കുവൈത്ത്: മയക്കുമരുന്നിന്റെ ലഹരിയിൽ സ്വന്തം മാതാവിനെ ക്രൂരമായി കൊലപ്പെടുത്തിയ കുവൈത്ത് സ്വദേശിക്ക് ക്രിമിനൽ കോടതി വധശിക്ഷ വിധിച്ചു. 2025 സെപ്റ്റംബറിൽ സാദ് അൽ-അബ്ദുല്ല പ്രദേശത്തെ വസതിയിൽ വെച്ചായിരുന്നു മനസാക്ഷിയെ നടുക്കിയ ഈ സംഭവം നടന്നത്. 75 വയസ്സുള്ള മാതാവ് വീട്ടിൽ ഉറങ്ങിക്കിടക്കുമ്പോൾ 37 വയസ്സുകാരനായ മകൻ കത്തി ഉപയോഗിച്ച് അവരുടെ കഴുത്തറുക്കുകയായിരുന്നു. സംഭവത്തിന് പിന്നാലെ സഹോദരി ഉടൻതന്നെ മാതാവിനെ ആശുപത്രിയിലെത്തിക്കാൻ ശ്രമിച്ചെങ്കിലും അപ്പോഴേക്കും മരണം സംഭവിച്ചിരുന്നു. വിവരമറിഞ്ഞെത്തിയ സുരക്ഷാ ഉദ്യോഗസ്ഥർ സ്ഥലത്തെത്തി പ്രതിയെ അറസ്റ്റ് ചെയ്യുകയും കൊലപാതകത്തിന് ഉപയോഗിച്ച ആയുധം കണ്ടെടുക്കുകയും ചെയ്തു.
വിശദമായ അന്വേഷണത്തിനൊടുവിൽ, മയക്കുമരുന്നിന്റെ സ്വാധീനത്തിലാണ് പ്രതി ഈ കടുംകൈ ചെയ്തതെന്ന് തെളിഞ്ഞതിനെ തുടർന്നാണ് കോടതി പരമാവധി ശിക്ഷയായ വധശിക്ഷ തന്നെ വിധിച്ചത്. ലഹരി ഉപയോഗം ഒരു കുടുംബത്തെ ഒന്നടങ്കം തകർത്തെറിഞ്ഞ ഈ കേസ് കുവൈത്ത് സമൂഹത്തിൽ വലിയ ചർച്ചകൾക്കാണ് വഴിതെളിച്ചിരിക്കുന്നത്. പ്രതിയുടെ പ്രവൃത്തി അങ്ങേയറ്റം ക്രൂരവും മാപ്പർഹിക്കാത്തതുമാണെന്ന് നിരീക്ഷിച്ച കോടതി, നിയമത്തിന്റെ കണിശമായ ശിക്ഷാ നടപടികളിലൂടെ നീതി ഉറപ്പാക്കുകയായിരുന്നു. വധശിക്ഷാ വിധിയിലൂടെ ഇത്തരം കൊടുംകുറ്റകൃത്യങ്ങൾക്കെതിരെ ശക്തമായ താക്കീതാണ് അധികൃതർ നൽകുന്നത്.
The post ഉറങ്ങിക്കിടന്ന മാതാവിനെ കഴുത്തറുത്ത് കൊന്നു; മകന് കുവൈത്തിൽ വധശിക്ഷ appeared first on Express Kerala.
