ബെംഗളൂരുവിലെ ചിന്നസ്വാമി സ്റ്റേഡിയത്തിൽ ഇന്ന് ഐപിഎൽ ആവേശം വാനോളമുയരും. റോയൽ ചലഞ്ചേഴ്സ് ബെംഗളൂരുവും ചെന്നൈ സൂപ്പർ കിംഗ്സും നേർക്കുനേർ എത്തുമ്പോൾ ക്രിക്കറ്റ് പ്രേമികൾ ഉറ്റുനോക്കുന്നത് വിരാട് കോഹ്ലിയുടെ വമ്പൻ റെക്കോർഡിലേക്കാണ്. ആദ്യ മത്സരത്തിൽ സൺറൈസേഴ്സ് ഹൈദരാബാദിനെതിരെ 38 പന്തിൽ 69 റൺസ് അടിച്ചുകൂട്ടിയ കോഹ്ലി മിന്നും ഫോമിലാണ്.
ഇന്നത്തെ മത്സരത്തിൽ വെറും 14 റൺസ് കൂടി നേടിയാൽ ഐപിഎല്ലിൽ ഒരു ടീമിനെതിരെ ഏറ്റവും കൂടുതൽ റൺസ് നേടുന്ന താരം എന്ന സ്വന്തം റെക്കോർഡ് തന്നെ തിരുത്താൻ കോഹ്ലിക്ക് സാധിക്കും. നിലവിൽ പഞ്ചാബ് കിംഗ്സിനെതിരെ 1159 റൺസാണ് കോഹ്ലിയുടെ സമ്പാദ്യം. ചെന്നൈക്കെതിരെ നിലവിൽ 1146 റൺസുണ്ട്. ഐപിഎല്ലിൽ 8 സെഞ്ചുറികൾ സ്വന്തം പേരിലുള്ള കോഹ്ലിക്ക് ഇതുവരെ ചെന്നൈക്കെതിരെ മൂന്നക്കം കടക്കാൻ സാധിച്ചിട്ടില്ല എന്ന പ്രത്യേകതയുമുണ്ട്.
Also Read: കോഹ്ലിയുടെ കരുത്തും സഞ്ജുവിന്റെ പോരാട്ടവീര്യവും; ബെംഗളൂരുവിൽ ഇന്ന് റൺമഴ പെയ്യുമോ?
പ്രതിസന്ധിയിലായി ചെന്നൈ സൂപ്പർ കിംഗ്സ്
മറുഭാഗത്ത് മുൻ നായകൻ എം.എസ് ധോണിയുടെ അഭാവം ചെന്നൈയെ വല്ലാതെ അലട്ടുന്നുണ്ട്. പരിക്കേറ്റ ധോണി ഇന്ന് കളിക്കില്ലെന്ന് ഉറപ്പായതോടെ സഞ്ജു സാംസണാണ് വിക്കറ്റ് കീപ്പിംഗ് ചുമതല വഹിക്കുന്നത്. സീസണിൽ ഇതുവരെ ഒരു വിജയം പോലും നേടാനാകാത്ത ചെന്നൈ പോയിന്റ് പട്ടികയിൽ അവസാന സ്ഥാനത്താണ്. എന്നാൽ നിലവിൽ നാലാം സ്ഥാനത്തുള്ള ആർസിബിക്ക് ഇന്ന് വലിയ മാർജിനിൽ ജയിക്കാനായാൽ പോയിന്റ് പട്ടികയിൽ ഒന്നാമതെത്താൻ സാധിക്കും.
കണക്കിലെ കളികൾ
ചെന്നൈക്കെതിരെ 38.00 ശരാശരിയുള്ള കോഹ്ലി കഴിഞ്ഞ സീസണിൽ അവർക്കെതിരെ രണ്ട് മത്സരങ്ങളിൽ നിന്ന് 93 റൺസ് നേടിയിരുന്നു. കൗതുകകരമായ മറ്റൊരു വസ്തുത, ബാറ്റിംഗിന് പുറമെ ചെന്നൈക്കെതിരെ കോഹ്ലി ഒരു വിക്കറ്റും വീഴ്ത്തിയിട്ടുണ്ട് എന്നതാണ്. നിലവിലെ ചാമ്പ്യന്മാരായ ആർസിബിയും ഫോം കണ്ടെത്താൻ കഷ്ടപ്പെടുന്ന സിഎസ്കെയും ഏറ്റുമുട്ടുമ്പോൾ ചിന്നസ്വാമിയിൽ റൺമഴ പെയ്യുമെന്നുറപ്പാണ്.
The post 14 റൺസ് അകലെ പുതിയ ചരിത്രം; ഐപിഎല്ലിലെ തന്റെ തന്നെ റെക്കോർഡ് തിരുത്താൻ വിരാട് കോഹ്ലി appeared first on Express Kerala.
