കുവൈത്ത്: രാജ്യത്തെ സേവന മേഖലകളിൽ സാമ്പത്തിക സുതാര്യത ഉറപ്പുവരുത്തുന്നതിന്റെ ഭാഗമായി പത്ത് കുവൈത്ത് ദിനാറിൽ കൂടുതൽ തുകയുള്ള നേരിട്ടുള്ള പണമിടപാടുകൾക്ക് വാണിജ്യ വ്യവസായ മന്ത്രാലയം നിരോധനം ഏർപ്പെടുത്തി. ഇത് സംബന്ധിച്ച 2026-ലെ 32-ാം നമ്പർ മന്ത്രാലയ പ്രമേയം വാണിജ്യ വ്യവസായ മന്ത്രി ഒസാമ ബൂദായ് തിങ്കളാഴ്ച പുറത്തിറക്കി. പുതിയ ഉത്തരവ് പ്രകാരം നിശ്ചിത തുകയ്ക്ക് മുകളിലുള്ള എല്ലാ ഇടപാടുകളും ബാങ്കിംഗ് ചാനലുകൾ വഴിയോ അംഗീകൃത ഇലക്ട്രോണിക് പേയ്മെന്റ് സംവിധാനങ്ങൾ വഴിയോ മാത്രമേ നടത്താൻ പാടുള്ളൂ.
പ്രധാനമായും ഹെൽത്ത് ഇൻസ്റ്റിറ്റ്യൂട്ടുകൾ, പുരുഷന്മാരുടെയും സ്ത്രീകളുടെയും സലൂണുകൾ, കുട്ടികൾക്കായുള്ള പ്രത്യേക സലൂണുകൾ, സ്പോർട്സ് ക്ലബ്ബുകൾ എന്നിവിടങ്ങളിലാണ് പുതിയ നിയമം പ്രാബല്യത്തിൽ വരുന്നത്. കൂടാതെ മെഡിക്കൽ ഇൻസെക്ട് ആൻഡ് റോഡന്റ് കൺട്രോൾ കമ്പനികൾ, കീടനാശിനികളുടെ ഇറക്കുമതി, കയറ്റുമതി, സംഭരണം എന്നീ മേഖലകളിൽ പ്രവർത്തിക്കുന്ന സ്ഥാപനങ്ങളും ഈ പരിധിയിൽ വരും. ഇത്തരം സ്ഥാപനങ്ങൾ ഉപഭോക്താക്കളുമായി കരാറുകളിൽ ഏർപ്പെടുമ്പോഴോ സാധനങ്ങളും സേവനങ്ങളും നൽകുമ്പോഴോ പത്ത് ദിനാറിൽ കൂടുതൽ തുക നേരിട്ട് കൈപ്പറ്റുന്നത് നിയമവിരുദ്ധമായി കണക്കാക്കും.
Also Read: ഉറങ്ങിക്കിടന്ന അമ്മയെ കഴുത്തറുത്ത് കൊലപ്പെടുത്തിയ കേസ്; പ്രതിയായ മകന് കുവൈത്തിൽ വധശിക്ഷ
രാജ്യത്തെ ഡിജിറ്റൽ സമ്പദ്വ്യവസ്ഥയെ ശക്തിപ്പെടുത്തുന്നതിനും സാമ്പത്തിക ക്രയവിക്രയങ്ങൾ നിരീക്ഷിക്കുന്നതിനും വേണ്ടിയാണ് മന്ത്രാലയത്തിന്റെ ഈ നീക്കം. നിയമം ലംഘിച്ച് പണമിടപാടുകൾ നടത്തുന്ന സ്ഥാപനങ്ങൾക്കെതിരെ ലൈസൻസ് റദ്ദാക്കുന്നത് ഉൾപ്പെടെയുള്ള കർശന നടപടികൾ സ്വീകരിക്കുമെന്ന് അധികൃതർ മുന്നറിയിപ്പ് നൽകിയിട്ടുണ്ട്. വരും ദിവസങ്ങളിൽ കൂടുതൽ മേഖലകളിലേക്ക് ഈ നിയമം വ്യാപിപ്പിക്കാനുള്ള സാധ്യതയും മന്ത്രാലയം പരിഗണിക്കുന്നുണ്ട്.
The post പത്ത് ദിനാറിന് മുകളിൽ പണമിടപാട് വേണ്ട; കുവൈത്തിൽ ഡിജിറ്റൽ പേയ്മെന്റ് നിർബന്ധമാക്കി ഉത്തരവ് appeared first on Express Kerala.
