജസ്ഥാൻ റോയൽസിൽ നിന്ന് ചെന്നൈ പാളയത്തിലെത്തിയ സഞ്ജു സാംസണിന്റെ പ്രകടനമാണ് ആരാധകർ ഉറ്റുനോക്കുന്നത്. ആദ്യ രണ്ട് കളികളിലും ബാറ്റിംഗിൽ തിളങ്ങാൻ കഴിയാതിരുന്ന സഞ്ജുവിനും ക്യാപ്റ്റൻ റുതുരാജ് ഗെയ്ക്വാദിനും ഇന്ന് ഫോമിലേക്ക് തിരിച്ചെത്തേണ്ടതുണ്ട്. ബാറ്റിംഗിലെ പതർച്ചയ്ക്കൊപ്പം ബൗളർമാർ ധാരാളം റൺസ് വഴങ്ങുന്നതും ചെന്നൈയെ കുഴപ്പിക്കുന്നുണ്ട്. സ്പിന്നർമാരും പേസർമാരും ഒരുപോലെ നിരാശപ്പെടുത്തുന്ന സാഹചര്യത്തിൽ കൃത്യമായ തന്ത്രങ്ങളുമായി വേണം ചെന്നൈക്ക് ചിന്നസ്വാമിയിൽ ഇറങ്ങാൻ.
Also Read:തോൽവികളിൽ വലയുന്ന സിഎസ്കെയ്ക്ക് ആശ്വാസം; ഡെവാൾഡ് ബ്രെവിസ് ടീമിലേക്ക് മടങ്ങിയെത്തുന്നു
മറുഭാഗത്ത്, ബാറ്റിംഗിലും ബൗളിംഗിലും ഒരുപോലെ സന്തുലിതമായ ടീമായാണ് ആർസിബി കാണപ്പെടുന്നത്. വിരാട് കോഹ്ലിക്കൊപ്പം ദേവ്ദത്ത് പടിക്കലും ക്യാപ്റ്റൻ രജത് പടിദാറും ബാറ്റിംഗ് നിരയ്ക്ക് കരുത്തേകുന്നു. ഫിൽ സോൾട്ട്, ജിതേഷ് ശർമ്മ, ടിം ഡേവിഡ് എന്നിവരുടെ വെടിക്കെട്ട് ബാറ്റിംഗും റൊമാരിയോ ഷെപ്പേർഡ്, ക്രുനാൽ പാണ്ഡ്യ എന്നിവരുടെ ഓൾറൗണ്ട് പ്രകടനവും ടീമിന് ആത്മവിശ്വാസം നൽകുന്നുണ്ട്. ജോഷ് ഹെയ്സൽവുഡിന്റെ അഭാവം അറിയിക്കാതെ ജേക്കബ് ഡഫിയും ഭുവനേശ്വർ കുമാറും പന്തെറിയുന്നതും ആർസിബിക്ക് മുൻതൂക്കം നൽകുന്നു.
നേർക്കുനേർ കണക്കുകളിൽ ചെന്നൈ സൂപ്പർ കിംഗ്സിനാണ് ആധിപത്യം. ഇതുവരെ ഏറ്റുമുട്ടിയ 35 മത്സരങ്ങളിൽ 21 എണ്ണത്തിലും ചെന്നൈ ജയിച്ചപ്പോൾ ആർസിബിക്ക് 13 വിജയങ്ങൾ മാത്രമാണുള്ളത്. ഒരു മത്സരം ഫലമില്ലാതെ ഉപേക്ഷിച്ചു. ചിന്നസ്വാമിയിലെ റൺമഴ പെയ്യുന്ന പിച്ചിൽ ഇന്ന് ആര് ചിരിക്കുമെന്ന കാത്തിരിപ്പിലാണ് ക്രിക്കറ്റ് ലോകം.
The post കോഹ്ലിയുടെ കരുത്തും സഞ്ജുവിന്റെ പോരാട്ടവീര്യവും; ബെംഗളൂരുവിൽ ഇന്ന് റൺമഴ പെയ്യുമോ? appeared first on Express Kerala.
