ഹോർമുസ് കടലിടുക്ക് തുറക്കണമെന്ന കർശന ഉപാധിയോടെ ഇറാനിൽ രണ്ടാഴ്ചത്തെ വെടിനിർത്തലിന് തയ്യാറാണെന്ന് അമേരിക്കൻ പ്രസിഡന്റ് ഡോണൾഡ് ട്രംപ് പ്രഖ്യാപിച്ചു. തന്റെ സാമൂഹിക മാധ്യമ പ്ലാറ്റ്ഫോമായ ‘ട്രൂത്ത് സോഷ്യൽ’ വഴിയാണ് ട്രംപ് ഇക്കാര്യം അറിയിച്ചത്. ഇറാൻ എത്രയും വേഗം തങ്ങളുടെ ഉപാധികൾ അംഗീകരിക്കണമെന്നും അദ്ദേഹം വ്യക്തമാക്കി.
പാകിസ്ഥാൻ പ്രധാനമന്ത്രി ഷെഹ്ബാസ് ഷെരീഫ്, ഫീൽഡ് മാർഷൽ അസിം മുനീർ എന്നിവരുമായി നടത്തിയ ചർച്ചകൾക്ക് ശേഷമാണ് ആക്രമണം താൽക്കാലികമായി നിർത്തിവെക്കാൻ ട്രംപ് സമ്മതിച്ചത്. ഇറാനെതിരെയുള്ള സൈനിക നീക്കം മാറ്റിവെക്കണമെന്ന് പാക് നേതാക്കൾ ട്രംപിനോട് നേരിട്ട് അഭ്യർത്ഥിക്കുകയായിരുന്നു. ഹോർമുസ് കടലിടുക്ക് തുറന്നു കൊടുക്കാൻ ഇറാൻ തയ്യാറാണെങ്കിൽ മാത്രം ഈ രണ്ടാഴ്ചത്തെ വെടിനിർത്തൽ പ്രാബല്യത്തിൽ വരുമെന്നും ഇത് ഇരുപക്ഷത്തിനും ബാധകമാണെന്നും ട്രംപ് കുറിപ്പിൽ കൂട്ടിച്ചേർത്തു.
Also Read: ഹോർമുസ് പ്രമേയം റഷ്യയും ചൈനയും വീറ്റോ ചെയ്തു; യുഎൻ സുരക്ഷാ കൗൺസിലിൽ അമേരിക്കൻ നീക്കത്തിന് തിരിച്ചടി
മേഖലയിലെ യുദ്ധസാഹചര്യം ഒഴിവാക്കാൻ നയതന്ത്രപരമായ ഇടപെടലുകൾക്ക് അവസരം നൽകണമെന്ന പാകിസ്ഥാന്റെ അഭ്യർത്ഥനയാണ് ഈ തീരുമാനത്തിന് പിന്നിൽ. ഇറാനോടും ഹോർമുസ് കടലിടുക്ക് തുറക്കാൻ ഷെഹ്ബാസ് ഷെരീഫ് ആവശ്യപ്പെട്ടിട്ടുണ്ട്. രണ്ടാഴ്ചത്തെ ഈ സമയപരിധി ഉപയോഗപ്പെടുത്തി നയതന്ത്ര ചർച്ചകളിലൂടെ പ്രശ്നപരിഹാരം കണ്ടെത്താനും യുദ്ധം പൂർണ്ണമായും ഒഴിവാക്കാനുമാണ് പാകിസ്ഥാൻ ലക്ഷ്യമിടുന്നത്. ട്രംപിന്റെ പുതിയ നിലപാട് നിലവിൽ യുദ്ധഭീതിയിലായിരുന്ന ഗൾഫ് മേഖലയ്ക്ക് താൽക്കാലിക ആശ്വാസം നൽകുന്നതാണ്.
The post ഇറാനിൽ രണ്ടാഴ്ചത്തെ വെടിനിർത്തൽ; ഉപാധികളുമായി ട്രംപ് രംഗത്ത് appeared first on Express Kerala.
